E dua tiko na luvena yalewa o Jesepeli, na yacana o Acalaia. E ucui tinana ena nona itovo ca. A vakawati kei na tui Juta. Ni mate o watina e qai veiliutaki na luvena tagane. Ia ni mate o luvena, e buli koya ga o Acalaia me veiliutaki. A saga me vakamatei ira kece na kawa vakatui, wili kina o ira na makubuna tagane. Era rerevaki koya kece na lewenivanua.

E kila o Jioiata na Bete Levu kei Jiosepa na watina na itovo ca nei Acalaia. Rau bolemate me rau vunitaka e dua na makubuna. Na yaca ni gone qo o Joasi. Rau susugi koya ga ena valenisoro.

Ni sa yabaki vitu o Joasi, e kacivi ira kece na turaga kei ira na Livai o Jioiata qai tukuna vei ira: ‘Ni yadrava na katuba ni valenisoro, me kua ni dua e curu mai loma.’ E buli Joasi sara me tui Juta, e biuta tale ga e uluna na isalanitui. Era kailavaka na lewe i Juta: ‘Me bula balavu na tui!’

E rogoca o Ranadi Acalaia nodra kaila na ilala levu, e lako totolo sara ina valenisoro. Ni raica na tui vou, e kailavaka: “Na vere! Na vere!” Era vesuki Acalaia na turaga, ra kauti koya vakatikitiki, ra qai vakamatei koya. Ia vakacava na veika ca e uqeta e Juta?

E vukei ira na lewe i Juta o Jioiata mera yalataka vei Jiova nira na sokaloutaki koya duadua ga. E vakaroti ira o Jioiata mera basuka na valenisoro i Peali, mera vorovorolaka tale ga na matakau. E lesi ira na bete kei ira na Livai mera  veiqaravi ena valenisoro, me tomani tale kina na sokalou. E lesi ira na ivakatawa ni matamata mera yadrava na valenisoro mera kua ni curu kina o ira na sega ni savasava. Oti e kauti Joasi o Jioiata kei ira na turaga ina valenitui ra qai vakadaberi koya ena idabedabe vakaturaga. Era marau vakalevu na lewe i Juta nira qaravi Jiova tale ena galala. Sa mate o Acalaia, sa sega tale ga na sokalou vei Peali. E veiuqeti dina na yaloqaqa i Jioiata.