iMatai ni Samuela 8:1-22
8 Ni sa qase o Samuela e lesi rau sara na luvena tagane me rau turaganilewa e Isireli.
2 Na yaca ni nona ulumatua o Joeli kei na yaca ni kena ikarua o Apaija,+ erau turaganilewa e Pieri-sepa.
3 Ia erau sega ni muria na luvena tagane na nona ivalavala, rau guta ga na tubu e rawati ena ilawaki,+ rau taura na ivaqumi,+ rau vakatanitaka tale ga na lewadodonu.+
4 Era qai kumuni vata kece na qase ni Isireli mera lako i Rama vei Samuela.
5 Era kaya vua: “Raica! O sa qase mai, ia erau sega ni muria na luvemu na nomu ivalavala. Mo lesia vei keimami e dua na tui me lewai keimami me vakataki ira na veimatanitu kece.”+
6 Ia e sega ni taleitaka* o Samuela nira kaya: “Solia vei keimami e dua na tui me lewai keimami.” E masu sara vei Jiova o Samuela,
7 qai kaya vei Samuela o Jiova: “Mo rogoca na ka kece era tukuna vei iko na tamata, nira sega ni beci iko, era beci au ga nira cata meu nodra tui.+
8 Era cakava tiko na ka era cakava ena siga au kauti ira kina mai Ijipita me yacova mai na siga qo, era biuti au tiko ga+ mera qarava na kalou tani,+ qori tale ga na ka era cakava tiko vei iko.
9 Mo rogoci ira. Ia mo vunauci ira vakadodonu, mo tukuna vei ira na ka e namaka vei ira na tui ena liutaki ira.”
10 E mani kaya o Samuela na vosa kece i Jiova vei ira na tamata era kerea tiko vua e dua na tui.
11 E qai kaya: “Qo na ka e namaka vei kemuni na tui ena liutaki kemuni:+ Ena kauti ira na luvemuni tagane+ me biuti ira ena nona qiqi+ mera nona tamata dauvodo ose,+ eso tale era na cici mera liutaka na nona qiqi.
12 Ena lesia eso me nodra turaga na vica vata na udolu+ kei na nodra turaga na le limasagavulu,+ eso mera cukicuki,+ mera tatamusuki,+ mera cakava na nona iyaragi ni ivalu kei na iyaya ni nona qiqi.+
13 Ena kauti ira na luvemuni yalewa mera dau caka waiwai,* mera dauvakasaqa, mera dauvavavi.+
14 Ena taura o koya na kena e vinaka duadua ena nomuni were, ena nomuni loganivaini kei na nomuni veiolive,+ ena solia vei ira na nona tamata.
15 Ena taura e dua na ikatini ni nomuni loganicovuata kei na nomuni loganivaini, ena solia vei ira na nona vakailesilesi kei ira na nona tamata.
16 Ena kauti ira na nomuni tagane kei na yalewa dauveiqaravi, na nomuni qelenimanumanu vinaka duadua kei na nomuni asa, ena vakayagataka ena nona cakacaka.+
17 Ena taura na ikatini ni nomuni qelenisipi,+ oni na nona tamata.
18 Ena yaco mai na siga oni na tagi kina ena vuku ni tui oni digitaka me nomuni,+ ena sega ni rogoci kemuni o Jiova ena siga oya.”
19 Ia era sega ni rogoca na tamata na ka e tukuna vei ira o Samuela, era kaya: “Sega, keimami lewa me dua ga na neimami tui me lewai keimami.
20 Keimami na vakataki ira na veimatanitu kece, ena lewai keimami na neimami tui, ena liutaki keimami me vala ena vukui keimami.”
21 Ni rogoca oti o Samuela na ka kece era tukuna na tamata, e tukuna tale me rogoca o Jiova.
22 E kaya vei Samuela o Jiova: “Mo rogoci ira, mo lesia e dua na tui me lewai ira.”+ E kaya sara o Samuela vei ira na Isireli: “Moni dui lesu ina nomuni koro.”
