Jeremaia 40:1-16
40 E vosa vei Jeremaia o Jiova ni sereki koya oti mai Rama+ o Nipusaretani+ na iliuliu ni yadra. A kauti koya i kea ni vesu ena iqamuniliga ni maliwai ira kece na Juta kei ira e Jerusalemi era vesu mera kau i Papiloni.
2 E qai kauti Jeremaia na iliuliu ni yadra, e kaya vua: “Sa tukuna oti o Jiova na nomu Kalou me yaco na ka ca qo ina vanua qo,
3 e qai vakayacora dina o Jiova na ka e tukuna, ni oni valavala ca vei Jiova oni sega ni muria na nona vosa. Oya na vuna e yacovi kemuni kina na ka qo.+
4 Ia au sereki iko nikua mai na iqamuniliga e vesu tu kina na ligamu. Ke o via lako vata kei au i Papiloni, me daru lako, au na raici iko vinaka. Ke o sega ni via lako vata kei au i Papiloni, kua ni lako. Raica! Sa tu e matamu na vanua taucoko. Mo lako ina vanua o vinakata.”+
5 Ni bera ni lesu o Jeremaia, e kaya vua o Nipusaretani: “Mo lesu vei Kitalaia+ na luvei Eikami+ na luvei Safani+ e lesia o tui Papiloni me lewa na koro kece e Juta, mo tiko vata kei koya kei ira na tamata, se mo lako ena vanua o vinakata.”
E solia sara vua na iliuliu ni yadra eso na kakana kei na iloloma qai tukuna me lako.
6 E mani lako o Jeremaia vei Kitalaia na luvei Eikami e Misipa,+ e tiko vata kei koya kei ira na tamata era vo ena vanua.
7 Era qai rogoca kece na iliuliu ni mataivalu era tiko ena vanua kei na nodra tamata, ni lesi Kitalaia na luvei Eikami o tui Papiloni me lewa na vanua, e lesi koya tale ga me lewai ira na tagane, na yalewa, kei ira na gone vei ira na dravudravua ena vanua era sega ni kau i Papiloni.+
8 Era lako sara vei Kitalaia e Misipa.+ Qo o Isimeli+ na luvei Necanaia, o Joenani+ kei Jonacani o rau na luvei Karea, o Siraia na luvei Tanumeci, o ira na luvei Efei na kai Nitofa, o Jisanaia+ e dua na luvei Meaka, kei na nodra tamata.
9 E bubului vei ira kei na nodra tamata o Kitalaia na luvei Eikami na luvei Safani, e kaya: “Moni kua ni rere ni qaravi ira na Kalitia. Moni tiko ena vanua moni qarava na tui Papiloni, oni na vinaka kina.+
10 O yau au na tiko ga e Misipa meu matataki kemuni vei ira* na Kalitia era lako mai vei keda. Ia o kemuni moni kumuna na waini, na vuata ni vulaikatakata, kei na waiwai, moni biuta ena nomuni saqa, moni tiko ga ena koro oni taura me nomuni.”+
11 O ira kece na Jiu era tiko e Moapi, e Amoni, kei Itomi, kei ira na tiko ena veivanua kece, era rogoca tale ga ni vakavoca eso o tui Papiloni mera tiko e Juta qai lesi Kitalaia na luvei Eikami na luvei Safani me lewai ira.
12 Era mani lesu na Jiu kece mai na veivanua era vakasavi kina, era lako yani ena vanua o Juta vei Kitalaia e Misipa. Era kumuna vakalevu na waini kei na vuata ni vulaikatakata.
13 Ia e lako yani vei Kitalaia e Misipa o Joenani na luvei Karea kei ira kece na iliuliu ni mataivalu era tiko ena vanua.
14 Era kaya vua: “O sega ni kila ni o Pealisi na nodra tui na Amoni+ e talai Isimeli mai na luvei Necanaia me vakamatei iko?”+ Ia e sega ni vakabauti ira o Kitalaia na luvei Eikami.
15 E kaya lo o Joenani na luvei Karea vei Kitalaia e Misipa: “Au via lako meu vakamatei Isimeli na luvei Necanaia, ena sega ni dua e kila. Na cava me vakamatei iko kina, na cava mera vakasavi kina o ira kece na Juta era soqoni mai vei iko, mera rusa tale ga na ivovo ni Juta?”
16 Ia e kaya o Kitalaia+ na luvei Eikami vei Joenani na luvei Karea: “Mo kua ni vakayacora qo, ni lasutaki na ka o tukuna me baleti Isimeli.”
iVakamacala e ra
^ Ipe., “meu duri e matadra.”
