Lako Yani 23:1-33
23 “Mo kua ni vakatetea* e dua na itukutuku e sega ni dina.+ Kua ni tokona na daucaka ca, ni o dua na ivakadinadina vakatubuca.+
2 Mo kua ni muri ira na ilala levu mo caka ca kina, mo kua tale ga ni vakatanitaka na lewadodonu ni o lai soli vakadinadina mo muri ira kina na ilala levu.*
3 Mo kua ni veitovaki ena nona veileti e dua na dravudravua.+
4 “Ke o donumaka na nona bulumakau tagane na kemu meca se na nona asa ni lako sese voli, mo vakasuka sara vua.+
5 Ke o raica na nona asa e dua e cati iko ni sa davo tu ena ruku ni kena icolacola, mo kua ni vakawelewele ga qai lako sara. Mo vukei koya me vagalalataka mai na manumanu.+
6 “Mo kua ni vakatanitaka na lewa e tau vua na dravudravua ena kemu maliwa ena nona kisi ni veilewai.+
7 “Mo kua sara ni lai okati ena veibeitaki* lasu, kua ni vakamatei koya e sega nona cala kei koya na yalododonu, niu na sega ni vakadonui koya na daucaka ca.*+
8 “Mo kua ni ciqoma na ka ni veivaqumi, ni dau vakamatabokotaki ira na tamata e vinaka tu na nodra rai na ka ni veivaqumi, qai rawa ni vakatanitaka na nodra vosa na tamata yalododonu.+
9 “Moni kua ni vakasaurarataki koya e tiko vulagi. Oni kila vinaka na bula vakavulagi, ni oni a tiko vulagi ena vanua o Ijipita.+
10 “Mo kaburaka na sorenikau ena nomu vanua qai kumuna na vuana me ono na yabaki.+
11 Ia ena ikavitu ni yabaki mo laiva tu me kua ni teivaki, me cuki ga qai biu tu, era na qai kana kina na dravudravua ena kedra maliwa na nomu tamata, ia na ka era vakavoca era na kania na manumanu kila ni vanua. Qori na ka mo cakava ena nomu loganivaini kei na nomu loganiolive.
12 “Ono na siga mo cakava kina na nomu cakacaka, ia mo cegu mai na nomu cakacaka ena ikavitu ni siga, me rawa ni cegu na nomu bulumakau tagane kei na nomu asa, me vakacegu tale ga na luvei nomu yalewa bobula kei koya e tiko vulagi.+
13 “Moni qarauna moni cakava kece na ka au tukuna vei kemuni.+ Moni kua sara ni cavuta na yaca ni kalou tale eso, me kua sara ni rogo ena tebenigusumuni.*+
14 “Vakatolu ena dua na yabaki mo caka soqo kina vei au.+
15 O na vakayacora na Soqo ni Madrai Sega ni Vakaleveni.+ O na kania na madrai sega ni vakaleveni me vitu na siga, me vaka ga noqu ivakaro vei iko, ena kena gauna lokuci ena vula o Epipi,*+ ni qori na gauna o biuti Ijipita mai kina. Me kua ni dua e lako ligalala mai e mataqu.+
16 Mo vakayacora tale ga na Soqo ni Tatamusuki* me baleta na isevu ni nomu cakacaka, mai na ka o kaburaka ena were,+ kei na Soqo ni Kumukumuni* ena icavacava ni yabaki, ni o kumuna mai na were na vua ni nomu cakacaka.+
17 Vakatolu ena dua na yabaki mera rairai na tagane kece ena mata i Jiova na Turaga dina.+
18 “Mo kua ni cabora vata na dra ni noqu isoro kei na dua na ka e vakaleveni. Na uro tale ga e cabori me isoro ena noqu soqo me kua ni vo tu ena bogi taucoko me yacova na mataka.
19 “Mo kauta mai na ka vinaka duadua mai na isevu ni nomu qele ina vale i Jiova na nomu Kalou.+
“Mo kua ni vakasaqara na luve ni me ena wainisucu i tinana.+
20 “Au sa tala yani qo e dua na agilosi me liu vei iko,+ me taqomaki iko ena sala qai kauti iko ina vanua au sa vakarautaka tu.+
21 Moni vakarorogo matua vua qai talairawarawa ina domona. Kua ni vorati koya, ni na sega ni vosota o koya na nomuni cala,+ ni sa tiko vua na yacaqu.
22 Ia ke o qarauna sara mo talairawarawa ina domona o qai cakava na ka kece au tukuna, ena veimecaki kei iko na kemu meca, au na qai vorati koya e vorati iko.
23 Ni na liu tiko vei iko na noqu agilosi ena qai kauti iko vei ira na Amoraiti, na Itaiti, na Perisaiti, na kai Kenani, na Aivaiti, kei na Jepusaiti, au na qai vakawabokotaki ira.+
24 Mo kua ni cuva ina nodra kalou se temaki mo qaravi ira, mo kua ni vakatotomuria na nodra ivalavala.+ Ia mo talaraka sobu qai vorovorolaka na nodra vatu ni sokalou.+
25 Moni qaravi Jiova na nomuni Kalou,+ ena qai vakalougatataka o koya na kemuni madrai kei na memuni wai.+ Au na kauta laivi mai na kemuni maliwa na tauvimate.+
26 O ira na yalewa ena nomu vanua ena sega ni lutudole na luvedra se mera yava,+ au na qai solia vei iko na bula balavu.*
27 “Au na tala me liu vei iko na yalo ni rerevaki au,+ au na qai vakasesea na tamata kece o sotava, au na cakava mera drovaki iko kece na kemu meca nira sa druka.*+
28 Au na tala me liu vei iko na yalo ni taqaya,*+ ena vakasavi ira na Aivaiti, na kai Kenani, kei ira na Itaiti mai matamu.+
29 Au na sega ni vakasavi ira mai matamu ena loma ni dua ga na yabaki, me kua kina ni lala na vanua, ra qai tubu mera le levu sara vei iko na manumanu kila ni vanua.+
30 Ia au na vakasavi ira tiko vakalalai mai matamu, me yacova ni o sa vakawa vakalevu o qai taukena na vanua.+
31 “Au na cakava na iyalayala ni nomuni vanua mai na Wasa Damudamu ina nodra wasawasa na kai Filisitia, mai na vanua talasiga ina Uciwai,*+ niu na soli ira na lewenivanua ina ligamuni, oni na qai vakasavi ira mai matamuni.+
32 Mo kua sara ni veiyalayalati kei ira se na nodra kalou.+
33 Mera kua ni vakaitikotiko ena nomu vanua, de ra vakavuna mo valavala ca vei au. Ke o qarava na nodra kalou, ena dua dina na icori vei iko.”+
iVakamacala e ra
^ Ipe., “kauta cake mai.”
^ Se “ivakadinadina taleitaki.”
^ Ipe., “vosa.”
^ Se “talaca na daucaka ca.”
^ Ipe., “ena gusumuni.”
^ E kilai tale ga me Soqo ni Valetabanikau (Valevakacevaceva).
^ E kilai tale ga me Soqo ni Macawa, se Penitiko.
^ Se “au na vakataucokotaka na iwiliwili ni nomu siga.”
^ Se “au na vakavuna mera vakanadakui iko na kemu meca kece.”
^ Se rawa ni, “tavayaya, domobula.”
^ Oya na Uferetisi.
