Vunau ni Soro 7:1-38
7 “Qo na lawa ni isoro ni cakacala:+ E ka tabu sara.
2 Era na vakamatea na isoro ni cakacala ena vanua e vakamatei kina na isoro kama, me qai kureitaki wavolita na icabocabonisoro+ taucoko na kena dra.+
3 Ena cabora o koya na kena uro+ kece, na uro ni buina, na uro e kabita na wawa,
4 na rua na ivi kei na kena uro volekata na dibina. Ena kauta laivi tale ga o koya na uro ni yate kei na ivi.+
5 Ena cakava qori na bete me kubou ena icabocabonisoro me isoro ena bukawaqa vei Jiova.+ Qo na isoro ni cakacala.
6 Era na kania na tagane kece era bete,+ me laukana ena dua na vanua tabu. Qo e ka tabu sara.+
7 Ena tautauvata ga na lawa ni isoro ni ivalavala ca kei na isoro ni cakacala, ena nona na bete e veisorovaki kina.+
8 “‘Ni cabora na bete na isoro kama ena vukuna e dua, sa na nona na bete na kuli+ ni isoro kama e cabori.
9 “‘Na isoro kakana kece e vavi ena ovani, se vakabutari ena itavuteke, se tavu ena itavutavu,+ ena nona na bete e cabora. Ena nona na bete.+
10 Ia na isoro kakana kece e vakawaiwaitaki+ se mamaca+ tu ga, ena kedratou kece na luvei Eroni tagane, ena tautauvata kece na kedratou ivotavota.
11 “‘Qo na lawa ni isoro ni veiyaloni+ me cabora e dua vei Jiova:
12 Ke cabora qori me vakavinavinaka+ kina, me kauta vata kei na nona isoro ni vakavinavinaka na madrai sega ni vakaleveni e vakawaiwaitaki qai buli vaka na mama, na madrai mamare e boro ena waiwai, kei na madrai era caka mai na falawa vinaka sara qai buli vaka na mama, era bali vakavinaka qai waki vata na waiwai.
13 Me ikuri ni nona isoro, ena cabora na madrai vakaleveni e buli vaka na mama kei na isoro ni vakavinavinaka, oya na nona isoro ni veiyaloni.
14 Me cabora mai kina o koya e yadua na isoro me ivotavota tabu vei Jiova, ena nona na bete e kureitaka na dra ni isoro ni veiyaloni.+
15 Na lewe ni isoro ni vakavinavinaka ni nona isoro ni veiyaloni me laukana ena siga vata ga e cabora kina. Me kua ni vakavoca tale tiko me yacova na mataka.+
16 “‘Ke cabori na nona isoro me bubului+ kina se me isolisoli e sega ni lavaki,+ me laukana ena siga e cabora kina o koya na nona isoro, na ka e vo e rawa tale ga ni laukana ena siga tarava.
17 Ia na lewe cava ga ni isoro e vo tu ena ikatolu ni siga, me vakamai ena bukawaqa.+
18 Ke mani laukana ena ikatolu ni siga na lewe ni nona isoro ni veiyaloni, ena sega ni vakadonui o koya e kauta yani na isoro oya. Ena sega ni yaga vua, e ka vakasisila, o koya tale ga e kania eso na ka qori ena saumitaro ena nona cala.+
19 Me kua ni laukana na lewena cava ga e tara e dua na ka dukadukali. Me vakamai ena bukawaqa. O ira kece era savasava era rawa ni kania na lewe e savasava.
20 “‘Ia na tamata cava ga e dukadukali qai kania na lewe ni isoro ni veiyaloni e nei Jiova, me muduki laivi* na tamata oya vei ira na kainona.+
21 Ke dua e tara na ka dukadukali, se mani dukadukali ni tamata,+ na manumanu dukadukali+ se dua tale na ka vakasisila+ e dukadukali, qai kania eso na lewe ni isoro ni veiyaloni e nei Jiova, me muduki laivi* na tamata oya vei ira na kainona.’”
22 E vosa tale vei Mosese o Jiova, e kaya:
23 “Tukuna vei ira na Isireli, ‘Moni kua ni kania na uro+ ni bulumakau tagane, se luvenisipi tagane, se me.
24 Na uro ni manumanu e kune ni sa mate tu kei na uro ni manumanu e vakamatea e dua tale na manumanu, e rawa ni vakayagataki ena dua tale na ka, ia moni kua vakadua ni kania.+
25 O koya ga e kania na uro ni manumanu e solia me cabori ena bukawaqa vei Jiova, me muduki laivi* vei ira na kainona.
26 “‘Moni kua ni kania na dra+ ena vanua cava ga oni tiko kina, se mani dra ni manumanuvuka se manumanu.
27 O koya ga e kania na dra, me muduki laivi*+ vei ira na kainona.’”
28 E vosa tale vei Mosese o Jiova, e tukuna:
29 “Kaya vei ira na Isireli, ‘O koya ga e solia na nona isoro ni veiyaloni vei Jiova, ena kauta mai e dua na iwase ni nona isoro ni veiyaloni vei Jiova.+
30 Ena kauta yani o koya e ligana na uro+ kei na sarisari me cabori vei Jiova ena bukawaqa, ena qai yalovaka me isoro yalovaki+ ena mata i Jiova.
31 Ena cakava na bete me kubou ena icabocabonisoro,+ ia na sarisari me nei Eroni kei ratou na luvena tagane.+
32 “‘Moni solia na yavana imatau me ivotavota tabu vua na bete mai na nomuni isoro ni veiyaloni.+
33 Na luvei Eroni tagane ga e cabora na dra ni isoro ni veiyaloni kei na uro, ena nona ivotavota+ na yavana imatau.
34 Niu sa taura na sarisari ni isoro yalovaki kei na yava ni ivotavota tabu mai na nodra isoro ni veiyaloni na Isireli, au qai solia vei Eroni na bete kei ratou na luvena tagane, me ivakaro tudei vei ira na Isireli.+
35 “‘Qo na ivotavota mai na isoro vei Jiova e dau cabori ena bukawaqa e biu vakatikitiki me baleti ira na bete, vei Eroni kei ratou na luvena tagane, ena siga e kauti ratou kina me ratou veiqaravi vakabete vei Jiova.+
36 Qori na ka e vakarota o Jiova vei ira na Isireli mera solia vei ratou ena siga e lumuti ratou+ kina. Qo na lawa tudei mera muria ena nodra itabatamata.’”
37 Qo na lawa me baleta na isoro kama,+ na isoro kakana,+ na isoro ni ivalavala ca,+ na isoro ni cakacala,+ na isoro ni veibuli,+ kei na isoro ni veiyaloni,+
38 me vaka ga e vakaroti Mosese kina o Jiova ena Ulu i Saineai,+ ena siga e vakaroti ira kina na Isireli mera kauta vei Jiova na nodra isoro ena vanua talasiga kei Saineai.+
iVakamacala e ra
^ Se “me vakamatei.”
^ Se “me vakamatei.”
^ Se “me vakamatei.”
^ Se “me vakamatei.”
