Isikeli 33:1-33
33 E vosa vei au o Jiova, e kaya:
2 “O iko na luve ni tamata mo vosa vei ira na luvedra na kainomu,+ mo kaya vei ira,
“‘Kaya mada niu kauta yani ena vanua e dua na iseleiwau,+ era kauta na lewenivanua kece oya e dua na tamata ra qai lesia me nodra ivakatawa,
3 e raica sara na iseleiwau ni lako mai ena vanua qai uvuca na davui* me vakasalataki ira na lewenivanua.+
4 Ke dua na tamata e rogoca na rorogo ni davui ia e sega ni muria na ivakaro,+ e lako mai na iseleiwau me vakamatei koya, ena bale ga vua na nona mate.+
5 E rogoca o koya na rorogo ni davui, ia e sega ni muria na ivakaro. Ena bale ga vua na nona mate. Ke muria na ivakaro ena bula kina.
6 “‘Ia ke raica na ivakatawa ni lako mai na iseleiwau qai sega ni uvuca na davui,+ era sega ni vakaroti na lewenivanua. E lako mai na iseleiwau mani vakamatea e dua vei ira, ena mate na tamata oya ena nona cala, ia au na taroga na nona dra vua na ivakatawa.’+
7 “O iko na luve ni tamata, au sa lesi iko mo dua na yadra ena vuvale ni Isireli, ni o rogoca na vosa ni gusuqu, mo tukuna vei ira na noqu ivakaro.+
8 Niu kaya vua na tamata ca, ‘O iko na tamata ca, o na mate sara ga!’+ ia o sega ni vakasalataka na tamata ca me veisautaka na nona itovo, ena mate na tamata ca ena nona cala,+ ia au na taroga vei iko na nona dra.
9 Ke o vakasalataka na tamata ca me veisautaka na nona itovo qai sega ni veisau,+ ena mate ena nona cala, ia o na vakabulai iko.+
10 “O iko na luve ni tamata, mo tukuna vua na vuvale ni Isireli, ‘Oni kaya: “Sa rui levu na noda talaidredre kei na noda ivalavala ca, e vakavuna meda vuca yani,+ eda na qai bula vakacava?”’+
11 Mo tukuna vei ira, ‘“Niu bula dina tiko,” e kaya na Turaga Cecere Duadua o Jiova, “au sega ni vinakata me mate na tamata ca,+ au vinakata ga me veisautaka na nona itovo na tamata ca+ me bula tiko.+ Kemuni na vuvale ni Isireli moni biuta, moni biuta na nomuni itovo ca,+ na cava moni mate kina?”’+
12 “O iko na luve ni tamata, mo kaya vei ira na kainomu, ‘Ena sega ni vakabula na yalododonu na nona cakadodonu ena gauna e talaidredre kina,+ ena sega ni tarabe na tamata ca ena nona caka ca ena gauna e biuta kina na nona ivakarau ca,+ ena sega tale ga ni bula tiko na yalododonu ena nona cakadodonu ena siga e valavala ca kina.+
13 Niu kaya vua na yalododonu: “O na bula tiko ga,” ia e nuitaka ga na nona yalododonu qai cakacala,+ ena sega ni nanumi tale na nona cakadodonu, ena mate ga ena cala e cakava.+
14 “‘Niu kaya vua na tamata ca: “O na mate,” qai vakanadakuya na nona ivalavala ca me cakava na ka dodonu kei na ka vinaka,+
15 e vakasuka na tamata ca na ivakadei ni dinau+ qai sauma na ka e butakoca,+ e muria na lawa ena bula kina ni sega ni cakava na ka ca, ena bula tiko ga.+ Ena sega ni mate o koya.
16 Ena sega ni tarogi* vua na ivalavala ca sa cakava oti.+ Ena bula tiko ni cakava na ka dodonu kei na ka vinaka.’+
17 Ia era kaya na kainomu, ‘E sega ni dodonu na ivalavala i Jiova,’ ni sega ga ni dodonu na nodra ivalavala.
18 “Ni biuta na tamata yalododonu na nona ivalavala dodonu me caka ca, ena mate kina o koya.+
19 Ia ni biuta na tamata ca na nona ivakarau ca me cakava na ka dodonu kei na ka vinaka, ena bula tiko ni cakava qori.+
20 “Ia oni kaya, ‘E sega ni dodonu na ivalavala i Jiova.’+ Kemuni na vuvale ni Isireli, au na lewai kemuni yadua me vaka na nomuni ivalavala.”
21 Ena ika12 ni yabaki, ena ikatini ni vula ena ikalima ni siga ni vula ni keimami vesu tu, e lako mai vei au e dua a dro mai Jerusalemi,+ e kaya: “Sa ravuti na koro!”+
22 Ena yakavi ni bera ni lako mai na tagane e dro, e tarai au na liga i Jiova, e dolava na gusuqu ni bera ni yaco mai na tagane ena mataka. E mani tadola na gusuqu, au sa vosa tale.+
23 E qai vosa vei au o Jiova, e kaya:
24 “O iko na luve ni tamata, era kaya o ira na tawana tiko na vanua rusa qo+ me baleta na vanua o Isireli, ‘O Eparama e le dua ga, e mani taukena na vanua.+ Ia o keda eda lewe levu, sa soli sara ga vei keda na vanua meda taukena.’
25 “O koya gona, mo tukuna vei ira, ‘Qo na ka e kaya na Turaga Cecere Duadua o Jiova: “Oni kania vata tiko na kakana kei na dra,+ oni tacake ina nomuni matakau vakasisila,* oni vakadavedra tiko ga.+ Ia na cava moni taukena kina na vanua?
26 Oni nuitaka na nomuni iseleiwau,+ oni vakayacora na itovo vakasevaki, oni dui vakacacana na watina na kainona.+ Na cava moni taukena kina na vanua?”’+
27 “Qo na ka mo tukuna vei ira, ‘Qo na ka e kaya na Turaga Cecere Duadua o Jiova: “Niu bula dina tiko, era na mate ena iseleiwau o ira na tiko ena irusarusa, au na soli ira na tiko e veikau me kedra na manumanu kila, o ira na tiko ena idrodro kei na qaravatu era na mate nira tauvimate.+
28 Au na vakalala na vanua,+ ena muduki na nona dokadoka, ena lala na veiulunivanua e Isireli,+ ena sega ni dua me lakova.
29 Era na qai kila ni o yau o Jiova, niu vakalala na vanua+ ena ka vakasevaki kece era cakava.”’+
30 “O iko na luve ni tamata, era talanoataki iko tiko na kainomu volekata na lalaga kei na katuba ni vale.+ Era dui veitukuniyaka vei ira na wekadra, ‘Moni lako mai meda rogoca na vosa e tukuna o Jiova.’
31 Era na tabili yani mera dabe e matamu me vakataki ira na noqu tamata, era na rogoca na nomu vosa, era na sega ni muria.+ Era vosa marimari vei iko,* ia e kocokoco na lomadra mera rawaka kina vakailawaki.
32 Raica! Era raici iko me vaka e dua na sere ni dodomo e lagata e dua e domo vinaka, salavata kei na ivakatagi vakawa e qiriti vakamaqosa. Era na rogoca na nomu vosa, era na sega ni muria.
33 Ena gauna e yaco kina na nomu vosa, ena yaco dina, era na qai kila ni tiko vata kei ira e dua na parofita.”+
iVakamacala e ra
^ Ipe., “ileu.”
^ Ipe., “nanumi.”
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Se “vosa veivagarogaroi.”
