Aisea 14:1-32
14 Ni na lomani ira na Jekope+ o Jiova, ena digitaki ira tale na Isireli.+ Ena vakatikori ira*+ ena nodra vanua, era na tovata kei ira na vulagi ra qai kabita na vuvale i Jekope.+
2 O ira na lewe ni veivanua era na tauri ira qai kauti ira ina nodra vanua, ena taukeni ira na vuvale ni Isireli me nodra tagane kei na yalewa dauveiqaravi+ ena vanua i Jiova, era na vesuki ira na vakabobulataki ira tu, era na lewai ira tale ga na dau vakasaurarataki ira mera cakacaka.*
3 Ena siga oya ena vakacegui iko o Jiova mai na nomu rarawa, mai na nomu rere, kei na nomu vakatotogani mo bobula,+
4 o na tukuna na ibole qo vua na tui Papiloni:
“Sa qai cegu na nona veivakasaurarataki!
Sa cegu na veivakatotogani!+
5 Sa musuka o Jiova na nodra kau na ivalavala ca,Na nodra ititoko na iliuliu,+
6 O koya e mokuti ira na lewe ni veivanua ena cudru ni kuitalaki ira tiko ga,+O koya e vakadrukai ira tiko na veimatanitu ena veivakararawataki e sega ni cegu.+
7 Sa vakacegu na vuravura taucoko, e sega ni sosa.
Era kaila ena reki na lewenivanua.+
8 Era marautaki iko mada ga na vunijunipa,Kei na sitari ni Lepanoni.
Era kaya, ‘Ena gauna o bale kina,E sega ni lako cake mai e dua na dautakau me talaki keimami.’
9 E yavala mada ga na iBulubulu* e toka e raMe tavaki iko ni o lako mai.
Ena vukumu e vakayadrati ira kina na mate,O ira kece na iliuliu voravora e vuravura.*
E vakaduri ira na tui kece ni veimatanitu mai na nodra idabedabe vakaturaga.
10 Era vosa kece mai, era kaya vei iko,‘O sa malumalumu tale ga me vakataki keimami?
O sa tautauvata kei keimami?
11 Sa biu sobu ina iBulubulu* na ka o divi kina,Na domo ni nomu ivakatagi vakawa.+
E tevu e rukumu na ulo me nomu loga,Kei na baca me kemu iubi.’
12 O sa lutu mai lomalagi,O iko na kalokalo ramase, na luve ni rarama ni mataka!
O sa vakabalei sobu ina qele,O iko o vakadrukai ira na veimatanitu!+
13 O kaya e lomamu, ‘Au na lako cake i lomalagi.+
Au na laveta cake na noqu idabedabe vakaturaga+ me sivita na kalokalo ni KalouAu na dabe ena ulunivanua ni soqoniEna vanua yawa sara ena vualiku.+
14 Au na lako cake meu sivita na vanua cecere ena o,Au na cakava meu tautauvata kei koya e Cecere Duadua.’
15 Ia o na biu sobu ina iBulubulu,*Ena vanua titobu ena qara.
16 O ira na raici iko era na wadravi iko,Era na dikevi iko vinaka, era kaya,‘Qo ga o koya e yavalata na vuravura,E vakavuna mera sautaninini na veimatanitu,+
17 E vukica na vuravura me vanua talasiga,E vakarusa na kena koro,+E sega ni sereki ira na nona kaivesu mera lesu i nodra vanua?’+
18 O ira kece na vo ni tui ni veimatanitu,Io o ira kece, era davo ena lagilagi,O ira yadua ena nodra ibulubulu.*
19 Ia o na biu tani ni sega na nomu ibulubulu,Me vaka na tabanikau e vakasisilataki,O ubi ena yago mate era lausua ena iseleiwau,O koya e lako sobu ena qara veivatu,Me vaka na yago mate e buturaki sobu.
20 O na sega ni tomani ira ena ibulubulu,Ni o vakarusa ga na nomu vanua,O vakamatei ira ga na nomu tamata.
Ena sega ni nanumi tale na yacadra na nodra kawa na tamata ca.
21 Moni vakarautaka na vanua mera vakamatei kina na luvena taganeEna vuku ni cala nei tukadraMera kua ni tucake mera lewa na vanuaQai robota na vanua na nodra koro.”
22 “Au na valuti ira,”+ e kaya o Jiova ni lewe vuqa.*
“Au na muduka tani e Papiloni na yacadra, na kena vo, na luvedra, kei na nodra kawa,”+ e kaya o Jiova.
23 “Au na cakava mera tiko kina na pokipaini, me vanua lolobo, au na qai taviraki koya ena itaviraki ni veivakarusai,”+ e kaya o Jiova ni lewe vuqa.
24 E bubului o Jiova ni lewe vuqa:
“Me vaka ga au nakita, ena yaco vaka kina,Me vaka ga au lewa ena yaco dina.
25 Au na butuqaqia na kai Asiria ena noqu vanua,Au na butuki koya ena noqu veiulunivanua.+
Ena kau tani vei ira na nona ivua,Kei na nona icolacola ena kau tani mai tabadra.”+
26 Qo na ka sa lewai me baleti vuravura taucoko,Qo na liga e dodo tu vei* ira kece na veimatanitu.
27 Ni sa lewa o Jiova ni lewe vuqa,O cei me vakaseva?+
E dodoka tu na ligana,O cei me vakasuka?+
28 Ena yabaki e mate kina o Tui Easi,+ e vakarogoi sara na itukutuku qo:
29 “Me kua ni dua vei kemuni e Filisitia me marauNi sa ramusu na nona ititoko o koya e mokuti iko tiko.
Ni na basika mai na waka ni gata+ na gata poisoni,+Na luvena na gata vuka e bukawaqa.*
30 Ni kana na nodra ulumatua na vakalolomaNira davo ena nuidei na dravudravuaAu na vakamatea na wakamu ena dausigaEna vakamatei tale ga na ka e vo vei iko.+
31 Mo qoqolou na matamata! Mo kaikaila na koro!
Oni na yalolailai kece na Filisitia!
Ni lako mai na vualiku na kubouEna sega ni dua e vakaberabera ena nona iyatu.”
32 Na cava me tukuni vei ira na italai ni veimatanitu?
Sa vakadavora o Jiova na yavu e Saioni,+Era na lai vakaruru kina na nona tamata vakaloloma.
iVakamacala e ra
^ Se “Ena vakacegui ira.”
^ Se “na nodra iliuliu ni cakacaka.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Ipe., “me tagane.”
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Se “Seoli,” oya na ibulubulu ni kawatamata. Raica na iVakamacala ni Vosa.
^ Ipe., “vale.”
^ Qo na mataivalu vakalomalagi.
^ Se “e vakarau mokuti.”
^ Se “na gata poisoni dau coka.”
