Nira rogoca na lewe ni ivavakoso e Roma ni sa lako tiko yani o Paula, era mani lakova eso na mataveitacini e rauta ni 64 na kilomita mera tavaki koya. E uqeti Paula vakacava na nodra loloma? “Ni raici ira o Paula, e vakavinavinakataka sara ga na Kalou, e vakayaloqaqataki tale ga.” (Cak 28:15) E kilai o Paula ni dau vakayaloqaqataki ira na ivavakoso e sikova, ia qo ni vesu tiko, era vakayaloqaqataki koya na mataveitacini.—2Ko 13:10.

Nikua era veisiko na ivakatawa ni tabacakacaka ena ivavakoso mera vakayaloqaqataki ira na mataveitacini. Me vakataki keda ga, ena so na gauna era dau oca, nuiqawaqawa, ra yalolailai tale ga. Ni veisiko tale yani kei watina, o na uqeti rau vakacava me rau yaloqaqa me rawa nida “veivakayaloqaqataki”?—Rom 1:11, 12.

• Tokona na cakacaka vakavunau. E vakayaloqaqataki na ivakatawa ni tabacakacaka nira vakuai ira na dautukutuku me yaga vei ira na macawa lavotaki ni veisiko. (1Ce 1:2, 3; 2:20) Vakacava mo painia veivuke ena vula e veisiko mai kina? O rawa ni kerea mo cakacaka vata kei koya se o watina ena cakacaka vakaitalatala, se drau veitomani ena caka vuli iVolatabu? Rau na marautaka me rau cakacaka vata kei ira na dautukutuku kece, wili kina o ira na ka vou se o ira na sega ni maqosa ena cakacaka vakaitalatala.

• Dau veikauaitaki. Vakacava o rawa ni veivakaicilitaki se veivakani? Qo e ivakaraitaki ni noda lomani rau. Rau na sega ni namaka vakasivia na ka.—Lu 10:38-42.

• Rogoca nona veidusimaki kei na ivakasala qai muria. Ena vukei keda vakayalololoma na ivakatawa ni tabacakacaka ena ka meda vakavinakataka ena noda qaravi Jiova. Ena so na gauna, ena veivakasalataki vakadodonu. (1Ko 5:1-5) Ena marau nida talairawarawa da qai vakamalumalumu.—Ipe 13:17.

• Vakaraitaka nomu vakavinavinaka. Tukuna vua na ivakatawa ni tabacakacaka kei watina na kena yaga vei iko na nodrau gugumatua. O rawa ni tukuna sara ga se volavola.—Kol 3:15.