Same 38:1-22
Na sere i Tevita, me dau nanumi.*
38 Kemuni Jiova, ni kua ni vunauci au ena nomuni cudru,Se vakadodonutaki au ena nomuni cudru waqawaqa.+
2 Ni sa cokai au sara i loma na nomuni gasau,Qai tabaki au sobu na ligamuni.+
3 Na yagoqu taucoko e tauvimate* ena vuku ni nomuni cudru.
E sega na vakacegu e loma ni suiqu ena vuku ni noqu ivalavala ca.+
4 Ni noqu cala sa sivia na uluqu,+Vaka na icolacola bibi, au sa sega ni colata rawa.
5 Na noqu mavoa sa bona qai vuvucaEna vuku ni noqu lialia.
6 Au sa lomaleqa qai yalolailai vakalevu,Au lako voli ena rarawa ena siga taucoko.
7 E katakata na lomaqu,*Sa tauvimate na yagoqu kece.+
8 Au sa nunu mai qai vurumemeataki vakadua,Na yaluma ni lomaqu sa vakavuna me rogolevu noqu vutugu.*
9 I Jiova, na noqu gagadre kece sa tu e matamuni,Na noqu vutugu tale ga e sega ni vunitaki vei kemuni.
10 E tavatukituki na noqu uto, e yali noqu kaukaua,Qai biuti au na rarama ni mataqu.+
11 Na noqu itokani kei na noqu ilala, era levei au ena vuku ni kequ mate,Ra qai yawaki au na noqu veikilai voleka.
12 O ira na vakasaqara na noqu bula era biria na dai,O ira na via vakaleqai au era veivosakitaka na rusa,+Era vosaminiminitaka na ilawaki ena siga taucoko.
13 Ia me vaka ga na didivara, au na sega ni vakarorogo,+Me vaka ga na galu, au na sega ni dolava na gusuqu.+
14 Au sa vaka e dua na tamata e sega ni rogo rawa,Na gusuna e sega ni tukuna na ka me taqomaki kina.
15 Ni o kemuni ga, i Jiova, au waraka tiko,+Ni qai rogoci au mai, i Jiova na noqu Kalou.+
16 Niu kaya: “Mera kua ni marau ena vukuquSe vakacerecerei ira vei au ke tidara na yavaqu.”
17 Niu sa voleka sara ni bale,Na noqu mosi tale ga e tu ga kei au.+
18 Au tusanaka noqu cala,+Au lomaleqa ena noqu ivalavala ca.+
19 Ia era bulabula* qai kaukaua na kequ meca,*Era sa le levu mai na cati au ni sega na vuna.
20 Era sauma na noqu vinaka ena ca,Era saqati au niu guta na ka vinaka.
21 Ni kua ni biuti au, i Jiova.
Kemuni na Kalou, ni kua ni yawaki au tiko ga.+
22 Ni totolo mai moni vukei au,I Jiova, na noqu ivakabula.+
iVakamacala e ra
^ Se “me nanumi lesu.”
^ Ipe., “E sega na tikina vinaka e lewequ.”
^ Ipe., “E katakata sara ga na dibiqu.”
^ Se “qolou.”
^ Ipe., “bula.”
^ Se rawa ni, “Ia era levu na kequ meca ni sega na vuna.”
