Jeremaia 37:1-21
37 E tekivu veiliutaki sara o Tui Setekaia+ na luvei Josaia me sosomitaki Konaia*+ na luvei Jioiakimi ni lesi koya o Tui Nepukanesa* e Papiloni me tui ena vanua o Juta.+
2 Ia e sega ni rogoca o koya kei ira na nona dauveiqaravi kei ira na lewenivanua na vosa i Jiova e cavuta o Jeremaia na parofita.
3 E mani talatala o Tui Setekaia ni talai Jiukali+ na luvei Selemaia kei Sefanaia+ na luvei Mesea na bete vei Jeremaia na parofita, e kaya: “Yalovinaka, mo masulaki keda mada vei Jiova na noda Kalou.”
4 E veilakoyaki voli ga o Jeremaia vei ira na tamata, nira se sega ni biuti koya e valeniveivesu.+
5 Ia e biuti Ijipita mai na mataivalu nei Fero,+ era rogoca na itukutuku qo na Kalitia era viribaiti Jerusalemi tiko. Era mani biubiu mai Jerusalemi.+
6 E qai vosa o Jiova vei Jeremaia na parofita:
7 “Qo na ka e tukuna o Jiova na Kalou ni Isireli, ‘Qo na ka moni tukuna vei tui Juta, e talai kemuni mai moni tarogi au: “Raica! Na mataivalu i Fero e lako tiko yani me vukei kemuni ena suka tale ina nodra vanua e Ijipita.+
8 Era na lesu yani na Kalitia mera valuta na koro qo mera vakadruka ra qai vakama ena bukawaqa.”+
9 Qo na ka e tukuna o Jiova, “Moni kua ni vakacalai kemuni, moni kaya, ‘Era na lako tani sara ga vei keda na Kalitia,’ nira na sega ni lako tani.
10 Ke oni vakadruka mada ga na mataivalu taucoko ni Kalitia era valuti kemuni tiko me vo ga na nodra tamata era mavoa vakaca, era na duri ga mai na nodra valelaca mera vakama na koro qo ena bukawaqa.”’”+
11 Ni biubiu na mataivalu ni Kalitia mai Jerusalemi ena vukudra na mataivalu i Fero,+
12 e biubiu sara mai Jerusalemi o Jeremaia me lako ina vanua o Penijamini+ me lai taura na nona ivotavota vei ira na kainona.
13 Ia ni yaco yani o koya ena Matamata i Penijamini, e vesuki Jeremaia na parofita na iliuliu ni yadra, na yacana o Irija na luvei Selemaia na luvei Enanaia, e kaya: “O sa to vei ira na Kalitia!”
14 E kaya o Jeremaia: “O lasu! Au sega ni to vei ira na Kalitia.” Ia e sega ni rogoci koya. E mani vesuki Jeremaia o Irija qai kauti koya vei ira na turaga.
15 Era cudruvi Jeremaia o ira na turaga,+ era mokuti koya, era vesuki koya*+ ena vale nei Jionacani na vunivola, e caka me valeniveivesu.
16 E biu o Jeremaia ina qara buto,* ena rumu ena lomaniqele qai tiko e kea me vica vata na siga.
17 E qai talatala o Tui Setekaia me lai kau mai, e vakatarogi koya lo na tui ena nona vale.*+ E taroga o koya, “E dua na ka e tukuna o Jiova?” E kaya o Jeremaia, “E vaka kina!” e tomana, “Oni na soli e liga i tui Papiloni!”+
18 E kaya tale ga o Jeremaia vei Tui Setekaia: “Na cava na noqu cala vei kemuni, kei ira na nomuni dauveiqaravi kei ira na tamata qo moni biuti au kina e valeniveivesu?
19 I vei ga o ira na nomuni parofita era parofisaitaka vei kemuni, ‘Ena sega ni mai valuti kemuni kei na vanua qo o tui Papiloni’?+
20 Ia qo moni rogoca mada noqu turaga na tui. Moni vakadonuya mada na noqu kerekere. Moni kua ni vakasukai au ina vale nei Jionacani+ na vunivola, deu na mate e kea.”+
21 E vakarota sara o Tui Setekaia mera biuti Jeremaia ena Raranivale ni Yadra,+ e soli vua ena veisiga e dua na ibuli madrai mokimokiti mai na nodra gaunisala na dauvavavi,+ me oti mada na madrai ena koro.+ E tiko ga o Jeremaia ena Raranivale ni Yadra.
iVakamacala e ra
^ Kacivi tale ga ena Jioakini kei na Jekonaia.
^ Ipe., “Nepukatiresa,” e dua tale na kena ivolavolai.
^ Ipe., “biuti koya ena valeniveivesu.”
^ Ipe., “na vale e tiko ena qara.”
^ Se “valenitui.”
