Vei Ira na Iperiu 8:1-13
8 O koya gona, qo na tikina bibi e macala: E va sara ga qo na noda bete levu,+ e sa dabe ena ligaimatau ni idabedabe vakaturaga i koya e Cecere mai lomalagi,+
2 e dauveiqaravi* ena tikina tabu,+ e veiqaravi tale ga ena valelaca dina e tara o Jiova,* sega ni tamata.
3 Na bete levu kece e lesi e dau cabora na isolisoli kei na isoro, o koya tale ga qo e dodonu me cabora e dua na ka.+
4 Ke tiko o koya e vuravura ke sega ni bete,+ nira tiko na tagane mera cabora na isolisoli e cavuti ena Lawa.
5 Era vakaitavi tiko na tagane qo ena veiqaravi tabu e ivakatakarakara ga, e vakatayaloyalotaka+ na veika vakalomalagi.+ Me vakataki Mosese ni vakarau tara na valelaca, e vakaroti koya na Kalou: “Mo cakava na ka kece ena kedra icakacaka a vakaraitaki vei iko ena ulunivanua.”+
6 Ia e uasivi sara na veiqaravi e lesi kina o Jisu, e dauveisorovaki+ tale ga ni dua na veiyalayalati e vinaka cake,+ e tauyavutaki vakalawa ena vosa ni yalayala e vinaka cake.+
7 Ke a vinaka vakaoti na imatai ni veiyalayalati, ke sega ni gadrevi na kena ikarua,+
8 ni a raica na nodra cala na lewenivanua ni kaya: “‘Raica! Ena yaco mai na siga,’ e kaya o Jiova,* ‘au na cakava e dua na veiyalayalati vou kei ira na Isireli kei ira tale ga na Juta,
9 ena sega ni vaka na veiyalayalati au cakava kei ira na tukadra ena siga au taura kina na ligadra meu tuberi ira tani mai na vanua o Ijipita,+ nira sega ni dei ena noqu veiyalayalati, au mani muduka na noqu karoni ira,’ e kaya o Jiova.*
10 “‘Qo na veiyalayalati au na veiyalayalati kina kei ira na Isireli ni oti na siga ya,’ e kaya o Jiova.* ‘Au na tugana na noqu lawa ena nodra vakasama, au na vola tale ga e lomadra.+ Au na nodra Kalou, era na noqu tamata.+
11 “‘Era na sega sara ga ni dui vakavulica na kainodra kei na dui tacidra ena nodra kaya: “Mo kilai Jiova!”* Nira na kilai au kece me tekivu vei koya e lailai duadua me yacovi koya e levu duadua vei ira.
12 Niu na vosota na nodra cala, au na sega ni nanuma tale na nodra ivalavala ca.’”+
13 Ena nona cavuta “na veiyalayalati vou” sa vakaotia kina na kena e makawa.+ Ia na kena e sa mai vakaoti sa seavu tiko yani, sa voleka sara ni yali vakadua.+
iVakamacala e ra
^ Se “dauveiqaravi raraba.”
