E dau dredre meda vakasamataka na iloloma ena veiganiti me soli vua e dua. Na kena taleitaki se sega na iloloma e vakatau ena nona rai o koya e taura. Na ka tale ga e taleitaka e dua ena rairai sega ni taleitaka e dua tale.

Kena ivakaraitaki, era na nanuma na itabagone ni iloloma vinaka duadua na iyaya vovou vakalivaliva. Ena yasana adua, ena rairai bibi cake vei ira na uabula e dua na iyaya mareqeti ni vuvale. E iloloma taleitaki ruarua vei ira na gone kei na qase ena so na vanua na ilavo, mera qai lewa ga na ka era vakayagataka kina.

E levu era sega ni kauaitaka na dredre ni vaqara iloloma, vakabibi ke ra via soli iloloma vua e dua era dau veivolekati. De dua eda na sega ni kunea ena so na gauna na iloloma vinaka duadua eda via solia. Ia na cava e rawa ni vukei keda ena noda vaqara iloloma? Meda raica mada e va na ka meda vakasamataka nida vaqara iloloma me rawa ni marautaki na ka eda solia.

Ka e vinakata e dua. E kaya e dua na turaga ni Belfast, ena vualiku kei Ailadi, ni iloloma vinaka duadua na basikeli a soli vua ni se yabaki 10 se 11. A vinakata dina me dua nona basikeli, oya na vuna e kaya kina ni iloloma vinaka duadua me bau soli vua. Kena ibalebale nona vakamareqeta se sega e dua na iloloma e vakatau vakalevu ena ka e vinakata. Vakasamataki koya gona o via soli iloloma kina. Saga mo kila na ka e dau vakamareqeta baleta qori ena vakatau kina na ka e vinakata. Kena ivakaraitaki, era dau vakamareqeta na tutu kei na bubu na nodra vuvale. De dua era na vinakata mera sota vakalevu kei ira na luvedra kei na makubudra. Sa wacava nodra marau ke ra dau gade vata vakavuvale, qori ena rairai iloloma vinaka duadua vei ira.

E rawa nida kila na ka e vinakata e dua ke da vakarorogo vinaka. E kaya na iVolatabu meda “totolo ni vakarorogo . . . , berabera ni vosa.” (Jemesa 1:19) Ni o veitalanoa kei ira nomu itokani  se wekamu, vakarogoci ira vinaka mo kila na ka era taleitaka se cata. Qori ena vukei iko ena nomu vaqara na iloloma era na marautaka.

Ganita vinaka na ituvaki. Ke ka lailai mada ga na iloloma se sau rawarawa, ena marautaki tiko ga ke yaga dina vua e taura na iloloma. Ia o na kila vakacava na ka e yaga dina vua e dua?

De dua e rawarawa sara mo taroga vakadodonu se cava ena yaga dina vua se na ka e vinakata. Ia era sega ni duavata ena iwalewale qori e levu era dau soli iloloma. Era nanuma ni na marautaki vakalevu ke soli na iloloma ena gauna sara ga e leqa tu kina e dua qai sega tu ni namaka na iloloma qori. Era na rairai sega ni madua eso na tukuna na ka era taleitaka se cata, ia ena dredre toka mera tukuna na ka era leqa kina.

E bibi gona mo kauai, saga mo kila vinaka na kena ituvaki e dua. Vakacava e gone, qase, dawai, vakawati, sa veisere, mate o watina, e cakacaka tiko se sa cegu? Ni o sa kila rawa na kena ituvaki, vakasamataka sara na iloloma vakacava ena yaga vakalevu vua.

O na kila na iloloma ena yaga dina vua e dua, ke o veitalanoa kei ira era kila vinaka na kena ituvaki se ra sa sotava oti tale ga. Era rawa ni tukuna vei iko eso na ka o sega tu ni kila. Na nomu kila vinaka na kena ituvaki o koya o via soli iloloma kina, ena vukei iko mo digia e dua na iloloma ena yaga dina vua.

Soli ena gauna veiganiti. E kaya na iVolatabu: “Na vosa ena gauna donu e yaga dina!” (Vosa Vakaibalebale 15:23) Na tikinivolatabu qori e vakaraitaka ni bibi meda digia vinaka na gauna eda vosa kina. E okati tale ga e keri na ka eda cakava. E dau marautaki na vosa e tau ena gauna donu, na iloloma tale ga e soli ena gauna veiganiti ena marautaki vakalevu.

E levu na ituvaki e rawa ni dau soli kina na iloloma. Kena ivakaraitaki, sa vakarau vakawati dua nomu itokani, vakarau tauri ivola mai koronivuli e dua na itabagone, se vakarau sucu e dua na gonevou. Eso era dau vakavola na ka marautaki ena yaco ena loma ni dua na yabaki. Qori e vukei ira ena nodra vakasamataka rawa toka na iloloma veiganiti me soli. *

E sega ni tukuni me qai caka ga na soli iloloma ena gauna ni soqo se ni yaco e dua na ka marautaki. E rawa nida soli iloloma ena gauna cava ga eda vinakata kina. Ia meda qaqarauni ena so na ituvaki. Kena ivakaraitaki, e soli iloloma e dua na tagane vua e dua na yalewa qai sega na vuna vinaka me cakava kina qori. E rawa ni nanuma o yalewa ni vakasuina na soli iloloma ya. Ke donu mada ga na inaki i tagane, na nona soli iloloma e rawa ni vakavuna na nanuma cala kei na so tale na leqa. Ni vakasamataki tiko qori, dua tale na ka bibi meda kauaitaka nida soli iloloma—na kena inaki.

iNaki e soli kina. Eda raica ena ivakaraitaki sa cavuti oti mai ni rawa ni taura cala o koya e taura na iloloma na inaki e soli kina vua. E vinaka me dikeva tale ga o koya e soli iloloma na nona inaki. E levu e vinaka na inaki ni nodra soli iloloma, eso era soli iloloma ena so na gauna ena loma ni yabaki nira vakasaurarataki kina. Ia eso tale era soli iloloma nira namaka me caka vei ira eso na ka vinaka se saumi lesu nodra soli iloloma.

O na kila vakacava ni vinaka na inaki ni nomu soli iloloma? E kaya na iVolatabu: “Na ka kece oni cakava me caka ena loloma.” (1 Korinica 16:14) Ena marau vakalevu o koya e taura na nomu iloloma ke raica ni yavutaki ena loloma kei na kauai dina. O na marau ni o kila e sega ni vakarairai ga na nomu soli ka. Ena marau tale ga na Tamada vakalomalagi ni o soli ka mai vu ni lomamu. A vakacaucautaki ira na lotu vaKarisito e Korinica na yapositolo o Paula  nira soli ka ena marau mera vukei ira kina na tacidra vaKarisito e Jutia. E kaya vei ira o Paula: “Na Kalou e taleitaki koya e soli ka ena marau.”—2 Korinica 9:7.

Eda sa veivosakitaka mai e vica na ka ena veivuke ena noda vaqara iloloma. Qori na ka e vakasamataka tale ga na Kalou ena gauna e vakarautaka kina na nona iloloma uasivi duadua vei keda. Ena vakamacalataki ena ulutaga tarava na iloloma uasivi qori.