E sega ni ivola vakavuniwai na iVolatabu, ia e vakarautaka na ivakasala e vinaka qai yaga. E rawa ni vukei ira era sotava tiko na ituvaki dredre ni vakasama. Dikeva mada qo eso na kena ivakaraitaki.

“E sega ni yaga na vuniwai vei ira na bula vinaka, e yaga ga vei ira na tauvimate.”—MACIU 9:12.

E tukuni ena iVolatabu ni rawa nida qara na veiqaravi vakavuniwai. Levu era vakila na vakacegu nira sa vulica na veika me baleta na kedra mate, kei na nodra qaravi vakavuniwai.

“E yaga e yagomu na vakaukauayago.”—1 TIMOCI 4:8, Contemporary English Version.

Ena rawa ni vakavinakataka nomu ivakarau ni vakasama ke o cakava eso na ka mo bulabula kina vakayago. Qori me vaka nomu vakaukauayago wasoma, kania na kakana bulabula, qai moce vakavinaka.

“Na yalomamarau e wai vinaka, ia na yalorarawa e vakaotia na igu.”—VOSA VAKAIBALEBALE 17:22.

O na rawa ni marau ke o wilika eso na tikinivolatabu veiuqeti, qai biuta eso na isausau ena rawarawa mo sauva. Ke donu tiko ga nomu rai qai nuidei ni na vinaka na ituvaki  ena gauna se bera mai, qori ena vukei iko mo vosota na veika o sotava tiko.

“Era vuku na yalomalumalumu.”—VOSA VAKAIBALEBALE 11:2.

De dua ena dredre mo cakava vakataki iko eso na ka, mo yalorawarawa gona ni ciqoma nodra veivuke eso tale. De dua era na vinakata eso nomu itokani se lewenivuvale mera vukei iko, ia era na rairai sega ni kila na ka mera cakava. Kua ni namaka vakasivia na ka mera cakava, mo vakavinavinakataka tale ga na nodra veivuke.

“Au lai raici vuniwai niu vakila ni sega ni vinaka tiko na noqu bula. E mani vakamacalataka na mate e tauvi au. Qori e vukei au meu ciqoma na kequ ituvaki, qai qara eso na veiqaravi vakavuniwai e rawa ni vukei au.”—Nicole, a e tauvi mate ni vakasama (bipolar disorder).

“E vakayaloqaqataki keirau vakaveiwatini neirau wili iVolatabu wasoma, e vukei keirau tale ga me donu tiko ga neirau rai. Eso na gauna niu yalolailai, e dau vakacegui au e dua na tikinivolatabu.”—Peter, e dau lomabibi.

“Au dau mamadua, e dredre kina meu tukuna vei ira eso tale na kequ ituvaki. Ia e dau vakarogoci au vinaka e dua noqu itokani, e saga tale ga me kila na ka au sotava. E vukei au meu nuidei, meu kila tale ga niu sega ni sotava duadua tiko na ituvaki qo.”—Ji-yoo, e dau kana vakasivia ena vuku ni kena mate.

“E vukei au na iVolatabu meu dau yalorawarawa, meu cegu vakavinaka, meu kua tale ga ni cakacaka vakasivia. Na ivakasala vuku e tu kina e vukei au meu vosota na nuiqawaqawa au sotava tiko.”—Timothy, e dau vakasamataka se vuki cakava tiko ga e dua na ka (obsessive-compulsive disorder).