Emosi 7:1-17
7 Qo na ka e vakaraitaka vei au na Turaga Cecere Duadua o Jiova: Raica! E tala yani e dua na qele ni vodre ni sa tubu na iotioti ni itei.* Qo na iotioti ni itei ni musu oti na nona co na tui.
2 Ni kania oti na qele ni vodre na co ni vanua, au kaya: “Kemuni na Turaga Cecere Duadua Jiova, au kerea moni vosoti ira!+ Ena bula* rawa vakacava o Jekope? Ni malumalumu o koya!”+
3 E mani vakasamataka tale* qo o Jiova.+ “Ena sega ni yaco,” e kaya o Jiova.
4 Qo na ka e vakaraitaka vei au na Turaga Cecere Duadua o Jiova: Raica! Na Turaga Cecere Duadua o Jiova e vakatauitotogi ena bukawaqa. E yameca na wai titobu, e yameca e dua na tikinivanua.
5 Au qai kaya: “Kemuni na Turaga Cecere Duadua Jiova, au kerea moni wawa mada.+ Ena bula* rawa vakacava o Jekope? Ni malumalumu o koya!”+
6 E mani vakasamataka tale* qo o Jiova.+ “Qori tale ga ena sega ni yaco,” e kaya na Turaga Cecere Duadua o Jiova.
7 Qo na ka e vakaraitaka vei au o koya: Raica! E tucake tu o Jiova ena delanibai e vakarautaki ena ivakarau vatu, e toka e ligana e dua na ivakarau vatu.
8 E qai kaya vei au o Jiova: “Na cava o raica Emosi?” Au mani kaya: “E dua na ivakarau vatu.” E kaya tale o Jiova: “Au sa biuta e dua na ivakarau vatu ena kedra maliwa na noqu tamata na Isireli. Au na sega ni vosoti ira tale.+
9 Ena lala na vanua cecere nei Aisake,+ ena rusa na vanua tabu nei Isireli,+ au na valuta na vuvale nei Jerepoami* ena iseleiwau.”+
10 E vakauta na itukutuku qo o Emasia na bete e Peceli+ vei Tui Jerepoami+ e Isireli: “E bukia na kemu vere o Emosi ena kemuni maliwa na vuvale ni Isireli.+ Sa sega ni vosota rawa na vanua na vosa kece e tukuna tiko.+
11 Qo na ka e tukuna o Emosi, ‘Ena mate o Jerepoami ena iseleiwau, ena kau vakavesu dina o Isireli mai na nona vanua.’”+
12 E qai kaya o Emasia vei Emosi: “O iko na dauraivotu, lako, dro sara ina vanua o Juta mo rawata kina na kemu madrai,* mo parofisai e kea.+
13 Ia mo kua tale ni parofisai e Peceli,+ ni nona vanua tabu na tui,+ e tiko kina na vale ni matanitu.”
14 E qai tukuna o Emosi vei Emasia: “Au sega ni parofita se luve ni parofita, au ivakatawa ga ni sipi,+ au dau qarava na vunilolo.*
15 Ia e kauti au tani mai o Jiova meu kua ni muria na qelenisipi, e tukuna vei au o Jiova, ‘Lako, mo parofisai vei ira na noqu tamata na Isireli.’+
16 Mo rogoca mada na vosa i Jiova: ‘O kaya tiko, “Mo kua ni parofisaitaka na ca vei Isireli,+ mo kua ni vunautaka+ na ka ca ena vuvale nei Aisake.”
17 O koya gona qo na ka e tukuna o Jiova: “Na watimu ena saqamua ena koro, era na bale ena iseleiwau na luvemu tagane kei na luvemu yalewa. Ena votai na nomu qele ena wa ni vakarau, ia o iko o na mate ena vanua tawasavasava, ena kau vakavesu dina o Isireli mai na nona vanua.”’”+
iVakamacala e ra
^ Oya ena Janueri kei na Feperueri.
^ Ipe., “tucake.”
^ Se “mani rarawataka.”
^ Ipe., “tucake.”
^ Se “mani rarawataka.”
^ Oya o Jerepoami na iKarua, na luvei Joasa (Joasi). Raica na Emosi 1:1.
^ Ipe., “mo kania kina na kemu madrai.”
^ Se “daucula vua ni lolo.”
