Era yaco e Ulu i Saineai na Isireli ni oti e rauta ni rua na vula nodra biuti Ijipita, era mani keba volekata. E kacivi Mosese ina ulunivanua o Jiova, e kaya vua: ‘Au a vakabulai ira na Isireli. Ke ra talairawarawa vei au ra qai muria noqu lawa, era na noqu tamata digitaki.’ E lesu o Mosese vei ira na Isireli, e tukuna vei ira na vosa e cavuta o Jiova. Na cava era qai tukuna? Era kaya: ‘Keimami na cakava na ka kece e tukuna vei keimami o Jiova.’

Ni lesu ina ulunivanua o Mosese, e kaya vua o Jiova: ‘Au na vosa vei iko ni oti e tolu na siga. Vakasalataki ira na Isireli me kua ni dua e lako cake mai e Ulu i Saineai.’ E lesu vei ira na Isireli o Mosese, e tukuna mera vakavakarau mera rogoci Jiova.

Ena ikatolu ni siga, era raica na Isireli ni veitibiyaki na liva, e kumuni tale ga na o vavaku ena ulunivanua. E vadugu na kurukuru, e rogo levu na davui. E qai lako sobu mai na ulunivanua o Jiova ena bukawaqa. Era sautaninini na Isireli ena levu ni nodra rere. E sakure vakalevu na ulunivanua taucoko qai kubou. E rogo levu tiko ga na davui. E qai kaya na Kalou: ‘O yau o Jiova. Moni kua ni qarava e dua tale na kalou.’

Ni lesu o Mosese ina ulunivanua, e tukuna vua o Jiova na lawa me baleta nodra itovo kei na nodra qaravi koya. E vola kece qori o Mosese qai wilika vei ira na Isireli. Era yalataka: ‘Keimami na cakava na ka kece e tukuna vei keimami o Jiova.’ Io, era yalayala vua na Kalou, vakacava era na dina kina?