Esiteri 8:1-17
8 Ena siga oya e solia o Tui Esuerosi vei Ranadi Esiteri na vale nei Emani,+ na kedra meca na Jiu.+ E lako yani vua na tui o Motekai ni tukuna o Esiteri ni rau veiwekani.+
2 E qai luvata na tui na nona mama vakaturaga+ e kauta tani mai vei Emani me solia vei Motekai. E lesi Motekai sara o Esiteri me lewa na vale nei Emani.+
3 E vosa tale vua na tui o Esiteri. E tekicuva i yavana, e tagi qai vakamasuti koya me tarova na ca e vakayacora o Emani na kai Ekaki kei na nona inaki ca me baleti ira na Jiu.+
4 E dodoka na tui na nona ititoko vakatui koula vei Esiteri+ qai duri o Esiteri me lai tu e matana na tui.
5 E kaya sara o koya: “Ke oni taleitaka na tui, ke oni lomani au, ke donu vei kemuni na tui, au vinaka tale ga e matamuni, me volai mada e dua na ivakaro me bokoci kina na ivola ni tamata inaki ca oya, o Emani+ na luvei Emitaca na kai Ekaki,+ e vola me vakarusai ira na Jiu ena yasana kece e nona na tui.
6 Au na vosota rawa vakacava meu raica na ca ena yacovi ira na kainoqu, au na vosota rawa tale ga vakacava meu raica nira vakarusai na wekaqu?”
7 E kaya sara o Tui Esuerosi vei Ranadi Esiteri kei Motekai na Jiu: “Raica! Au sa solia vei Esiteri na vale nei Emani,+ au sa vakarota me vakaliligi o koya ena kau+ ni nakita me vakamatei* ira na Jiu.
8 Mo drau volavola mada ena yaca ni tui ena vukudra na Jiu me vaka na ka e vinaka vei kemudrau, mo drau dregata ena mama vakaturaga, ni na sega tu ga ni bokoci na lawa e volai ena yaca ni tui qai dregati ena mama vakaturaga.”+
9 Era qai kacivi mai ena gauna oya na nona vunivola na tui ena ikatolu ni vula, oya na vula o Saivani* ena ika23 ni siga, era vola sara na ka kece e vakaroti* ira kina na Jiu o Motekai, vei ira na vakailesilesi liu+ ni yasana, vei ira na kovana, kei ira na turaga ni yasana+ mai Idia me yaco sara i Iciopea, e 127 na yasana, ina dui yasana ena kena ivolavolai, vei ira na lewenivanua ena nodra dui vosa kei ira na Jiu ena nodra matanivola kei na nodra vosa.
10 E volavola o koya ena yaca i Tui Esuerosi, e dregata sara ena mama vakaturaga+ qai vakauta na ivola e ligadra na daukau ivola nira vodo ose, era vodoka na ose totolo e susugi me vakayagataki ena valenitui.
11 E vakadonuya na tui ena ivola qori mera soqoni na Jiu ena veikoro kece mera taqomaka nodra bula, ia mera vakawabokotaka, mera vakamatea, mera vakarusa na nodra mataivalu kece na lewenivanua se yasana e via vakamatei ira, wili kina o ira na yalewa kei ira na lalai, mera taura na nodra iyau.+
12 Me vakayacori qori ena dua ga na siga ena yasana kece e nona o Tui Esuerosi, ena ika13 ni siga ena ika12 ni vula, oya na vula o Eta.*+
13 Na lewe* ni ivola ena veisoliyaki me lawa ena veiyasana taucoko. Me tukuni vei ira kece na lewe ni veivanua mera vakarautaki ira na Jiu ena siga oya mera sauma na ka era cakava na kedra meca.+
14 Ena ivakaro ni tui, era vakusakusa ra qai vakatotolo na daukau ivola nira vodoka na ose dau vakayagataki ena valenitui. E soli tale ga na lawa mai Susani*+ na vanua viribaiti.*
15 Ia o Motekai, e biubiu e matana na tui ni dara na isulu vakatui karakarawa vulavula, e tokara e dua na isalanitui koula levu, e ovi toka ena dua na isulu lineni matailalai vutivutia qai lokaloka.+ Era kaila ena marau na lewenikoro o Susani.*
16 Era vakacegu* na Jiu, era marau, era reki, era rokovi.
17 Era marau tiko na Jiu era reki, era kanavata era soqo ena yasana kece kei na koro kece e yacova yani na ivakaro ni tui kei na nona lawa. Levu na lewe ni veivanua era tukuna nira sa Jiu+ nira rerevaki ira na Jiu.
iVakamacala e ra
^ Ipe., “ni dodoka na ligana me mokuti.”
^ Se rawa ni, “baleti.”
^ Se “ilavelave.”
^ Se “Susa.”
^ Se “valenitui, koronivalu.”
^ Se “Susa.”
^ Ipe., “rarama.”
