LESONI 09
Toro Voleka Vua na Kalou ena Masu
O dau vinakata na veidusimaki ena nomu bula? E tu eso nomu taro bibi o vinakata me saumi? O vaqara tiko na vakacegu? O vinakata mo volekati Jiova? E veivuke ena tikina qo na masu. Ia meda masu vakacava? E rogoca na masu kece na Kalou? Na cava mo cakava me rogoca kina na nomu masu? Meda raica mada.
1. Meda masu vei cei, na cava meda masulaka?
E vakavulica o Jisu meda masu duadua ga vua na Tamada vakalomalagi. O Jisu mada ga e masu vei Jiova. E kaya: “Mo dou masu gona va qo: ‘Tamai keimami mai lomalagi . . . ’” (Maciu 6:9) Nida masu vei Jiova eda vakadeitaka noda veitokani kei koya.
Eda rawa ni masulaka na ka kece. Ia me sauma na Kalou noda masu, e bibi me salavata kei na lomana. “Eda kila se cava ga eda kerea me salavata kei na [loma ni Kalou], ena rogoci keda o koya.” (1 Joni 5:14) E tukuna o Jisu eso na ivakaraitaki ni ka e veiganiti meda masulaka. (Wilika Maciu 6:9-13.) Eda dau masulaka na veika me baleti keda. Ia meda kua ni guilecava meda vakavinavinakataka na Kalou ena ka e cakava ena vukuda kei na noda kerei koya me vukei ira tale eso.
2. Meda masu vakacava?
E uqeti keda na iVolatabu meda “sova yani na [lomada vua na Kalou].” (Same 62:8) Koya gona, me vu mai lomada noda masu. Eda rawa ni masu ena domoilevu se masu lo qai caka ena ivukivuki e matau qai veirokovi. E rawa nida masu ena gauna kei na vanua cava ga.
3. E sauma vakacava na Kalou noda masu?
E duidui na sala e cakava kina qori. E vakarautaka o Jiova na nona Vosa na iVolatabu, eda na kunea kina na isau ni noda taro. Na wili iVolatabu ena “vakavukui koya e yalowai.” (Same 19:7; wilika Jemesa 1:5.) Ena solia vei keda na vakacegu ni vakasama nida sotava na dredre. Ena uqeti ira tale ga nona dauveiqaravi mera vukei keda ena gauna eda vinakata kina.
VAKEKELI
Dikeva na sala e vakamarautaka kina na Kalou na masu e vu mai lomamu, kei na yaga ni masu ena nomu bula.
4. Na masu e vakadonuya na Kalou
Na cava meda cakava me vakadonuya kina na Kalou noda masu? Sarava na VIDIO.
E vinakata o Jiova meda masu vua. Wilika Same 65:2, qai veivosakitaka na taro qo:
-
O nanuma ni o koya na “Daurogo masu” e vinakata mo masu vua? Na vuna?
Me rogoca na Kalou noda masu e bibi meda muria nona ivakatagedegede. Wilika Maika 3:4 kei na 1 Pita 3:12, qai veivosakitaka na taro qo:
-
Eda vakadeitaka vakacava ni na rogoca o Jiova noda masu?
Ena gauna ni ivalu, rau na masulaka na qaqa na ito ruarua. Vakacava ena sauma na Kalou na masu qori?
5. Me vu mai lomada noda masu
Eso era sa vulica mera dau cavuqaqataka eso na masu. Ia qori na sala e vinakata kina na Kalou meda masu vua? Wilika Maciu 6:7, qai veivosakitaka na taro qo:
-
Na cava mo cakava mo “kua ni cavuta tiko ga” e dua na qaqanimasu?
E veisiga vakasamataka e dua na veivakalougatataki ena nomu bula qai vakavinavinakataki Jiova kina. Ni o cakava qo e veisiga me dua na macawa, ena vitu na usutu o masulaka, e sega ni dua tu ga nomu qaqanimasu.
Na tama vinaka ena vinakati luvena me talaucaka mai na lomana. E vinakata tale ga o Jiova meda masu vua mai vu ni lomada
6. Na isolisoli ni Kalou na masu
Ena vakaukauataki keda vakacava na masu ena gauna vinaka kei na gauna ca? Sarava na VIDIO.
E yalataka na iVolatabu nida na vakila na vakacegu ni vakasama nida masu. Wilika Filipai 4:6, 7, qai veivosakitaka na taro qo:
-
E sega ni kauta laivi na noda leqa kece na masu, ia ena yaga vakacava?
-
Na cava eso na ka o via masulaka?
O bau kila?
Na vosa “emeni” e kena ibalebale “me yaco mada ga” se “io.” Tekivu na gauna vakaivolatabu, sa dau cavuti na emeni ni oti na masu.—1 Veigauna 16:36.
7. Me tiko na gauna o masu kina
Eso na gauna eda sa rui osooso eda guilecava meda masu. E bibi vakacava vei Jisu na masu? Wilika Maciu 14:23 kei na Marika 1:35, qai veivosakitaka na taro qo:
-
Na cava e cakava o Jisu me tiko na gauna me masu kina?
-
Na gauna cava o rawa ni masu kina?
KA ERA KAYA ESO: “E vakalusi gauna na masu, ni sega ni dua e rogoca.”
-
Na cava o na kaya?
KA O VULICA
Nida masu mai vu ni lomada eda na toro voleka vua na Kalou, ena solia vei keda na vakacegu ni vakasama, ena uqeti keda tale ga meda vakamarautaki Jiova.
Railesuvi
-
Meda masu vei cei?
-
Meda masu vakacava?
-
Na cava na yaga ni masu?
IKURI
Raica na isaunitaro e dau tarogi wasoma me baleta na masu.
“Vitu na Ka mo Kila me Baleta na Masu” (Na Vale ni Vakatawa, 1 Okotova, 2010)
Vulica na vuna e bibi kina na masu kei na sala me vakavinakataki kina.
Dikeva na ka e tukuna na iVolatabu me baleta noda masu vei cei.
Ena vidio ni ivakatagi qo, dikeva na vanua kei na gauna meda masu kina.
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
