iKau
‘Moni vakadamurimuri ira era taukena na vosa ni yalayala ni Kalou ena vuku ni nodra vakabauta kei na yalovosota.’—IPERIU 6:12.
1, 2. E raici ira vakacava na talanoataki tu ena iVolatabu e dua na ivakatawa dauveilakoyaki, na cava era itokani vinaka kina?
NI VUNAU oti e dua na ivakatawa dauveilakoyaki e sa dua na itaba, e kaya sara e dua na marama lotu vaKarisito; “E vakamacalataki ira na tamata ena iVolatabu me vaka ga era nona itokani makawa.” Dina taucoko, ni sa vakayabaki nona vulica vagumatua na tacida qo na Vosa ni Kalou, qai dau veivakavulici tale ga kina—ni vakamacalataki ira gona, e vaka sara ga era veitokani tu mai vakabalavu.
2 Vakacava, eda na marautaka meda veitokani kei ira era talanoataki tu ena iVolatabu? O vakabauta nira bula dina? Vakasamataka mada nida taubale, veitalanoa qai veimaliwai kei ira na tagane kei na yalewa vakataki Noa, Eparama, Ruci, Ilaija, kei Esiteri meda kilai ira vinaka sara. Sa na wacava na nomu vakayaloqaqataki ena nodra ivakasala momona kei na vosa veiuqeti!—Wilika Vosa Vakaibalebale 13:20.
3. (a) Ena yaga vakacava vei keda nida vulica nodra vakabauta na tagane kei na yalewa era talanoataki ena iVolatabu? (b) Na taro cava eda na veivosakitaka?
3 Dina sara, nira “na vakaturi . . . na yalododonu,” ena qai marautaki dina na veitokani qori. (Caka. 24:15) Ena gauna mada ga qo, eda vuli vakalevu vei ira na tagane kei na yalewa vakabauta era talanoataki tu ena iVolatabu. Ena sala cava? E tukuna na yapositolo o Paula na ka meda cakava: ‘Moni vakadamurimuri ira era taukena na vosa ni yalayala ni Kalou ena vuku ni nodra vakabauta kei na yalovosota.’ (Iper. 6:12) Ni tekivu noda vulici ira na tagane kei na yalewa vakabauta, meda veivosakitaka mada na taro e vakavotui ena veika e kaya o Paula: Na cava na vakabauta, na cava e bibi kina vei keda? Eda na vakadamurimuri ira vakacava na yalodina ena gauna makawa?
Na Vakabauta—Vuna e Bibi Kina Vei Keda
4. Na cava era nanuma na tamata me baleta na vakabauta, na cava e cala kina na nodra nanuma?
4 Na vakabauta e dua na itovo talei qai dokai era vakamareqeta kece na tagane kei na yalewa eda na vulica ena ivola qo. E levu nikua era sega ni kila na ibalebale ni vakabauta, era nanuma ni sega ni gadrevi na kena ivakadinadina. Ia e cala na nodra nanuma. Na vakabauta e sega ni vakamuai rawarawa, sega ni ivakarau ga ni yalo, qai levu na ka e vauci kina. E rerevaki na vakamuai rawarawa, na ivakarau tale ga ni yalo e dau veiveisau. E sega ni veirauti ga na vakabauta ni veivosakitaki na veika me baleta na Kalou, nira “vakabauta tale ga na timoni ra qai sautaninini ena rere.”—Jeme. 2:19.
5, 6. (a) Na cava e rua na ka e sega ni laurai e vakabibitaki ena noda vakabauta? (b) Me vakacava na dei ni noda vakabauta? Vakatauvatana.
5 E duatani sara na vakabauta dina. Dikeva mada na kena ivakamacala ena iVolatabu. (Wilika Iperiu 11:1.) E tukuna o Paula ni vakabibitaki ena vakabauta e rua na ka eda sega ni raica rawa. Kena imatai, na veika eda “sega ni raica” era tu nikua. Eda sega ni raica rawa na veika e tu e lomalagi—oya na Kalou o Jiova, na Luvena, se na Matanitu sa veiliutaki tiko mai lomalagi. Kena ikarua, e vakabibitaka “na ka eda nuitaka”—na veika se bera ni yaco. Eda se bera ni raica na vuravura vou sa vakarau kauta mai na Matanitu ni Kalou. Kena ibalebale qo ni sega na ivakadinadina ni na yaco dina na veika qo kei na veika eda nuitaka?
6 Sega sara ga! E kaya o Paula ni vakabauta dina e dei na kena yavu. Ni tukuna ni vakabauta na “noda vakadeitaka . . . na ka” e vakayagataka o Paula e dua na matavosa e rawa ni kena ibalebale “ivola vakadinadina.” Kaya mada ni dua e solia vei iko e dua na vale. De dua ena solia vei iko na ivola vakadinadina ni vale qai kaya, “Qo nomu vale.” E sega ni tukuna mo vakaitikotiko ena ivola ya, e tukuna ga ni ivola vakadinadina vakalawa e vakadeitaka ni sa nomu na vale. Na dei ni noda vakabauta na vosa ni yalayala kece ni Kalou, e vaka ga nira sa vakayacori oti.
7. Na cava na vakabauta dina?
7 Na vakabauta dina e dei na kena yavu qai sega ni yavalati rawa ni vakaliuci kina na Kalou o Jiova. Na vakabauta ena vukei keda meda raici Jiova ni Tamada dauloloma, eda na nuitaka tale ga ni na yaco dina nona vosa ni yalayala kece. Ia e levu tale na ka e okati ena vakabauta dina. Me vaka ga na ka bula, e vinakati me vakani me bula. E vinakati tale ga me cakacakataki na vakabauta de qai mate.—Jeme. 2:26.
8. Na cava e bibi kina na vakabauta?
8 Na cava e bibi kina na vakabauta? E vakamacalataka o Paula na kena isau. (Wilika Iperiu 11:6.) Eda na torovi Jiova rawa ga da qai vakamarautaki koya ke tiko vei keda na vakabauta. E bibi na vakabauta ke dua na ibulibuli vuku e via vakayacora na itavi dokai duadua: oya me toro voleka qai vakalagilagia na Tamada vakalomalagi o Jiova.
9. E vakaraitaka vakacava o Jiova ni vinakati vei keda na vakabauta?
9 E kila o Jiova ni vinakati vei keda na vakabauta, e vakarautaka gona na ivakaraitaki meda bucina qai cakacakataka kina noda vakabauta. E vakalougatataka na ivavakoso vaKarisito ena nodra ivakaraitaki na tagane era lesi mera veiliutaki. E kaya na nona Vosa: “Vakatotomuria na nodra vakabauta.” (Iper. 13:7) E vakarautaka vei keda e levu tale na ivakaraitaki. E vola o Paula ni “levu . . . na ivakadinadina era vaka na o,” qo o ira na tagane kei na yalewa ena gauna makawa era ivakaraitaki vinaka ni vakabauta. (Iper. 12:1) E sega ni o ira ga na tamata yalodina e vola o Paula ena Iperiu wase 11 era ivakaraitaki vinaka ni vakabauta. E vutucoqa ena iVolatabu na kedra italanoa dina na tagane kei na yalewa, qase kei na gone, e duidui na kedra ituvaki. O ira qo era vakabauta qai levu na ka meda vulica vei ira, ni levu nikua era sa sega ni yalodina.
Eda na Vakadamurimuria Vakacava Nodra Vakabauta?
10. Ena vukei keda vakacava na noda vuli vakataki keda meda vakadamurimuri ira na tagane kei na yalewa yalodina ena iVolatabu?
10 O na rawa ni vakadamurimuria e dua ke o dau vakadikevi koya vinaka. Ni o wilika na ivola qo, o na raica ni levu sara na vakadidike e caka me rawa ni o kilai ira vinaka kina na tagane kei na yalewa vakabauta qo. Vakacava mo cakava tale ga qori? Ni o vuli vakataki iko, vakadidike ena iVolatabu ni o vakayagataka vinaka na iyaya e sa tu rawa. Ni o vakasamataka vakatitobu na ka o vulica, saga mo raitayaloyalotaka na veika e yaco tiko ena gauna ya. Mo raica, rogoca, boica me vaka sara ga o tu kina. Koya e bibi sara, biuti iko ena kedra ituvaki. Ke va ya, o na kilai ira vinaka sara na tagane kei na yalewa yalodina qori, eso era na vaka sara ga era nomu itokani makawa o dau lomana.
11, 12. (a) Ena rawa vakacava ni o volekati Eparama kei Serai? (b) Ena yaga vakacava vei iko na ivakaraitaki i Ana, Ilaija, se o Samuela?
11 Ni o sa mai kilai ira vinaka, o na via vakadamurimuri ira sara ga. Kena ivakaraitaki, ke o vakasamataka tiko e dua na ilesilesi vou. E sureti iko na isoqosoqo i Jiova mo vakarabailevutaka na nomu cakacaka vakaitalatala. De dua o kerei mo toki ina dua na yalava e gadrevi vakalevu kina na dautukutuku, se mo tovolea e dua na iwalewale vou ni vunau e sega ni matau vei iko. Ni o vakasamataka tiko na ilesilesi qori qai masulaka, vakacava ena yaga mo vakasamataka vakatitobu na ivakaraitaki i Eparama? Erau yalorawarawa kei Serai me rau biuta tu na vanua vinaka o Uri, rau qai vakalougatataki vakalevu kina. Ni o muria nodrau ivakaraitaki, o na kilai rau sara vakavinaka ni vakatauvatani eliu.
12 Vakacava ke o yalolailai ni dua o kila vinaka e vakacudrui iko—o sega sara ga kina ni via lako ina soqoni? Ke o vakasamataka na ivakaraitaki i Ana kei na nona sega ni via kauaitaka na veivakacudrui i Penina, qori ena vukei iko mo vakatulewa vinaka—ena vaka sara ga e nomu itokani vinaka o Ana. Ke o yalolailai tale ga ni o beci iko, de dua o na volekati Ilaija ni o vulica nona rarawa kei na sala e vakacegui koya kina o Jiova. O ira tale ga na itabagone era bololaki ena idre ni valavala dukadukali vei ira nodra itokani e koronivuli, era na volekati Samuela nira vulica na ka e cakava ena nodrau veivakamuai cala na luvei Ilai ena valenisoro.
13. Ni o vakadamurimuria nodra ivakaraitaki ni vakabauta ena iVolatabu, kena ibalebale ya ni sega ni yaga na nomu vakabauta? Vakamacalataka.
13 Ni o vakadamurimuria na nodra vakabauta na ilala qo, kena ibalebale ya ni sega tu ni yaga nomu vakabauta? Sega sara ga! E uqeti keda na Vosa i Jiova meda vakadamurimuri ira na tamata vakabauta. (1 Kor. 4:16; 11:1; 2 Ces. 3:7, 9) Kua tale ga ni guilecava ni so vei ira eda na vulica qo era vakadamurimuri ira na tamata yalodina era bula ni bera nodra gauna. Kena ivakaraitaki, eda na wilika ena Wase 17 ni cavuta o Meri na veika e tukuna o Ana, e raici koya me dua na ivakaraitaki vinaka. Kena ibalebale ya ni sega ni yaga na vakabauta i Meri? Sega! E vukei Meri na ivakaraitaki i Ana me bucina na vakabauta ena rogo vinaka kina vua na Kalou o Jiova.
14, 15. Na cava o na raica ena ivola qo, ena yaga vakacava vei keda?
14 E vakarautaki na ivola qo me vukei iko mo vaqaqacotaka nomu vakabauta. Eso na wase era tauri mai ena Vale ni Vakatawa e tabaki mai na 2008 ina 2013, ena ulutaga “Vakadamurimuria Nodra Vakabauta.” E kuri tale kina eso na ulutaga vou. E vakarautaki na taro me veivosakitaki kei na sala ena yaga kina vei keda. Levu na iyaloyalo totoka e vakarautaki ena ivola qo, eso tale era vakalevutaki ra qai veisau vakalailai. O na raica tale ga eso na ivukevuke yaga me vaka na itukutuku ni gauna kei na mape. E vakarautaki na ivola Vakadamurimuria Nodra Vakabauta me baleti keda yadua, vuvale, kei na vuli iVolatabu ni ivavakoso. Levu na vuvale era na marautaka mera wilika vata na ivola qo.
15 Me vukei iko mada ga na ivola qo mo vakadamurimuria nodra vakabauta na dauveiqaravi yalodina i Jiova ena gauna eliu. Me vukei iko tale ga mo vaqaqacotaka nomu vakabauta ni o toro voleka vua na Tamamu vakalomalagi o Jiova!
