Jeremaia 8:1-22
8 “Ena gauna oya,” e kaya o Jiova, “ena kau tani mai na nodra ibulubulu na suidra na tui Juta, na suidra na nodra turaga, na suidra na bete, na suidra na parofita, kei na suidra na lewe i Jerusalemi.
2 Era na veibiuyaka me cilava na matanisiga kei na vula kei na kalokalo kece ni lomalagi era lomana, era qarava, era muria, era qara, era cuva tale ga kina.+ Ena sega ni kumuni se bulu. Ena vaka na maniwa ena delaniqele.”+
3 “Era na digia ga na mate, era na sega ni digia na bula na ivovo ni vuvale ca qo era bula tiko ena vanua kece au vakasavi ira kina,” e kaya o Jiova ni lewe vuqa.*
4 “Mo kaya vei ira, ‘Qo na ka e tukuna o Jiova:
“Era na bale ra qai sega ni tucake tale?
Ke lesu mai e dua, ena lesu tale ga mai na kena ikarua?
5 Na cava era tawayalodina tiko ga kina me sega ni mudu na tamata qo, o ira na lewe i Jerusalemi?
Era veivakaisini tiko ga,Era sega ni via lesu.+
6 Au vakarorogo, au vakatudaliga tiko ga, ia e sega ni donu na ka era tukuna.
E sega ni dua me veivutunitaka na nona ivakarau ca, se taroga, ‘Na cava au cakava?’+
Era dui lesuva na ivakarau era muria tiko ga e levu, me vaka na ose e cici totolo ina ivalu.
7 Na sitoki* mada ga ni lomalagi e kila na kena gauna,*Na kukuru kei na kakabace kei na belo era kila vinaka na gauna mera lesu mai kina.*
Ia o ira na noqu tamata era sega ni kila na lewa i Jiova.”’+
8 ‘Moni kaya vakacava: “Keimami vuku, e tiko vei keimami na lawa* i Jiova”?
Ia na nodra peni* lasu+ na vunivola e vola ga na ka lasulasu.
9 Era madua na vuku.+
Era rere, era tobo.
Raica! Era cata na vosa i Jiova,Ia na vuku cava e tu vei ira?
10 O koya gona au na solia na watidra vei ira na tani,Kei na nodra were mera taukena eso tale,+Nira rawaka vakailawaki na tamata wale me yacovi ira na turaga,+Me tekivu vua na parofita me yacova na bete, era dau veidabui kece.+
11 Era via vakatotolotaka na mavo ni nodra mavoa* na goneyalewa ni noqu tamata, era kaya,“Na vakacegu! Na vakacegu!”
Ni sega na vakacegu.+
12 Era bau maduataka na ka vakasevaki era cakava?
Era sega sara ga ni madua!
Era sega mada ga ni kila na madua!+
O koya gona, era na bale vata kei ira na bale.
Niu totogitaki ira era na tarabe,’+ e kaya o Jiova.
13 ‘Niu soqoni ira, au na vakaoti ira,’ e kaya o Jiova.
‘Ena sega ni vo na vuanivaini ena vunivaini, se na lolo ena vunilolo, ena malai na drauna.
Ia na ka au solia vei ira ena yali vei ira.’”
14 “Na cava eda dabeca tiko eke?
Meda soqoni, meda curu ina koro vakabai vinaka+ meda mate kina.
Ni o Jiova na noda Kalou ena vakamatei keda,E solia vei keda na waigaga meda gunuva,+Nida valavala ca vei Jiova.
15 Eda nuitaka na vakacegu, ia e sega ni yaco na ka vinaka,Na gauna ni veivakabulai, ia eda domobula!+
16 E rogo mai Tani na suru ni nona ose.
Ena domo ni tagi ni nona ose tagane,E yavavala na vanua taucoko.
Era lako yani mera vakarusa na vanua kei na ka kece e tu kina,Na koro kei ira na lewena.”
17 “Ia au tala yani vei kemuni na gata,Na gata poisoni ena sega ni vakamanoataki rawa,Ena katilaki kemuni dina,” e kaya o Jiova.
18 E sega ni oti rawa na noqu rarawa,E tauvimate na lomaqu.
19 E rogo mai na vanua yawa na tagi ni kere veivukeVua na goneyalewa ni kainoqu:
“Sa sega ni tiko mai Saioni o Jiova?
Se sa sega kina na nona tui?”
“Na cava era vakacudrui au kina ena nodra ivakatakarakara ceuti,Kei na nodra kalou tani e sega na betena?”
20 “Sa oti na gauna ni tatamusuki, sa cava na vulaikatakata,Ia eda se sega ni vakabulai!”
21 Au rarawataka na nodra mavoa na goneyalewa ni kainoqu,+Au lomabibi.
Au domobula dina.
22 E sega na waiwai boivinaka mai Kiliati?+
Se sega kina na dauveivakabulai?*+
Na cava e sega ni vakabulai kina mai na kena mate na goneyalewa ni kainoqu?+
iVakamacala e ra
^ Qo na mataivalu vakalomalagi.
^ Dua na manumanuvuka levu yava balavu, e dau vuto.
^ Se “gauna lokuci.”
^ Se “mera lako kina.”
^ Se “ivakavuvuli.”
^ Qo e dua na gasau momoto.
^ Se “ramusu.”
^ Se “vuniwai.”
