Vakatakila e Vola o Joni 5:1-14
5 Au qai raica ena ligaimatau i koya e dabe ena idabedabe vakaturaga+ e dua na ivolavivigi e volai ruarua na yasana, e dregati vinaka ena vitu na drega.
2 Au raica tale ga e dua na agilosi kaukaua e kacivaka ena domolevu: “O cei e ganiti koya me dolava na ivolavivigi kei na kena drega?”
3 Ia e sega ni dua mai lomalagi, se vuravura, se ruku i vuravura e rawa ni dolava se wilika na ivolavivigi.
4 Au sorova sara ga na tagi ni sega ni dua e ganita me dolava na ivolavivigi se me raica na ka e tu e loma.
5 Ia e tukuna vei au e dua vei ira na qase: “Kua ni tagi. Raica! Na Laione ena yavusa i Juta,+ na kawa+ i Tevita,+ e sa qaqa+ me dolava na ivolavivigi kei na kena drega e vitu.”
6 Au a raica tale ga ni duri tu ena maliwa* ni idabedabe vakaturaga, kei na va na kabula, kei ira na qase,+ e dua na lami+ e kena irairai ni sa vakamatei,+ e vitu na nona ileu, e vitu tale ga na matana e vakaibalebaletaka na vitu na yalo ni Kalou+ e sa talai yani e vuravura taucoko.
7 E lako sara mai liu na Lami qai taura na ivolavivigi ena ligaimatau i koya e dabe tiko ena idabedabe vakaturaga.+
8 Ni taura na ivolavivigi, eratou qai cuva e mata ni Lami na va na kabula kei ira na 24 na qase,+ era yadua tu na api, kei na boulu koula e sinai ena ka boivinaka. (Na ka boivinaka e vakaibalebaletaka na nodra masu na yalosavasava.)+
9 Era lagata tale ga e dua na sere vou:+ “E ganiti kemuni moni taura na ivolavivigi, moni dolava tale ga na kena drega ni oni a vakamatei, ena nomuni dra tale ga oni voli ira kina na tamata me nona na Kalou+ mai na yavusa kece, na vosa kece, na matatamata kece, kei na matanitu kece,+
10 oni lesi ira tale ga mera dua na matanitu,+ ra qai bete vua na noda Kalou,+ mera veiliutaki vakatui,+ mera liutaka na vuravura.”
11 Au raica, au rogoca tale ga na domodra e levu na agilosi era wavokita na idabedabe vakaturaga, kei ratou na kabula, kei ira na qase, na kedra iwiliwili e oba vakaoba, e udolu vakaudolu,+
12 era kaya ena domolevu: “Na Lami a vakamatei+ e ganita me nona na kaukaua, na iyau, na vuku, na qaqa, na vakarokoroko, na lagilagi, kei na vakavinavinaka.”+
13 Au rogoca tale ga na ibulibuli kece mai lomalagi, e vuravura, e ruku i vuravura,+ e wasawasa, kei na ka kece e tu kina, nira kaya: “Vei kemuni oni dabe tiko ena idabedabe vakaturaga,+ vei koya tale ga na Lami,+ me nomudrau na vakavinavinaka, na vakarokoroko,+ na lagilagi, kei na kaukaua me tawamudu.”+
14 Eratou kaya tiko na va na kabula: “Emeni!” Era tekicuva na qase ra qai qarava na Kalou.
iVakamacala e ra
^ Se “lomadonu.”
