Levu era via kila na itukutuku ni Matanitu ni Kalou nira rogoca ena nodra vosa. De dua, ya na vuna e tuvanaka kina o Jiova ena Penitiko 33 G.V., mera rogoca na itukutuku vinaka ena nodra “vosanisucu” e “levu na Jiu dau rerevaka na Kalou era lako mai na veimatanitu kece e ruku i lomalagi.” Kena irairai nira vosataka tale ga na vosa e vakayagataki vakalevu ena gauna ya me vaka na vosa vakaIperiu se vaKirisi. (Cak 2:5, 8) Nikua ena rairai vunau tiko e vica na ivavakoso e duidui na kena vosa ena dua ga na yalava ni levu kina na duikaikai. Na cava mera cakava na dautukutuku ena ivavakoso qori mera veitokonitaka na kena tarai na yalava, mera kua kina ni cudru na itaukeinivale ni tarai vakavica nodra vale ena dua na gauna lekaleka?

• Veivosaki (Vvb 15:22): Mera veivosaki na ivakatawa ni cakacaka, mera tuvanaka e dua na ituvatuva veiganiti me vunautaki kina na itukutuku vinaka. Ke lailai na nodra yalava na ivavakoso e duatani na kena vosa, de dua era na vinakata meda kua ni vunau vei ira na itaukeinivale ena nodra vosa. Ke ra sega ni rawa ni tara wasoma na nodra yalava nira veituyaki, de dua era na vinakata meda tara taucoko na vale, da qai vakaraitaka yani ke dua e tataleitaki. (od 93 ¶37) Se rawa nira kerea mai meda vaqarai ira era vosataka na nodra vosa da qai solia yani na kedra itukutuku. (km 7/12 5, kato) Nanuma tiko ni rawa ni vica na vosa e vosataki ena dua na vale. Na kena tuvanaki me tarai na yalava, me salavata kei na lawa ni kena taqomaki na kedra itukutuku na lewenivanua.

• Cakacaka vata (Efe 4:16): Muria vinaka na veidusimaki ni ivakatawa ni cakacaka. Vakacava o vuli iVolatabu tiko kei na dua e duatani na nona vosa? Ena rawa ni toso totolo o gonevuli ke o tuvanaka me rau vuli kei na dua ena ivavakoso voleka se iwasewase lailai e kila na nona vosa.

• Vakavakarau (Vvb 15:28; 16:1): Ke duatani nona vosa o itaukeinivale, saga mo wasea vua na itukutuku vinaka. Vakavakarau ni o saga mo kila rawa na nodra vosa, me download tale ga na veimataqali vakadewa ni iVolatabu kei na vidio ena nomu talevoni. O rawa tale ga ni vakayagataka na porokaramu ni vuli vosa na JW Language app mo vulica kina eso tale na vosa ni veikidavaki.