E volaitukutukutaka na isoqosoqo na World Wildlife Fund, ni levu na kau kei na manumanu vovou era laurai ena yasayasa vakaMekong mai na 1997 ina 2011, wili kina na gata mata damu e bati gaga na ruby-eyed pit viper. Na yasayasa vakaMekong e wili kina na vanua o Cambodia, Laos, Myanmar, Thailand, Vietnam, kei na yasana o Yunnan e Jaina. Ena 2011 wale ga e laurai kina e 82 na kau, 21 na manumanu dolo, 13 na mataqali ika, 5 na manumanu era bula e vanua e wai, qai 5 na manumanu vakasucuna.

E tabaki ena niusiveva na Moscow Times ni takalevu ena “vanua vakaUrope” na volitaki tamata. Era volitaki e levu mera saqamua, vakasaurarataki mera cakacaka, e “volitaki mada ga na gacagaca ni tamata.” O ira era dau volitaki tamata era taketetaki ira na dravudravua, sega nodra cakacaka kei ira era vakaduiduitaki.

Era dikeva na dauvakadidike ni nodra sara tivi vakasivia na gone kei na itabagone e “vakavuna nodra sega ni dauveimaliwai nira sa uabula.” Oti na vakadidike qori, e vakatututaki vei ira na gone me “1 ga se 2 na aua na nodra sara tivi, ke mani porokaramu vinaka mada ga.”

E levu na nodra koro na itaukei ni vanua o Alaska e toka e baravi se volekata na uciwai, qai 86 na pasede ni veikoro qori e dau luvu qai sisi kina na qele. E ripotetaki ni berabera na buli ni waicevata e dau taqomaka na baravi ni katakata tu ga na draki, e vakaleqai kina na koro ni draki ca ena vulaibotabota.

E vakayagataki e levu na ilavo ena iyaya vovou e veisautaka na kaukaua mai na cagi kei na matanisiga me livaliva, me kua kina ni vakaleqa na vuravura. Ia e kaya na dairekita liu ni isoqosoqo na International Energy Agency, “na kasi gaga e kaburaka e dua mada ga na iwase lailai ni kaukaua e buli ena 20 na yabaki sa oti, e tautauvata tiko ga kei na levu ni kasi gaga e kaburaka ena gauna qo.”