Lako Yani 5:1-23
5 Oti e lako yani o Mosese kei Eroni rau tukuna vei Fero: “Qo na ka e kaya o Jiova na Kalou ni Isireli, ‘Laivi ira na noqu tamata mera lai soqo vei au ena vanua talasiga.’”
2 Ia e kaya o Fero: “O cei o Jiova,+ meu talairawarawa ina domona, meu laivi ira kina na Isireli mera lako?+ Au sega sara ga ni kilai Jiova, au na sega tale ga ni laivi ira na Isireli mera lako.”+
3 Ia erau kaya: “E vosa vei keimami na nodra Kalou na Iperiu. Yalovinaka, keimami via lako ena dua na ilakolako siga tolu ina vanua talasiga, me keimami lai vakacaboisoro vei Jiova na neimami Kalou,+ ke sega ena kuitataki keimami o koya ena mate ca se na iseleiwau.”
4 E kaya vei rau na tui Ijipita: “I Mosese kei Eroni, na cava drau kauti ira tani kina na tamata mai na nodra cakacaka? Ni lesu ina nomuni cakacaka!”*+
5 E kaya tale o Fero: “Raica mada na kedra le levu na lewenivanua, drau qai via vakacegui ira mai na nodra cakacaka.”
6 Ena siga tiko ga oya e vakarota o Fero vei ira na iliuliu ni cakacaka kei na nodra ivakatawa ni cakacaka:
7 “Moni kua ni solia tale na tolonicovuata madu vei ira na tamata mera buli biriki kina.+ Laivi ira mera lai kauta mai na nodra tolonicovuata madu.
8 Ia moni lavaka tiko ga vei ira na iwiliwili ni biriki era dau bulia e liu. Kua ni vakalailaitaka vei ira, nira vakasavuliga* tiko. Oya na vuna era tagica tiko kina, ‘Keimami sa via lako, keimami via vakacaboisoro vua na neimami Kalou!’
9 Vakacakacakataki ira vakaukaua mera osooso tu ga, mera kua kina ni galeleta na lasu.”
10 Era mani lako yani na iliuliu ni cakacaka+ kei na nodra ivakatawa ni cakacaka, ra qai kaya vei ira na tamata: “Qo na ka e tukuna o Fero, ‘Au na sega tale ni solia vei kemuni na tolonicovuata madu.
11 Ni lako, ni lai vaqara mai na nomuni tolonicovuata madu ena vanua cava ga oni kunea kina, ia ena sega ni vakalailaitaki na nomuni cakacaka.’”
12 Era mani veiseyaki na tamata ena vanua taucoko o Ijipita mera kauta mai na vunicovuata me tolonicovuata madu.
13 Era kaya tiko ga na iliuliu ni cakacaka voravora: “Ni dui vakaotia na nomuni cakacaka e veisiga, me vaka ga na gauna se tu vakarawarawa kina na tolonicovuata madu.”
14 Era kuitalaki tale ga na nodra ivakatawa ni cakacaka na Isireli era lesi mai vei ira na iliuliu ni cakacaka i Fero.+ Era tarogi ira na ivakatawa ni cakacaka: “Na cava oni sega ni vakaotia kina na iwiliwili ni biriki e lavaki oni a dau cakava e liu? E yaco qori enanoa, nikua tale ga.”
15 Era mani lako yani na nodra ivakatawa ni cakacaka na Isireli, qai vosa kudrukudru vei Fero: “Na cava oni cakava kina va qo vei ira na nomuni dauveiqaravi?
16 E sega ni bau soli vei ira na nomuni dauveiqaravi na tolonicovuata madu, ia era kaya tiko ga vei keimami, ‘Bulia na biriki!’ Era kuitataki na nomuni dauveiqaravi, ia o ira ga na nomuni tamata era cala.”
17 E qai tukuna o koya: “Oni sa rui vakasavuliga,* oni sa rui vakasavuliga!*+ Sa rauta moni kaya tiko, ‘Keimami via lako, keimami via vakacaboisoro vei Jiova.’+
18 Ia qo ni lako, ni lai cakacaka tale! Ena sega ni soli vei kemuni na tolonicovuata madu, ia moni cakava tiko ga na iwiliwili ni biriki e lavaki vei kemuni.”
19 Era qai raica na nodra ivakatawa ni cakacaka na Isireli nira sa leqa sara ga ena vuku ni ivakaro: “Ni kua sara ni vakalailaitaka na iwiliwili ni biriki e lavaki moni rawata e veisiga.”
20 Oti oya era sota sara kei Mosese kei Eroni, ni rau a duri tu e kea me rau tavaki ira nira lesu mai vei Fero.
21 Era tukuna sara vei rau: “Me raici kemudrau o Jiova me qai lewa, ni drau sa vakavuna me cati keimami* o Fero kei ira na nona tamata, drau sa biuta e ligadra na iseleiwau mera vakamatei keimami.”+
22 E golevi Jiova tale o Mosese qai kaya: “Kemuni Jiova, na cava oni vakalolomataki ira kina na tamata qo? Na cava oni talai au mai kina?
23 Mai na gauna au lako kina vei Fero meu vosa ena yacamuni,+ sa qai ca ga vei ira na tamata qo+ o koya, oni qai sega sara ga ni vakabulai ira na nomuni tamata.”+
iVakamacala e ra
^ Se “icolacola.”
^ Se “vucesa.”
^ Se “vucesa.”
^ Se “vucesa.”
^ Se “drau sa vakaboicataki keimami vei Fero kei na nona dauveiqaravi.”
