Ena yakavi ni bera ni mate o Jisu, e vakasalataki ratou na yapositolo me ratou kua ni vaqara itutu ena kedra maliwa na tacidratou. E tukuna: “Era dau vakacolasau na tui ni veimatanitu, era vakatokai tale ga mera Daucakavinaka o ira na lewai ira na veimatanitu. Mo dou kua ni va ya o kemudou.”—Luke 22:25, 26.

O cei o ira na Daucakavinaka e cavuta o Jisu? E laurai ena ilavo, ceuceu, kei na so tale na volavola ni dau kena ivakarau vei ira e Kirisi kei Roma mera rokovi ira na tagane se iliuliu ena icavuti Euergetes, se Daucakavinaka. Era rokovi na tagane qori nira vakaitavi ena so na veiqaravi e yaga raraba.

Levu na tui era cavuti mera Daucakavinaka. Me vakataki Ptolemy III Euergetes na iliuliu e Ijipita (rauta na 247-222 B.G.V.) kei Ptolemy VIII Euergetes II (rauta na 147-117 B.G.V.). E cavuti tale ga qori vei rau na iliuliu e Roma o Sisa Julius (48-44 B.G.V.) kei Akusito (31 B.G.V.–14 G.V.), vaka kina o Eroti na Ka Levu, na tui Jutia. E rairai cavuti qori vei Eroti ni volia na witi mera vakacegui kina na nona tamata ena gauna ni dausiga, e vakarautaka tale ga na nodra isulu na dravudravua.

E kaya e dua na dauvakadidike ni iVolatabu ni Jamani o Adolf Deissmann, ni sa vakayagataki vakalevu na icavuti na Daucakavinaka. E kaya: “E rawarawa sara meda kumuna totolo mai na ka e ceuti, e sivia ni duanadrau na vanua [e vakayagataki kina na icavuti qo].”

Na cava gona e vakaibalebaletaka o Jisu ni tukuna vei ratou na nona tisaipeli: “Mo dou kua ni va ya o kemudou”? Vakacava e tukuna me ratou kua ni kauaitaki ira na lewenivanua, ya me ratou kua ni kauaitaka na ka era gadreva? Sega. E kauaitaka o Jisu na inaki ni lomasavu.

Ena gauna i Jisu, era dau saga na vutuniyau me vinaka na kedra irogorogo nira vakailavotaka eso na vakatasuasua kei na qito ena vanua ni sarasara, tara valenisoro se caka raraniqito, kei na so tale na sasaga va qori. E nodra inaki mera vakacerecerei, rogo, se mera digitaki kina. E cavuti ena dua na ivola: “Era dau lomasavu dina, ia era cakava qori nira nanumi ira ga ena veika vakapolitiki.” E tukuna o Jisu mera kua ni muria na nona imuri na rai kei na yalo qori.

Oti tale e vica na yabaki, e vakabibitaka na yapositolo o Paula me donu na inaki ni noda lomasavu. E vola vei ira na mataveitacini e Korinica: “Me cakava na tamata yadua na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e soli ka ena marau.”—2 Kor. 9:7.