Vola o Joni 4:1-54
4 Ni kila na Turaga nira sa rogoca na Farisi ni levu sara na tisaipeli e papitaisotaka+ o Jisu, lailai o Joni—
2 ia e sega ni veipapitaisotaki o Jisu, era cakava ga na nona tisaipeli—
3 e biuti Jutia sara me lako tale i Kalili.
4 Na sala e muria ena butuki Samaria kina.
5 E yacova yani e dua na koro kei Samaria e vakatokai o Saika, e toka volekata na tikiniqele a solia o Jekope vei Josefa na luvena.+
6 Oya tale ga na vanua e tiko kina na toevu nei Jekope.+ E oca sara ga o Jisu ena ilakolako qo, mani lai dabe toka ena yasa ni toevu.* Rauta toka na ikaono ni aua.*
7 E qai gole yani e dua na yalewa ni Samaria me taki wai. Mani kaya vua o Jisu: “Rawa ni dua na mequ?”
8 (Eratou lai voli kakana ina koro na tisaipeli.)
9 E mani kaya vei Jisu na yalewa ni Samaria: “Na cava oni kere wai kina vei au ni oni Jiu, o yau na yalewa ni Samaria?” (Nira sega ni dau veiyaloni na Jiu kei ira na kai Samaria.)+
10 E kaya vua o Jisu: “Ke o kila na loloma soli wale ni Kalou+ o na kilai koya tale ga e kaya vei iko, ‘Rawa ni dua na mequ?’ Ke o kerea vua, ena qai solia vei iko na wai ni bula.”+
11 E kaya na yalewa: “Kemuni, e sega mada ga na nomuni vokete, qai titobu na toevu. Oni na qai kauta mai vei na wai ni bula oni kaya tiko?
12 Vakacava, oni uasivia na tukai keimami o Jekope, e solia vei keimami na toevu qo, e gunu kina o koya, o ira na luvena, kei na nona manumanu?”
13 E sauma vua o Jisu: “O koya e gunuva na wai qo ena viagunu tale.
14 Ia o koya ena gunuva na wai au na solia ena sega ni viagunu tale,+ na wai au na solia vua ena vaka na waivure e lomana, ena tovure tiko ga me rawati kina na bula tawamudu.”+
15 E kaya na yalewa: “Ni solia mai na wai qori meu kua ni viagunu tale se mai taki wai tale i ke.”
16 E kaya vua o Jisu: “Lako, lai kacivi watimu mai.”
17 E kaya na yalewa: “E sega na watiqu.” E tukuna o Jisu: “E dina na ka o tukuna, ‘E sega na watiqu.’
18 O sa vakawati oti vakalima, na tagane tale ga drau tiko vata qo e sega ni watimu. E dina na ka o tukuna.”
19 E kaya vua na yalewa: “Kemuni, au sa qai kila ni oni parofita.+
20 Era dau sokalou na tukai keimami ena ulunivanua qo, oni kaya ni dodonu ga meda lai sokalou i Jerusalemi.”+
21 E kaya vua o Jisu: “Rogoci au vinaka, sa voleka mai na gauna oni na sega ni qarava na Tamada ena ulunivanua qo se mai Jerusalemi.
22 Oni qaravi koya oni sega ni kila,+ ia keimami qaravi koya keimami kila, ni lako mai vei ira na Jiu na veivakabulai.+
23 Sa roro mai na gauna, sa kena gauna sara ga qo, mera sokalou kina vakayalo vei Tamada o ira era sokalou dina, ena yavutaki tale ga ena dina nodra sokalou, ni o ira sara ga qo e qara o Tamada mera qaravi koya.+
24 E yalo na Kalou,+ o ira na sokalou vua e dodonu mera sokalou vakayalo, mera dina tale ga ena nodra sokalou.”+
25 E kaya na yalewa: “Au kila ni na lako mai na Mesaia, o koya e vakatokai na Karisito. Ni yaco mai o koya ena tukuna vakamatata vei keimami na ka kece.”
26 E kaya vua o Jisu: “O yau sara ga qori, o koya e vosa tiko yani qo.”+
27 Gauna vata ya eratou sa yaco yani na nona tisaipeli, eratou kurabui ni veivosaki tiko kei na dua na yalewa. Ia e sega ni dua e kaya: “Cava oni vinakata?” se “Cava oni vosa tiko kina vua?”
28 E biuta tu mai nona saqa wai na yalewa, e lako sara ina koro qai kaya vei ira na lewenivanua:
29 “Ni mai raica mada e dua na tagane e tukuna vei au na ka kece au dau cakava. Sega ni o koya qo na Karisito?”
30 Era biuta na koro qai lako sara vua.
31 Ia eratou cikevi koya tiko ga na nona tisaipeli, ratou kaya: “Rapai,+ kana mada.”
32 E qai kaya vei ratou: “E tiko na qau kakana meu kania, ia dou sega ni kila.”
33 Eratou mani veitarogitaka na tisaipeli: “E dua e kauta mai na kena?”
34 E kaya vei ratou o Jisu: “Na qau kakana meu cakava na loma i koya e talai au mai,+ meu vakaotia tale ga nona cakacaka.+
35 Vakacava, dou sega ni tukuna ni se vo e va na vula me gauna ni tatamusuki? Raica! Au tukuna vei kemudou: Dou tacake mo dou raica na were, ni sa matua vinaka tu me tamusuki.+
36 O koya e tatamusuki sa taura tiko na kena isau, sa kumuna tale tiko ga na vuata me baleta na bula tawamudu, me rau marau vata kina o koya na daukakaburaki kei koya na dautatamusuki.+
37 E dina kina na ka e dau tukuni, dua e kakaburaki, dua tale e tatamusuki.
38 Au talai kemudou yani mo dou tamusuka na ka dou a sega ni bunoca. Era bunoca eso, dou sa lai marautaka na vua ni nodra buno.”
39 Era mani vakabauti Jisu e levu na kai Samaria ena koro ya nira rogoca na ka e tukuna na yalewa ni kaya: “E tukuna vei au na ka kece au dau cakava.”+
40 Nira yaco yani vei Jisu na kai Samaria, era kerei koya me tiko mada, mani siga rua e kea.
41 Levu tale era mai vakabauta ena vuku ni ka e tukuna,
42 era qai kaya vei yalewa: “Na neimami mai vakabauta qo e sega ni vu mai na ka o tukuna, keimami sa rogoci koya sara ga, keimami kila tale ga ni o koya ga qo na ivakabula kei vuravura.”+
43 Ni sa cava na rua na siga ya, e qai biubiu me lako i Kalili.
44 Ia sa vakadinadinataka o Jisu ni sega ni rokovi na parofita ena nona vanua.+
45 Ni yaco i Kalili, era ciqomi koya na kai Kalili nira raica na ka e cakava mai Jerusalemi ena gauna ni soqo,+ nira a gole tale ga ina soqo.+
46 E lako tale i Kena e Kalili, na vanua a vukica kina na wai me waini.+ E tiko kina e dua na vakailesilesi ni tui e tauvimate na luvena tagane e tiko mai Kapenaumi.
47 Ni rogoca na tagane qo ni a biuti Jutia o Jisu, sa mai tiko e Kalili, e lako sara vua qai kerea me lako sobu mada me lai vakabulai luvena ni sa voleka ni mate.
48 Ia e kaya vua o Jisu: “O kemuni qo oni via raica tiko ga na cakamana kei na ka e veivakurabuitaki, oni na sega vakadua ni vakabauta.”+
49 E kaya vua na vakailesilesi ni tui: “Turaga, ni lako sobu mada mai ni bera ni mate na luvequ.”
50 E mani kaya vua o Jisu: “Lako, sa bula na luvemu.”+ E vakabauta na vosa i Jisu na tagane ya, mani gole yani.
51 Ni se lako sobu tiko ga, era sa mai tavaki koya nona tamata ra qai kaya vua ni sa bula na luvena.
52 Mani tarogi ira se gauna cava e bula vinaka kina. Era kaya vua: “Enanoa ena ikavitu ni aua,* sa qai ruru kina nona katakata.”
53 E kila o tamana ni gauna sara ga ya a kaya kina vua o Jisu: “Sa bula na luvemu.”+ Mani vakabauta o koya kei ratou kece nona lewenivale.
54 Qo na ikarua ni cakamana+ i Jisu ni biuti Jutia me lako i Kalili.
iVakamacala e ra
^ Se “mataniwai, vure.”
^ Rauta na 12 na kaloko ena sigalevu.
^ Rauta na 1 na kaloko ena yakavi.
