E Donu se Cala? iDusidusi Yaga
Dikeva mada qo e va na ituvaki era sa vakadeitaka kina e vica vata na milioni ni yaga na ivakasala ena iVolatabu qai nuitaki.
1. Bula Vakawati
E duidui na nodra rai e levu me baleta na vakawati, kei na sala me marautaki kina.
KA E KAYA NA IVOLATABU: “O kemuni na tagane moni lomana tale ga na dui watimuni me vaka ga nomuni lomani kemuni, ia na yalewa me dokai watina vakalevu.”—Efeso 5:33.
KENA IBALEBALE: E tauyavutaka na Kalou na vakawati, e kila vinaka gona na sala me rau marau kina na veiwatini. (Marika 10:6-9) E sega ni vakatau na nodrau marau ena ka rau dui rawata, ia e vakatau ga ena ka rau rawa ni cakava me marautaki kina nodrau vakawati. Na tagane e lomani watina ena karoni koya qai kauaitaki koya. Na yalewa tale ga e dokai watina ena laurai ena ka e cakava kei na ka e tukuna.
YAGA NA IVAKASALA ENA IVOLATABU: Rau kila o Quang kei Thi mai Vietnam, ni rau sega ni marautaka nodrau vakawati. E sega ni dauveinanumi o Quang, e kaya: “Au sega ni dau kauaitaka nona rai o Thi qai dau vakamaduataki koya.” E vinakata o Thi me rau veisere, e kaya: “Au kila niu sa sega ni nuitaki watiqu se dokai koya.”
Toso na gauna, rau vulica na ka e kaya na iVolatabu kei na sala me rau muria kina na Efeso 5:33. E kaya o Quang: “E vukei au na tikinivolatabu qori meu dau yalovinaka vei watiqu, meu lomani koya qai kauaitaka na ka e vinakata kei na ivakarau ni lomana. Niu cakava qori, e lomani au qai dokai au vakalevu o watiqu.” E kaya o Thi: “Niu muria na ka e tukuni ena Efeso 5:33 meu dokai watiqu, au vakila sara ga ni lomani au, e taqomaki au, au lomavakacegu tale ga.”
Me ikuri ni ivakamacala me baleta na vakawati, raica ena jw.org na Yadra! Nb. 2 2018, e kena ulutaga “12 na Sala me Marau Kina na Vuvale.”
2. iVakarau ni Veimaliwai
E levu era vakalolomataki ira eso tale ena vuku ni vanua era cavutu mai kina, kedra irairai, nodra lotu, kei na nodra digidigi me baleta na veiyacovi (sexual orientation).
KA E KAYA NA IVOLATABU: “Rokova na tamata kece.”—1 Pita 2:17.
KENA IBALEBALE: E sega ni vakadonuya na iVolatabu na veivakaduiduitaki vakamatatamata, se nodra cati na veimoceri vakatagane se vakayalewa. Ia e uqeti keda ga meda dokai ira na tamata kece mai na veivanua, duidui matatamata, vutuniyau se dravudravua. (Cakacaka 10:34) Ke da sega mada ga ni duavata kei na ka era vakabauta se cakava, meda lomani ira qai dokai ira tiko ga.—Maciu 7:12.
YAGA NA IVAKASALA ENA IVOLATABU: E dau vakabauta tu o Daniel nira tamata ca na kai Esia. E dau cati ira gona qai vakamaduataki ira e matanalevu. E kaya: “Au nanuma sara tu ga ni donu na ka au cakava, niu sa tokona tiko na noqu vanua. Ia au sega ni kila ni cala sara tu ga na noqu nanuma kei na ka au cakava.”
Toso na gauna, e vulica o Daniel na ka e kaya na iVolatabu. E kaya: “Au liaca ni dodonu meu veisautaka noqu ivakarau ni rai. Meu raici ira na tamata ena rai ni Kalou, ya nida tautauvata kece se mani vanua cava eda cavutu mai kina.” E vakamacalataka o Daniel na nona rai ena gauna qo, e kaya: “Sa sega ni bibi vei au na vanua era cavutu mai kina. Au sa lomani ira na tamata kece mai na veiyasa i vuravura, qai veitokani voleka kei ira.”
Me ikuri ni ivakamacala, wilika ena jw.org na Yadra! Nb. 3 2020, e kena ulutaga “Na iWali ni Veivakaduiduitaki”
3. iLavo
E levu era qara na bula vutuniyau mera marau kina, me vinaka tale ga nodra gauna se bera mai.
KA E KAYA NA IVOLATABU: “E itataqomaki na vuku me vaka ga ni itataqomaki na ilavo, ia qo na yaga ni kilaka: Na vuku e vakabula na kena itaukei.”—Dauvunau 7:12.
KENA IBALEBALE: Eda vinakata na ilavo, ia e sega ni ivakadei nida na marau kina se me vinaka na noda gauna se bera mai. (Vosa Vakaibalebale 18:11; 23:4, 5) Ia nida muria na ivakasala vuku ni Kalou ena iVolatabu eda na vakila na marau dina, ena vinaka tale ga noda veigauna se bera mai.—1 Timoci 6:17-19.
YAGA NA IVAKASALA ENA IVOLATABU: E dau vakaliuca na qarai ni iyau o Cardo e dua na turaga ni Idonisia. E kaya: “A tu kece vei au na ka era dau tatadrataka e levu. E levu na vanua au lakova, au voli iyaya saulevu, motoka kei na vale.” Ia e sega ni dei na ka kece qori. E kaya o Cardo: “E dua a lawakitaki au, qai yali kece na ilavo au cakacakataka tu mai ena vica na yabaki. Noqu vakaliuca na qarai ni iyau, au vakila ga kina na rarawa kei na yalolailai.”
E qai muria o Cardo na ivakasala ena iVolatabu me baleta na ilavo. Sa sega ni qai vakaliuca na qarai ni iyau, ia sa bula rawarawa ga. E kaya: “Au sa qai rawata na iyau vinaka duadua e dei, ya na vinaka ni noqu veiwekani kei na Kalou. Au sa moce vinaka e veibogi, au vakila tale ga na marau dina.”
Me ikuri ni ivakamacala ena ka e tukuna na iVolatabu me baleta na ilavo, wilika ena jw.org na Vale ni Vakatawa Nb. 3 2021, e kena ulutaga “Rawa ni Dei Nomu Veigauna se Bera Mai ena iLavo kei na Vuli Vinaka?”
4. Veiyacovi
E duidui na nodra rai e levu me baleta na veiyacovi.
KA E KAYA NA IVOLATABU: “Moni vakatabui kemuni mai na veiyacovi tawadodonu. Moni kila yadua na sala moni lewa kina na yagomuni, me savasava qai rokovi, moni kua ni dau kocokoco se garogaro vakasisila me vakataki ira na lewe ni veimatanitu era lecava na Kalou.”—1 Cesalonaika 4:3-5.
KENA IBALEBALE: E yalana na iVolatabu na sala meda vakaraitaka kina na gagadre ni veiyacovi. Na vosa “veiyacovi tawadodonu” e okati kina na veibutakoci, saqamua, nodrau veiyacovi na sega ni vakamau, veimoceri vakatagane se vakayalewa, kei na veiyacovi kei na manumanu. (1 Korinica 6:9, 10) E isolisoli ni Kalou na veiyacovi qai nona inaki me rau veiyacovi ga na tagane kei na yalewa rau veiwatini.—Vosa Vakaibalebale 5:18, 19.
YAGA NA IVAKASALA ENA IVOLATABU: E kaya o Kylie e dua na yalewa mai Ositerelia: “Niu sega ni vakawati, au nanuma niu na lomani qai taqomaki keu veiyacovi. Ia e yaco na kena veibasai. Au rarawa vakalevu qai vakila niu sega ni lomani.”
E qai muria o Kylie na ka e vulica ena iVolatabu me baleta na veiyacovi. E kaya: “Au raica nida muria na ivakatagedegede ni Kalou, eda na sega ni rarawa se mosi na lomada. Niu cakava na ka e vinakata o Jiova au sa qai vakila niu taqomaki qai lomani. Au sega ni sotava na veika mosimosi niu sa muria na ivakasala ena iVolatabu!”
Me ikuri ni ivakamacala, wilika ena jw.org na ulutaga “Cava e Kaya na iVolatabu me Baleta na Nodrau Tiko Vata e Rua Rau se Bera ni Vakamau?”
E vakavulici keda na Dauveibuli meda kila na ka e donu kei na ka e cala. E sega ni rawarawa meda muria na ka e vinakata, ia e yaga vakalevu. Eda nuidei nida na vakila kina na marau me tawamudu.
