WASE 6
Bula ga e le Walu
E vodo i waqa o Noa, ratou nona vuvale, kei na manumanu. Ni sogota o Jiova na katuba, e tau sara na uca. E tekivu ciri na waqa ena levu ni uca qai luvu na vuravura taucoko. Era mate kece na tamata ca, ia eratou taqomaki na vuvale i Noa. Dua na ka nodratou marau ni ratou talairawarawa vei Jiova.
A tau tiko na uca me 40 na siga, 40 na bogi. Sa qai siga na uca, lutu vakamalua na wai, kasa sara na waqa ena ulunivanua. Ia se sega ni mamaca vinaka na vanua, ratou mani tiko ga e waqa o Noa kei na nona vuvale.
E mamaca na vanua ni toso na gauna. Ratou vodo tiko e waqa o Noa kei na nona vuvale me sivia e dua na yabaki. Sa qai tukuna o Jiova me ratou sobu. Eratou marautaka dina nona veivakabulai. Ratou mani vakacaboisoro me ratou vakavinavinakataki koya.
E taleitaka o Jiova na isoro qori. E yalataka ni na sega ni luvuca tale na vuravura me rusa kina na kabula kece. E qai cakava na imatai ni drodrolagi me ivakatakilakila ni nona yalayala. O sa bau raica na drodrolagi?
E kaya tale ga o Jiova vei Noa kei na nona vuvale me ratou vakaluveni, me ratou vakatawai vuravura.
“E vodo . . . i waqa o Noa, era sega ni bau kauai [na tamata] me yacova ni tekivu na waluvu qai kuitaki ira kece.”—Maciu 24:38, 39
Rawa ni o Wilika Tale ga
VAKADAMURIMURIA NODRA VAKABAUTA
Noa—E ‘Dau Lako Vata kei na Kalou Dina’
Na dredre cava e sotava o Noa kei na watina ni susugi luvedrau? E laurai vakacava vei ratou na vakabauta ni ratou tara na waqa?
YACA ENA IVOLATABU
Qito Vakaivolatabu me Baleti Noa
O kila na yacadratou na luvena tagane o Noa? Vulica eso tale na ka me baleti Noa kei na nona vuvale.
