Vola o Marika 3:1-35
3 E curu ina dua tale na valenilotu, sa tiko mai kina e dua na tagane e mate* e dua na ligana.+
2 Era vakaraici Jisu matua toka na Farisi se na vakabula na turaga ya ena Siga ni Vakacecegu se sega, mera beitaki koya kina.
3 E kaya o Jisu vua na tagane e mate* na ligana: “Mai tucake mada e loma donu.”
4 E qai kaya vei ira: “Vakacava, e vakatarai ena Siga ni Vakacecegu me caka na ka vinaka se ka ca, na veivakabulai se na veivakamatei?”+ E sega ni dua e vosa.
5 Oti nona vakaraici ira ena levu ni nona rarawataki ira nira sa rui lomaqa,+ mani kaya vua na tagane ya: “Dodoka mai na ligamu.” E dodoka yani, mani vinaka tale na ligana.
6 Nira raica qori na Farisi, era curu i tuba ra lai bosea sara kei ira na ito i Eroti+ mera vakamatei koya.
7 Ia eratou lako vakatikitiki ina baravi o Jisu kei ratou na nona tisaipeli, ra muri koya+ e dua na ilala levu mai Kalili kei Jutia.
8 Era gole tale ga yani vei Jisu e dua na ilala levu mai Jerusalemi kei Itumia kei ira mai na tai ni Joritani, vaka kina o ira mai Taia kei Saitoni, nira rogoca na veika e cakava tiko.
9 E tukuna vei ratou na nona tisaipeli me ratou vakarautaka vua e dua na boto, mera kua kina ni drigiti koya na ilala levu ya.
10 Ni vakabulai ira e le levu, era veidrigidrigi yani o ira kece e tauvi ira na mate lelevu mera tarai koya.+
11 Nira raici koya mada ga na yalo velavela,+ era na cuva vua ra qai kacivaka mai: “O iko na Luve ni Kalou.”+
12 Ia e dau vakaroti ira matua mera kua ni vakatakilai koya.+
13 E cabeta e dua na ulunivanua, e kacivi ira e digia+ ra qai lako yani vua.+
14 E lesia e le 12 qai vakatokai ratou tale ga me ratou “yapositolo,” me ratou tomani koya voli, me talai ratou tale ga me ratou lai vunau,
15 me tu tale ga vei ratou na kaukaua me ratou vakasavi ira na timoni.+
16 Qo o ratou na le 12+ e lesia: o Saimoni, e vakatoka tale ga me o Pita,+
17 o Jemesa na luvei Sepeti kei Joni na taci Jemesa (e vakatokai rau tale ga ena yaca Poanaji, e kena ibalebale “Luve ni Kurukuru”),+
18 o Adriu, o Filipi, o Pacolomiu, o Maciu, o Tomasi kei Jemesa na luvei Alifio, o Cateo, o Saimoni na Gugumatua,
19 kei Jutasa Isikarioti, e qai soli koya yani.
E qai curu ina dua na vale,
20 era tabili tale yani e dua na ilala levu, e lai vakavuna me ratou sega mada ga ni kana.
21 Ni ratou rogoca na wekana, eratou vinakata me ratou lai kauti koya mai, ni ratou kaya: “Sa leqa nona vakasama.”+
22 Era kaya tale ga na vunivola era lako sobu mai Jerusalemi: “E curumi koya o Pielisipupi,* e dau vakasavi ira na timoni ena kaukaua ni nodra iliuliu na timoni.”+
23 E kacivi ira mai qai kaya vei ira ena vosa vakatautauvata: “E rawa vakacava vei Setani me vakasavi Setani?
24 Ke veisei vakataki koya e dua na matanitu, ena sega ni dei na matanitu ya;+
25 ke veisei vakataki koya e dua na vuvale, ena sega ni dei na vuvale ya.
26 Ke vala tale ga vakataki koya o Setani qai veisei, ena sega ni tudei rawa, sa na bale ga.
27 Ena sega ni dua e curuma rawa na vale ni tamata qaqa me kauta na nona iyau vakavo ke vesuki koya mada e liu, sa na qai taura na nona iyau.
28 Au tukuna vakadodonu vei kemuni, e rawa ni vosoti na ka kece ga era cakava na luve ni tamata, se mani cava na nodra ivalavala ca se nodra vosa veibeci.
29 Ia o koya e vosabeca na yalo tabu ena sega sara ga ni vosoti,+ ni okati ya me nona ivalavala ca me tawamudu.”+
30 E tukuna qo o Jisu nira kaya: “E curumi koya na yalo velavela.”+
31 E qai lako mai o tinana kei ratou na tacina,+ ratou tu e tautuba, ratou talatala me lako mai.+
32 Era kaya vua na ilala levu era dabe wavokiti koya tiko: “Raica! E tiko e tuba o tinamu kei ratou na tacimu, eratou vakatarogi iko tiko.”+
33 Ia e qai kaya vei ira: “O cei na tinaqu, o cei o iratou na taciqu?”
34 Ni raici ira na dabe wavokiti koya tiko, e kaya: “Raica, qo ga na tinaqu kei ratou na taciqu!+
35 O koya ga e cakava na loma ni Kalou e taciqu, e ganequ, e tinaqu.”+
