Eda raica ena ulutaga sa oti na ivakatakilakila e tukuna o Jisu. Na ivakatakilakila qori e dusia ni sa tauyavu na Matanitu ni Kalou mai lomalagi, e kena Tui o Jisu Karisito.

E kaya na iVolatabu ni gauna e veiliutaki kina o Jisu, ena kolotaki Setani mai vuravura kei ira nona timoni. Na ka era na cakava ena vakilai tiko ga e vuravura, qori na vuna e ca sara ga kina na ituvaki ni tekivu mai na 1914.—Vakatakila 12:7, 9.

E torosobu tiko ga na ituvaki ca ni vuravura qo. Ia ni Tui ni Matanitu ni Kalou o Jisu, e cakava eso na ka me vukei ira kina na lewenivanua e veiyasa i vuravura. Kena ivakaraitaki, levu era sa vulica qai muria na ivakavuvuli vakaivolatabu e veisiga ena cakacaka ni vuli iVolatabu e vuravura raraba e parofisaitaka o Jisu. (Aisea 2:2-4) Vica vata tale ga na milioni era vulica me vinaka nodra ivakarau ni cakacaka, vinaka nodra veimaliwai vakavuvale, mera marautaka tale ga nodra iyau mera kua ga ni bobula kina. Na ka era vulica qori ena yaga vakalevu vei ira ena gauna qo, ena veisautaka tale ga nodra itovo me rawa ni vakadonui ira na Kalou ni veiliutaki nona Matanitu. Ena vakayacori vakacava qori?

Sa veiliutaki tiko e lomalagi o Jisu, era veiliutaki tiko e vuravura na iliuliu vakatamata. Ia e kaya na Kalou vei Jisu: “Mo lewa ena kedra maliwa na kemu meca.” (Same 110:2) Sa voleka na gauna me vakamalumalumutaki ira kina na dauveitusaqati o Jisu. Ena qai vakacegui ira na talairawarawa vua na Kalou.

Qori na gauna ena yavala kina na Matanitu ni Kalou me

• Vakarusai na lotu lasu. Era na vakarusai kece na lotu era vakavulica tiko na veika lasu me baleta na Kalou, ra qai dau veivakasaurarataki. E kaya na iVolatabu na lotu lasu e vaka na saqamua. Era na kidroataka e levu na nona vakarusai.—Vakatakila 17:15, 16.

• Vakaotia na veiliutaki vakatamata. Ena yavala na Matanitu ni Kalou me vakarusa vakadua kina na veiliutaki vakatamata.—Vakatakila 19:15, 17, 18.

• Vakarusai ira na tamata ca. Vakacava o ira era nakita mera caka ca, ra qai talaidredre vua na Kalou? E kaya na iVolatabu: “O ira na tamata ca era na muduki tani e vuravura.”—Vosa Vakaibalebale 2:22.

• Vakarusai Setani kei ira na timoni. Era na sega tale ni “vakacalai ira na veimatanitu.”—Vakatakila 20:3, 10.

Ia vakacava o ira na tokona na Matanitu ni Kalou?

Ni veiliutaki vakaTui o Jisu mai lomalagi, ena qai cakava na veika vinaka e sega ni cakava rawa e dua na iliuliu vakatamata. Era na vukei koya tale ga na le 144,000 era na veiliutaki vata kei koya, era digitaki mai vuravura. (Vakatakila 5:9, 10; 14:1, 3) Ena raica me vakayacori na inaki ni Kalou e vuravura. Cava ena cakava na Matanitu ni Kalou vei ira na vakarurugi kina?

• Sega na tauvimate, kei na mate. “Ena sega ni kaya e dua na lewenivanua: ‘Au tauvimate,’” ena “sega tale ga na mate.”—Aisea 33:24; Vakatakila 21:4.

• Vakilai na vakacegu dina kei na sautu. “Ena levu sara na nodra vakacegu na luvemu”, era “na dui dabe [tale ga] ena ruku ni nodra vaini kei na ruku ni nodra vunilolo, ena sega ni dua me vakarerei ira.”—Aisea 54:13; Maika 4:4.

• Vakarautaka na cakacaka marautaki. “Era na marautaka vakalevu na cakacaka ni ligadra o ira au digitaka. Era na sega ni oca wale.”—Aisea 65:22, 23.

• Vakaotia na vakacacani ni vuravura. “Ena reki na vanua talasiga kei na vanua sigasiga, kei na buca dravuisiga ena marau, ena se me vaka na senikau na sefaroni.”—Aisea 35:1.

• Vakavulici ira na lewenivanua na ka mera cakava mera bula tawamudu kina. “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.”—Joni 17:3.

E vinakata na Kalou mo marautaka na veivakalougatataki qori. (Aisea 48:18) Ena vakamacalataki ena ulutaga e tarava na ka mo cakava ena gauna qo, mo rawa ni bula ena vuravura totoka ena gauna se bera mai.