LESONI 57
Vakacava ke o Cala Bibi?
Ke o lomani Jiova mada ga vakalevu qai saga mo kua ni vakararawataki koya, o na cala tiko ga ena so na gauna. Ia e tiko eso na cala bibi. (1 Korinica 6:9, 10) Ke o cakava e dua na cala bibi, nanuma ni o Jiova se lomani iko tiko ga, e tu vakarau me vosoti iko qai vukei iko.
1. Na cava meda cakava me vosoti keda kina o Jiova?
O ira na lomani Jiova era na rarawataka vakalevu ke ra kila nira sa cala bibi. Ia e vakacegui ira na ka e yalataka o Jiova vei ira nona tamata: “Ke damudamu na nomuni ivalavala ca, ena vakavulavulataki me vaka na ucacevata.” (Aisea 1:18) Ke da veivutuni dina, ena vosoti keda sara ga o Jiova. Ena kilai vakacava nida sa veivutuni dina? Eda na muduka vakadua na veika ca eda cakava, da qai masuti Jiova me vosoti keda. Eda na saga vakaukaua meda biuta laivi na vakanananu ca se itovo e vakavuna na noda cala bibi qai saga meda muria na ivakatagedegede savasava i Jiova.—Wilika Aisea 55:6, 7.
2. E vakayagataki ira vakacava na qase o Jiova mera vukei keda nida cala?
Ke da cala bibi, e kaya o Jiova meda “kacivi ira na qase ni ivavakoso.” (Wilika Jemesa 5:14, 15.) O ira na tagane era lesi qo era lomani Jiova kei na nona sipi. Era rawata na ivakatagedegede mera vukei keda me vinaka tale noda veiwekani kei Jiova.—Kalatia 6:1.
Era na vukei keda vakacava na qase nida cala bibi? Ena lesi e rua se tolu na qase me vakadodonutaki keda vakaivolatabu. Eratou na veivakasalataki qai veivakayaloqaqataki meda kua ni cakava tale na cala qori. De dua ratou na yalana eso noda itavi vaKarisito me yacova ni sa vinaka tale noda bula vakayalo. Ia ke dua e cala bibi qai sega ni veivutuni ena vakasivoi me taqomaki na ivavakoso.
VAKEKELI
Mo kila na sala e vukei keda kina o Jiova ke da cala bibi.
3. Eda na vakabulai ke da vakatusai keda
Nida caka cala, e rarawa o Jiova eda na vakatusai keda gona vua. Wilika Same 32:1-5, qai veivosakitaka na taro qo:
-
Na cava e vinaka kina meda kua ni vunitaka noda cala, ia meda vakatusa vei Jiova?
Nida sa vakatusa oti noda cala vei Jiova, eda na lomavakacegu tale ga nida kerea na nodratou veivuke na qase. Sarava na VIDIO, qai veivosakitaka na taro tarava.
-
Ena vidio, eratou vukei Canon vakacava na qase me lesu vei Jiova?
E bibi meda tukutuku vakadodonu vei ratou na qase me ratou vukei keda. Wilika Jemesa 5:16, qai veivosakitaka na taro qo:
-
Nida tukuna na ka dina vei ratou na qase, ena vakarawarawataka vakacava na nodratou vukei keda?
Mo vakatusa nomu cala, mo tukutuku vakadodonu vei ratou na qase, qai ciqoma na veivuke vakayalololoma i Jiova
4. E yalololoma o Jiova vei ira na ivalavala ca
Ke dua e cala bibi ni sega ni via muria na ivakatagedegede i Jiova, ena biu tani mai na ivavakoso. Eda na sega ni veimaliwai kei koya. Wilika 1 Korinica 5:6, 11, qai veivosakitaka na taro qo:
-
Me vaka ga na leveni e vakatubutaka na ibuli madrai, ena vakaleqa vakacava na ivavakoso nida veimaliwai kei na dua e sega ni veivutunitaka nona valavala ca?
Nira saga na qase mera vakatotomuria na yalololoma i Jiova vei ira na valavala ca, era na tu vakarau mera vukei ira na biu tani mai na ivavakoso. E mosimosi toka na veivunauci, ia e levu era sa vakalesui mai ena ivavakoso nira vuli mai kina.—Same 141:5.
• E vakaraitaka vakacava o Jiova vei ira na valavala ca na nona yalorawarawa, yalololoma, kei na yalovinaka?
5. Ena vosoti keda o Jiova nida veivutuni
E vakayagataka o Jisu e dua na vosa vakatautauvata eda na kila kina na loma i Jiova ni dua e veivutuni. Wilika Luke 15:1-7, qai veivosakitaka na taro qo:
-
Na cava o vulica eke me baleti Jiova?
Wilika Isikeli 33:11, qai veivosakitaka na taro qo:
-
Na ka bibi cava ena cakava e dua ni veivutuni?
O Jiova e kauaitaki ira vakayalololoma na nona sipi me vaka na ivakatawa ni sipi
KA ERA KAYA ESO: “Au rere ni tukuna vei ratou na qase noqu cala deu na qai biu tani mai na ivavakoso.”
-
Na cava o na tukuna vua e dua ke tukuna qori?
KA O VULICA
Ke o cala bibi, o qai rarawataka dina qai vakadeitaka ni o na sega ni cakava tale, ena vosoti iko o Jiova.
Railesuvi
-
Ena yaga vakacava ke da vakatusa na noda cala vei Jiova?
-
Na cava meda cakava me vosoti kina noda cala?
-
Ke da cala bibi, na cava meda qara kina na nodra veivuke na qase?
IKURI
Dikeva na kena yaga vua e dua na turaga na yalololoma i Jiova e tukuni ena Aisea 1:18.
Era na saga vakacava na qase mera vukei ira na cala bibi?
“Mera Vakaraitaka na Qase na Yalololoma” (Na Vale ni Vakatawa, Okosita 2024)
Dikeva na sala e vakaraitaki kina na yalololoma vei ira na sega ni veivutuni.
“Nodra Vukei o Ira na Biu Tani Mai na iVavakoso” (Na Vale ni Vakatawa, Okosita 2024)
Vulica ena ulutaga qo “E Dodonu Meu Lesu Vei Jiova,” na nona lesu tale vei Jiova e dua na turaga sa lako sese tu.
“E Veisautaka na Bula na iVolatabu” (Na Vale ni Vakatawa, 1 Epereli, 2012)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
