Vola o Marika 14:1-72
-
Nakita lo na bete mera vakamatei Jisu (1, 2)
-
Lumu o Jisu ena waiwai boivinaka (3-9)
-
Soli Jisu o Jutasa (10, 11)
-
iOtioti ni Lakosivia (12-21)
-
Tauyavu na iVakayakavi ni Turaga (22-26)
-
Tukuni ni na ba o Pita (27-31)
-
Masu o Jisu mai Kecisemani (32-42)
-
Vesu o Jisu (43-52)
-
Lewai ena mata ni Sanadrini (53-65)
-
Cakitaki Jisu o Pita (66-72)
14 Se vo e rua na siga+ me vakayacori kina na kanavata ni Lakosivia+ kei na Soqo ni Madrai* Sega ni Vakaleveni.+ Era saga na iliuliu ni bete kei ira na vunivola mera bukia na vere mera vesuki Jisu ra qai vakamatei koya,+
2 nira kaya tiko ga: “Meda kua ni vakayacora ena gauna ni soqo de ra vakatubuca na lewenivanua.”
3 Ni kana tiko mai Pecani o Jisu ena vale i Saimoni na vukavuka, e qai kauta yani e dua na yalewa na tavaya* waiwai boivinaka, e vakaisaluaki ena narita* dina, qai saulevu. E dolava na tavaya qai livia e ulu i Jisu.+
4 Eratou cudruvaka na ka qo eso: “Na cava e vakasabusabutaki kina na waiwai boivinaka qo?
5 E rawa sara ga ni volitaki ena 300 vakacaca na dinari* me qai soli na ilavo vei ira na dravudravua!” Eratou rarawataka* dina na yalewa ya.
6 Ia e kaya o Jisu: “Dou laivi koya. Na cava dou vakalewai koya kina? Sa cakava tiko vei au e dua na cakacaka vinaka.+
7 Era na tiko ga kei kemudou na dravudravua,+ dou rawa ni caka vinaka vei ira ena gauna ga dou vinakata, ia dou na sega ni tiko vata kei au ena veigauna.+
8 E cakava o koya na ka e sa rawata, e lumuta na yagoqu ena waiwai boivinaka me vakarautaki au kina ena noqu bulu.+
9 Au tukuna vakadodonu vei kemudou, ni vunautaki na itukutuku vinaka ena veiyasa i vuravura,+ ena tukuni tale ga kina na ka e vakayacora na yalewa qo me kena ivakananumi.”+
10 E lako vei ira na iliuliu ni bete o Jutasa Isikarioti, e dua vei ratou na Tinikarua na tisaipeli me lai soli Jisu vei ira.+
11 Nira rogoci koya na iliuliu ni bete, dua na ka nodra marau, era mani yalataka mera solia vua na ilavo siliva.+ Sa qai vakasaqara o koya e dua na gauna veiganiti me soli Jisu kina.
12 Ena imatai ni siga ni soqo ni Madrai Sega ni Vakaleveni,+ na gauna e dau cabori kina na isoro ni Lakosivia,+ eratou tarogi koya na nona tisaipeli: “I vei oni vinakata me keitou lai vakarautaka kina na kanavata ni Lakosivia?”+
13 E mani tala e rua nona tisaipeli qai kaya vei rau: “Drau lako ina koro, drau na sota kei na dua na tagane e colata tiko e dua na saqa wai. Drau muri koya,+
14 ia na vale e curu kina, drau taroga na itaukeinivale, ‘E kaya na Qasenivuli: “I vei na rumu ni vulagi meu kania kina na kakana ni Lakosivia kei ratou noqu tisaipeli?”’
15 Ena vakaraitaka vei kemudrau e dua na rumu levu ena tabavale e cake e sa vakaiyaya tu. Drau lai vakarautaka me baleti kedatou.”
16 Rau mani lako yani na tisaipeli, rau curu ina koro, rau raica na ka kece e tukuni vei rau, rau lai vakarautaka sara na veika me baleta na Lakosivia.
17 Ni sa karobo sa qai lako vata yani kei ratou na le Tinikarua.+
18 Ni ratou dabe ratou qai kana tiko ena teveli, e kaya sara o Jisu: “Au tukuna vakadodonu vei kemudou, ena soli au yani e dua vei kemudou na kanavata tiko kei au.”+
19 Eratou rarawa ratou qai tarogi koya yadudua: “O yau?”
20 E kaya vei ratou: “Ena dua vei kemudou na le Tinikarua keirau tonia vata na keirau ena dua na boulu.+
21 Ni sa lako na Luve ni tamata me vaka e volai me baleti koya, ia ena kalouca o koya e solia yani na Luve ni tamata!+ E vinaka cake vua na tamata ya me kua ni sucu mai.”+
22 Ni ratou kana tiko, e taura e dua na madrai, ni masulaka oti, e tikica, solia vei ratou qai kaya: “Dou taura, qo e vakaibalebaletaka na yagoqu.”+
23 E taura tale ga na bilo, ni vakavinavinakataka oti, qai solia vei ratou me ratou gunu kece kina.+
24 E kaya vei ratou: “Qo e vakaibalebaletaka na noqu ‘dra+ ni veiyalayalati,’+ e vakadavei ena vukudra e le levu.+
25 Au tukuna vakadodonu vei kemudou, au na sega tale ni gunuva na vuanivaini me yacova na siga au na gunuva kina na waini vou ena Matanitu ni Kalou.”
26 Ni ratou lagata oti na sere ni vakacaucau, eratou gole sara ina Ulunivanua ni Veiolive.+
27 E qai tukuna vei ratou o Jisu: “Dou na tarabe kece, ni sa volai: ‘Au na yavita na ivakatawa,+ era na qai veiseyaki na qelenisipi.’+
28 Ia niu sa vakaturi, au na liu i Kalili.”+
29 Ia e tukuna vua o Pita: “Ke ratou tarabe kece qo, au na sega ni tarabe.”+
30 E kaya vua o Jisu: “Au tukuna vakadodonu vei iko nikua, io, ena bogi ga nikua ni se bera ni tagi vakarua na toa, o sa na cakitaki au vakatolu.”+
31 E usuraka tiko ga vua o Pita: “Au na sega vakadua ni cakitaki kemuni veitalia sara ke daru mate vata.” Qori tale ga na ka eratou tukuna na kena vo.+
32 E tukuna vei ratou na nona tisaipeli ni ratou yaco yani ina vanua e vakatokai o Kecisemani: “Dou dabe toka i ke meu lai masu mada.”+
33 Ia e kauti Pita, Jemesa, kei Joni.+ E lomaleqa qai rarawa sara ga.
34 E kaya vei ratou: “E vusolo sara ga na lomaqu,+ vaka ga au sa mate. Dou tiko eke, dou yadra tiko.”+
35 Ni toso vakalailai i liu, e tekiduru qai kerea ena masu ke rawa ni lako siviti koya na gauna ya.
36 E tomana: “Apa,* Tamaqu,+ e rawarawa na ka kece vei kemuni, ni kauta tani vei au na bilo qo. Ia me kua ni yaco na lomaqu, me yaco ga na lomamuni.”+
37 Ni lesu mai, e raica ni ratou moce tu. E kaya vei Pita: “Saimoni, o moce? O sega ni rawa ni yadra tiko me dua mada ga na aua?+
38 Dou yadra, dou masu tiko ga mo dou kua ni temaki.+ E gu na yalo, ia e malumalumu na yago.”+
39 E lako tale me lai masu, e cavuta na qaqanimasu vata ga ya.+
40 Ni lesu tale mai, eratou se baci moce tu ni bi na matadratou, ratou sega ni kila na cava me ratou kaya vua.
41 E lesu ena ikatolu ni gauna qai kaya vei ratou: “Qo e sega ni gauna ni moce kei na vakacegu! Sa rauta! Raica! Sa yaco mai na gauna+ me soli yani kina na Luve ni tamata ina ligadra na ivalavala ca.
42 Dou tucake, me datou lako. Raica! Sa voleka mai o koya ena soli au yani.”+
43 Ni se vosa tiko ga sa basika mai o Jutasa, e dua vei ratou na le Tinikarua kei na dua na ilala levu era tauri iseleiwau kei na kau, e talai ira mai na ilala qo o ira na liuliu ni bete, na vunivola, kei ira na qase.+
44 O koya e soli Jisu e sa tukuna oti vei ira e dua na ivakatakilakila, e kaya: “O koya ga au reguca, dou vesuka, o koya sara ga ya, dou yadravi koya vinaka ni dou kauti koya yani.”
45 E lako vakadodonu vei Jisu qai kaya: “Rapai!” E reguci koya sara.
46 Era vesuki Jisu ra qai kauti koya yani.
47 Ia e qai ucuna nona iseleiwau e dua vei ira na tu e kea qai taya na nona dauveiqaravi na bete levu, mani cavuka na daligana.+
48 E qai kaya vei ira o Jisu: “Oni lakova mai e dua na daubutako ena nomuni vakaiseleiwau, oni qai tauri kau moni mai vesuki au?+
49 Au dau tiko vata kei kemuni e veisiga ena valenisoro meu veivakavulici,+ ia oni sega ni vesuki au. E yaco na ka kece qo me vakayacori kina na ka e tukuna na iVolatabu.”+
50 Eratou mani biuti koya kece na tisaipeli, ratou dro.+
51 Ia e muri koya tiko e dua na cauravou e dara tu na isulu lineni matailalai, ra qai via vesuki koya,
52 ia e biuta tu mai na nona isulu lineni qai dro luvawale* yani.
53 Era sa qai kauti Jisu vua na bete levu,+ ra qai soqoni vata yani na iliuliu ni bete, o ira na qase kei ira na vunivola.+
54 E muri koya tiko ga yani vakayawa o Pita me yaco sara ina rara ni vale ni bete levu. E lai dabe vata sara kei ira na dauveiqaravi me vakatakata.+
55 Ena gauna vata qori era vaqara tiko kina na iliuliu ni bete kei ira kece na lewe ni Sanadrini na itukutuku me beitaki kina o Jisu me rawa ni vakamatei, ia era sega ni kunea e dua na ka.+
56 E levu era mai beitaki koya,+ ia e lasu na nodra itukutuku qai veicalati.
57 Eso tale era tucake mera lasutaka eso na ka me baleti koya, nira kaya:
58 “Keimami rogoca ni kaya, ‘Au na talaraka na valenisoro qo a tara ena liga, ia ena loma ni tolu na siga au na tara tale e dua e sega ni caka ena liga.’”+
59 E veicalati tale na nodra itukutuku.
60 Sa qai tucake na bete levu ena kedra maliwa me tarogi Jisu: “O sega ni sauma rawa ya? Na cava o nanuma ena nodra veibeitaki?”+
61 E galu tu ga o koya. E sega sara ga ni tukuna e dua na ka.+ E tarogi koya tale na bete levu: “O iko na Karisito na Luvei koya na Yalosavasava?”
62 E qai kaya o Jisu: “O yau dina qori, oni na raica na Luve ni tamata+ ni dabe toka ena ligaimatau+ i koya e kaukaua sara, ena lako tale ga mai ena o ni lomalagi.”+
63 Ni rogoca ya na bete levu, e dresuka nona isulu balavu e loma qai kaya: “Na ivakadinadina cava tale eda vinakata?+
64 Oni sa rogoca nona veibeci. Na cava nomuni nanuma?” Era sauma kece ni dodonu ga me mate.+
65 Eso era kasiviti koya,+ era tabonaka na matana, era vacuki koya, ra qai kaya: “Parofisai!” Era sabaka na matana na yadra ni mataveilewai ra qai kauti koya.+
66 Ni tiko o Pita ena rara ni vale ni bete levu, e qai lako mai e dua vei ira na yalewa dauveiqaravi ni bete levu.+
67 Ni raici Pita ni vakatakata toka, e vakaraici koya matua qai kaya vua: “O iko tale ga o dau tiko vata kei Jisu qo na kai Nasareci.”
68 Ia e cakitaka ni kaya: “Au sega ni kilai koya, au sega tale ga ni kila na ka o tukuna tiko,” oti e curu i tuba me lai tu e matamata.
69 E raici Pita na yalewa dauveiqaravi qai kaya tale vei ira na tu e kea: “Qo e dua vei ratou.”
70 Se baci cakitaka o Pita. Dede vakalailai, era kaya tale vei Pita na tu e kea: “O dua sara ga vei ratou, ni o kai Kalili.”
71 E bubului qai bolea me totogitaki ke lasu ni kaya: “Au sega ni kila na tamata oni tukuna tiko mai qori!”
72 E tagi sara vakarua na toa.+ E nanuma lesu o Pita na vosa i Jisu: “Ni bera ni tagi vakarua na toa, o sa na cakitaki au vakatolu.”+ E sega ni kinoci koya rawa o Pita ni sa tabalaka na tagi.
iVakamacala e ra
^ Kir., “tavaya alapasita.” Dua na mataqali tavaya e buli mai na vatu e dau kune ena vanua o Alabastron, e Ijipita.
^ Waiwai talei e rairai caka mai na dua na kau boivinaka e dau kune ena veitokaitua na Himalaya.
^ Se “ratou cudru, ratou kudru.”
^ E vosa vakaIperiu se vakaArame, kena ibalebale “I Tamaqu!”
^ Se “sega ni levu na isulu e dara, vo ga nona isulu e loma.”
