iVola Vei Ira mai Kolosa 1:1-29
1 O yau o Paula na yapositolo i Karisito Jisu me vaka na loma ni Kalou, kei Timoci+ na tacida,
2 vei kemuni na yalosavasava kei kemuni na veitacini yalodina oni tisaipeli i Karisito e Kolosa:
Me tiko mada ga kei kemuni na loloma soli wale kei na vakacegu ni Kalou na Tamada.
3 Keitou dau vakavinavinakataka na Kalou, na Tama ni noda Turaga o Jisu Karisito, ni keitou dau masulaki kemuni,
4 ni keitou sa mai rogoca na nomuni vakabauti Karisito Jisu kei na nomuni dau lomani ira na yalosavasava kece
5 ena vuku ni inuinui e maroroi tu mai lomalagi me nomuni.+ Oni a rogoca na inuinui qo ni a tukuni vei kemuni na ka dina me baleta na itukutuku vinaka
6 e yaco yani vei kemuni. E sa tete qai vuavuaivinaka tiko ga e vuravura taucoko na itukutuku vinaka,+ me vaka ga e yaco tiko mai keri, mai na siga oni rogoca qai kila kina na dina ni loloma soli wale ni Kalou.
7 Qori na ka oni vulica vei Epafira,+ e dua na neitou itokani dauveiqaravi. E vakayacora na dauveiqaravi yalodina qo i Karisito na ka e dodonu me keitou cakava vei kemuni,
8 e vakaraitaka tale ga vei keitou na nomuni loloma, na loloma e bucini ena veidusimaki ni yalo ni Kalou.
9 Oya tale ga na vuna me tekivu mai na siga keitou rogoca kina, keitou sega ni cegu ni masulaki kemuni+ kei na neitou kerea moni vakasinaiti ena kilaka dodonu+ me baleta na nona inaki, me soli vei kemuni na vuku dina, moni kila na veika vakayalo,+
10 me rawa ni rakorako vei Jiova* na nomuni itovo, moni vakamarautaki koya vakalevu ena nomuni vua ena cakacaka vinaka kece kei na nomuni vakalevutaka tiko ga na kilaka dodonu me baleta na Kalou,+
11 me vakaukauataki kemuni mada ga na nona kaukaua levu+ moni vosota kina na ka kece ena vosovoso kei na marau,
12 ni oni vakavinavinakataka na Tamada, o koya e vakarautaki kemuni me rawa ni oni vakaivotavota ena ka era taukena na yalosavasava+ era tiko ena rarama.
13 E vakabulai keda mai na lewa ni butobuto+ qai kauti keda ina matanitu i Luvena lomani,
14 ena vukuna eda sereki kina ena ivoli, me rawa ni vosoti na noda ivalavala ca.+
15 O koya na iyaloyalo ni Kalou tawaraici,+ na ulumatua ni kabuli kece,+
16 e vakaitavi o koya ena buli ni ka kece tale eso mai lomalagi kei vuravura, na ka e laurai kei na ka e sega ni laurai,+ se ra idabedabe vakatui se veiliutaki se matanitu se lewa. E vakaitavi ena buli ni veika tale eso,+ era buli tale ga ena vukuna.
17 A bula tale ga ni bera na ka kece tale eso,+ era qai basika na ka kece qori ena vukuna,
18 e ulu ni yago, oya na ivavakoso.+ O koya na itekitekivu, na isevu me vakaturi mai na mate,+ me liu kina o koya ena ka kece,
19 ni raica na Kalou ni vinaka me tu vua na ka kece,+
20 ena vukuna tale ga, ena vakaduavatataki tale kina vua na Kalou na ka kece tale eso+ ni vakarautaka na veiyaloni ena dra+ e vakadavea ena kaunirarawa,* se ra ka e vuravura, se ra ka mai lomalagi.
21 Oni a yawaka tu na Kalou, oni meca, ni oni dau vakasamataka na ka ca.
22 Qo oni sa mai vakaduavatataki tale ena vuku ni yago i koya a solia nona bula me vakamatei, me vakarautaki kemuni kina moni savasava, moni kua ni beitaki e matana+—
23 ia e dodonu moni tu ga ena vakabauta,+ moni dei ena yavu,+ moni kua ni yavalati,+ moni kua ni vakamuai tani mai na inuinui ni itukutuku vinaka oni a rogoca, ni a vunautaki qori vei ira na kabuli kece e ruku i lomalagi.+ O yau o Paula na italatala ni itukutuku vinaka qo.+
24 Au marau tiko ena gauna qo niu vakararawataki ena vukumuni.+ Au vakila tale ga niu se sega ni vakararawataki sara me vaka e dua na tikiniyago i Karisito,+ oya na ivavakoso.+
25 Au dauveiqaravi ni ivavakoso qo me vaka na cakacaka vakadauniyau+ e lesia vei au na Kalou ena vukumuni me vunautaki sara kina vakavinaka na vosa ni Kalou.
26 A vunitaki tu na ka vuni tabu qo+ ena ivakarau ni vuravura sa oti*+ kei na itabatamata era bula e liu. Ia qo sa vakatakilai vei ira na nona yalosavasava,+
27 e marau na Kalou me lesi ira qo me vakatakila ina veimatanitu na lagilagi kei na talei ni ka vuni tabu.+ Qo o Karisito ni duavata kei kemuni, oya ni oni nuitaka moni na vakalagilagi vata.+
28 O koya ga qo eda vunautaka tiko, eda vakasalataki ira tiko kina na tamata kece, eda veivakavulici kina ena iwalewale vakavuku kece, meda vakarautaki ira kece me taucoko nodra veiwekani kei Karisito.+
29 Qo na vuna au cakacaka kina vakaukaua, au qai sasaga me salavata kei na kaukaua e soli vei au.+
iVakamacala e ra
^ Raica na iVakamacala ni Vosa.
^ Se “ena itabagauna sa oti.” Raica na iVakamacala ni Vosa.
