Isikeli 6:1-14
6 E vosa tale vei au o Jiova:
2 “O iko na luve ni tamata, mo rai ina veiulunivanua e Isireli mo parofisaitaka kina na ka ca.
3 Mo kaya, ‘O kemuni na veiulunivanua e Isireli, moni rogoca na nona vosa na Turaga Cecere Duadua o Jiova: Qo na ka e kaya na Turaga Cecere Duadua o Jiova ina veiulunivanua, ina veidelana, ina uciwai lalai, kei na buca: “Raica! au na kauta yani vei kemuni na iseleiwau, au na vakarusa na nomuni vanua cecere.
4 Ena vakarusai na nomuni icabocabonisoro, ena vorolaki na nomuni itutu ni ka boivinaka,+ au na kolotaki ira na nomuni era vakamatei e matadra na nomuni matakau vakasisila.*+
5 Au na kolotaka na yagodra mate na Isireli e matadra na nodra matakau vakasisila, au na ceburaka wavoki na suimuni ena nomuni icabocabonisoro.+
6 Ena vanua kece oni vakaitikotiko kina ena rusa na koro,+ ena rusa na nomuni vanua cecere, ena lala.+ Ena basu na nomuni icabocabonisoro, ena vorovorolaki, ena vakarusai na nomuni matakau vakasisila, ena tatalaki na nomuni itutu ni ka boivinaka, ena vakarusai vakadua na nomuni cakacaka.
7 Era na bale ena kemuni maliwa o ira na vakamatei,+ oni na qai kila ni o yau o Jiova.+
8 “‘“Ia au na vakabula eso, ni so vei kemuni ena drovaka na nodra iseleiwau na veimatanitu ena gauna oni vakasavi kina ina veivanua.+
9 Era na nanumi au o ira na dro bula vei kemuni ena veimatanitu era kau vakavesu kina.+ Era na kila ni rarawataka na lomaqu na tawayalodina* ni lomadra e gole tani vei au,+ kei na matadra e garova me muria na nodra matakau vakasisila.+ Era na maduataka era na cata na ka ca kece kei na ka vakasevaki era vakayacora.+
10 Era na qai kila ni o yau o Jiova, ena sega ni ka wale na noqu tukuna meu kauta yani vei ira na ka ca qo.”’+
11 “Qo na ka e kaya na Turaga Cecere Duadua o Jiova: ‘Mo vakasausau e ligamu mo vakabutubutu e yavamu, mo rarawataka na ka ca kece kei na ka vakasevaki era vakayacora na vuvale ni Isireli, nira na bale ena iseleiwau, ena leqa ni kakana, kei na matedewa.+
12 O koya e tiko vakayawa ena mate ena matedewa, o koya e tiko voleka ena bale ena iseleiwau, ia o koya e dro bula mai kina ena mate ena leqa ni kakana; au na qai cudruvi ira vakalevu.+
13 Oni na kila ni o yau o Jiova,+ nira davo maliwai ira na nodra matakau vakasisila o ira na vakamatei, era wavokita na nodra icabocabonisoro+ ena veidelana kece, ena dela ni veiulunivanua kece, ena ruku ni vunikau bulabula kece, ena ruku ni tabanikau lelevu, na vanua era cabora kina na isoro boivinaka mera vakamarautaka na nodra matakau vakasisila kece.+
14 Au na dodoka vei ira na ligaqu, au na vakalala na vanua, ena laladidi sara ga na nodra itikotiko kece ni vakatauvatani kei na vanua talasiga volekati Tipila. Era na qai kila ni o yau o Jiova.’”
iVakamacala e ra
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Se “dukadukali.”
