Vola o Marika 5:1-43
5 Eratou yaco sara yani i tai ni wasawasa ena nodra yasayasa na kai Kerikesa.+
2 Ni se qai sobu mai waqa o Jisu, sa basika mai na ibulubulu* e dua e curumi koya na yalo velavela me tavaki koya.
3 E dau tu ga ena ibulubulu, me yacova mai na gauna ya, e sega ni dua e vesuki koya rawa, ena sinucodo mada ga.
4 E vesu vakalevu ena iqamuniyava kei na sinucodo, ia e drutilaka na sinucodo kei na iqamu; qai sega ni dua e vakamalumalumutaki koya rawa.
5 E qoqolou voli ga ena bogi kei na siga ena ibulubulu kei na veidelana, qai dau tavalaki koya ena vatu.
6 Ia ni raici Jisu vakayawa, e cici yani lai cuva sara vua.+
7 Ni qolou oti ena domolevu sa qai kaya: “Na cava meu cakava vei iko, Jisu na Luve ni Kalou Cecere Duadua? Mo bubului ena yaca ni Kalou ni o na sega ni vakararawataki au.”+
8 Ni sa vakaroti koya vakavica o Jisu: “O iko yalo velavela, lako tani vua.”+
9 Sa qai tarogi koya o Jisu: “O cei na yacamu?” E sauma: “Na yacaqu o Vavakoso, ni keimami le levu.”
10 E vakamasuti Jisu tiko ga me kua ni vakatalai ira tani na timoni mai na vanua ya.+
11 Ena gauna ya era kana tiko ena ulunivanua+ e dua na qelenivuaka levu.+
12 Ra mani vakamasuti koya na yalo velavela: “Vakatalai keimami vei ira na vuaka, me keimami curumi ira.”
13 E qai vakadonuya o Jisu. Era biubiu na yalo velavela ra lai curuma sara na qelenivuaka. Era cici yani e rauta ni 2,000 na vuaka ina barinivatu, ra lutu i wasawasa ra mani luvu kece kina.
14 Era dro na dau vakatawa vuaka mera lai tukutuku ina koro kei na veiyasana, ra mani lako mai na lewenivanua mera raica na ka sa yaco.+
15 Nira yaco yani vei Jisu, era raica ni dabe tiko na tagane a curumi koya na ivavakoso timoni ni sa vakaisulu qai vinaka tale tu na nona vakasama. Dua na ka na nodra rere.
16 O ira tale ga na raica era talanoataka na veika a yaco vua na tagane a curumi timoni, vaka tale ga kina na qelenivuaka.
17 Era mani vakamasuti Jisu me lako tani mai na nodra yasayasa.+
18 Ni vakarau vodo i waqa o Jisu, e vakamasuti koya na tagane a curumi koya na timoni me bau tomani koya.+
19 E sega ni vakadonuya o Jisu, ia e kaya vua: “Lako i vale vei ira na wekamu, lai tukuna vei ira na veika e cakava vei iko o Jiova,* kei na nona lomani iko.”
20 E gole na tagane ya qai lai talanoataka ena yasayasa vakaTikapoli* na ka kece e cakava vua o Jisu. Era kurabui sara ga na lewenivanua.
21 Ni soko lesu o Jisu i tai adua, era sa waraki koya tu e dua na ilala levu, e mani tu ga e matasawa.+
22 E lako yani vua o Jairo, e dua na ivakatawa ni valenilotu. Ni raici Jisu, e tekiduru i yavana.+
23 E vakamasuti koya vakavica ni kaya: “Sa tauvimate bibi* na luvequ yalewa lailai. Yalovinaka, ni mai tarai koya mada+ me oti nona tauvimate, me bula vinaka sara.”
24 Rau mani lako vata sara kei Jisu, qai dua na ilala levu era muri koya ra qai drigiti koya tiko.
25 E maliwai ira tiko e dua na marama e lako tu ga vua na dra+ me 12 na yabaki.+
26 E vosota e levu* na veiqaravi vakavuniwai, e vakayagataka kece kina na nona iyau, ia e sega ni vakaotia na kena mate, sa qai ca ga.
27 Ni rogoca na veika e cakava o Jisu, sa qai ciqi yani i dakuna ena kedra maliwa na ilala levu ya, mani tara sara na nona isulu e sau,+
28 e kaya tiko ga: “Keu tara wale ga na nona isulu e sau, au na bula.”+
29 E mudu vakasauri na drodro ni dra, e vakila sara ga ni sa vakabulai mai na mate bibi ya.
30 Gauna vata qori e vakila kina o Jisu ni lako tani vua na kaukaua,+ e vuki qai tarogi ira na ilala levu ya: “O cei e tara na noqu isulu e sau?”+
31 Ia era kaya vua na nona tisaipeli: “Oni raica vinaka na ilala levu era drigiti kemuni, oni se taroga ga, ‘O cei e tarai au?’”
32 Ia e veiraiyaki tiko ga o koya me raica se o cei e tara nona isulu.
33 E toro yani na yalewa ya, e rere qai sautaninini ni vakila na ka e sa yaco vua, e tekiduru e mata i Jisu qai tukuna vua na ka dina kece.
34 E tukuna vua o Jisu: “Luvequ, sa vakabulai iko na nomu vakabauta. Lako ena vakacegu,+ mo bula mai na kemu mate bibi.”+
35 Ni se vosa tiko, era lako mai eso na tagane mai na nona vale na ivakatawa ni valenilotu ra qai kaya: “Sa mate na luvemu! Cava mo vakaogai qasenivuli tale kina?”+
36 Ni rogoca ya o Jisu, e kaya vua na ivakatawa ni valenilotu: “Kua ni lomaleqa,* mo vakaraitaka ga na vakabauta.”+
37 A sega ni vakatara tale e dua me muri koya, vakavo ga o Pita, Jemesa, kei Joni na taci Jemesa.+
38 Ni ratou yaco i nona vale na ivakatawa ni valenilotu, e raica nira osi+ ra qai veitagicaki tiko.
39 Ni curu yani, e kaya vei ira: “Na cava oni tagicaka tiko? Na cava oni osivaka? E sega ni mate na gone, e moce ga.”+
40 Nira rogoca ya era dredrevaki koya ena veivakalialiai. Ia ni sa vakatalai ira kece i tuba, e qai kauti rau na tamana kei na tinana na gone, kei ratou na nona imuri ina vanua e davo toka kina o gone.
41 E taura na ligana qai kaya vua: “Talica kumi,” e kena ibalebale: “Goneyalewa, au tukuna vei iko, tucake!”+
42 E tucake sara na goneyalewa qai veilakoyaki. (Sa yabaki 12 o koya.) Dua na ka na nodratou marau.
43 E vakaroti ratou matua me ratou kua ni talanoataka na ka e yaco ya,+ me ratou solia vua na goneyalewa e dua na ka me kania.
iVakamacala e ra
^ Se “ibulubulu nanumi.”
^ Se “ena Yasayasa ni Koro e Tini.”
^ Se “sa voleka ni mate.”
^ Se “vosota e levu na ka rarawa.”
^ Se “kua ni rere.”
