Eda dau marautaka kece na itukutuku vinaka. Dua na itukutuku vinaka e via vakarogoi vei iko kei ira na wekamu.

Na itukutuku vinaka qori e volai ena iVolatabu, a uqeta na kena volai na Dauveibuli ni lomalagi kei vuravura, na Kalou o Jiova. Ena veivosakitaki ena ivola qo e va na ivola ena iVolatabu e tiko kina na itukutuku vinaka me baleti keda kece. Na ivola qori e vakayacani vei ratou e le va e vakayagataka tale ga na Kalou me ratou volavola​—Maciu, Marika, Luke, kei Joni.

Levu era vakatoka na va na ivola qori me Kosipeli. E volatukutukutaki kece na va na ivola qori na kosipeli se itukutuku vinaka me baleti Jisu, ena veivakabulai ena vukuna na Kalou. Era na vakalougatataki tawamudu tale ga ena vukuna o ira na vakabauti koya, ni Tui ni Matanitu vakalomalagi ni Kalou.​—Marika 10:​17, 30; 13:13.

De dua o veinanuyaka se cava e uqeta kina na Kalou me volai e va na ivolatukutuku ni bula kei na ivakavuvuli i Jisu.

E yaga na kena volai e va na ivolatukutuku ni veika e tukuna se cakava o Jisu. Kena ivakatautauvata, kaya mada eratou duri tu e va na tagane ena yasana e dua na qasenivuli rogo. O koya e duri toka e liu e daukumuni ivakacavacava. E vuniwai o koya e toka ena yasana imatau. E gonedau o koya e vakarorogo toka mai na yasana imawi, e nona itokani dredre tale ga o qasenivuli. Na kena ikava e toka sara e muri e dauvakadidike, qai gone duadua vei ratou na le va. Eratou turaga daudina kece, qai dui tiko na ka eratou taleitaka se vakaliuca. Ke ratou dui vola na ivolatukutuku ni veika e tukuna se cakava o qasenivuli, ena rairai duidui nodratou ivolatukutuku. Ia ni dikevi kece na va na ivolatukutuku qai vakasamataki vata kei na duidui ni rai se inaki, sa rawa nida kila vinaka na veika e tukuna se cakava o qasenivuli. E va sara ga qori na yaga ni kena volai e va na ivolatukutuku ni nona bula o Jisu na Qasenivuli Levu.

Ni tomani na vosa vakatautauvata, e via rawai ira na Jiu o daukumuni ivakacavacava. Na iwalewale gona ni nona vakamacalataka eso na ivakavuvuli se ka e yaco, e kena inaki sara ga mera vukei kina na Jiu. O vuniwai e vakamacalataka na nodra vakabulai na tauvimate se  vakaleqai eso tale na tikiniyagodra. Qori na vuna e sega ni vola kina eso na ka e volatukutukutaka o daukumuni ivakacavacava, se duidui na ituvatuva e muria. E vakamacalataka na ivakarau ni loma i qasenivuli kei na nona itovo na nona itokani dredre. O koya e gone e lekaleka ga qai matata sara nona ivolatukutuku. Ia e donu kece nodratou ivolatukutuku. Eda raica rawa e keri ni yaga kece na va na ivolatukutuku ni bula i Jisu meda kila vinaka kina nona cakacaka, ivakavuvuli, kei na nona itovo.

De dua era na cavuta eso ‘na Kosipeli i Maciu’ se ‘Kosipeli i Joni.’ E sega ni cala qori ni ratou volatukutukutaka yadua na “itukutuku vinaka kei Jisu Karisito.” (Marika 1:1) Ia ena dua tale na yasana, na ivolatukutuku kece qori e umani ga ena dua na kosipeli se itukutuku vinaka me baleti Jisu, eratou qai vakayagataki ga e le va me ratou volatukutukutaka.

Levu era dikeva na Vosa ni Kalou nira vakatauvatana qai raica na veisemati ni veika e volatukutukutaki ni yaco ena Maciu, Marika, Luke, kei na Joni. A saga me cakava qori ena 170 G.V., o Tatian e dua na dauvolavola mai Siria. E vakabauta ni donu qai uqeti vakalou na va na ivola qori, mani vakarautaka e dua na ivolatukutuku ni bula i Jisu kei na nona cakacaka vakaitalatala ena ivola e vakatokai na Diatessaron.

E va tale ga qori na ivola Jisu​—Na Sala, na Dina, na Bula, ia e donu qai sega ni lutu e dua na ka ni vakatauvatani kei na ivola sa cavuti mai cake. Sega ni kurabuitaki qori nida sa kila vinaka qo na kena vakayacori e levu na parofisai kei na vosa vakatautauvata i Jisu. Sa qai matata sara na veika e tukuna qai cakava, kei na veitaravi ni veika e yaco. Eso tale ga na ka era kunea na dauvakekeli e kilai kina eso tale na ka kei na nona rai o koya e volavola. E sega ni rawa ni surevaka e dua na nona rai me baleta na veitaravi ni veika e yaco. Ia na lewe ni ivola Jisu​—Na Sala, na Dina, na Bula, e nuitaki qai veisemati vinaka.

Ni o marautaka tiko nomu wilika na ivola qo, kua sara ni guilecava na itukutuku bibi e volai kina me baleti iko kei ira na wekamu. Nanuma tiko na ka e tukuna o Jisu Karisito vua na yapositolo o Tomasi: “O yau na sala, na dina, kei na bula. Ena vukuqu ga ena qai torovi Tamaqu rawa kina e dua.”​—Joni 14:6.

O na vulica ena ivola Jisu​—Na Sala, na Dina, na Bula na vuna e vakatokai kina o Jisu “na sala.” Eda rawa ga ni masu vua na Kalou o Jiova ena vuku i Jisu, eda veiyaloni rawa tale ga kina kei na Kalou. (Joni 16:23; Roma 5:8) Eda rawa gona ni veiwekani vinaka ga kei na Kalou ena vuku i Jisu.

O Jisu “na dina.” E sega ni vakavulica ga na ka dina, ia e bulataka sara ga. Levu na parofisai e vakayacori ena vukuna, era ‘io kece ena vukuna.’ (2 Korinica 1:20; Joni 1:14) Na parofisai va qori e vakatakila vei keda na itavi bibi i Jisu ena vakayacori ni inaki ni Kalou.​—Vakatakila 19:10.

O Jisu Karisito “na bula.” Eda rawa ni marautaka na “bula dina” se na “bula tawamudu” ena vuku ni ivoli i Jisu, nona cabora na nona bula uasivi kei na dra. (1 Timoci 6:​12, 19; Efeso 1:7; 1 Joni 1:7) Ena vakadinadinataki tale ga ni o koya “na bula” ena nodra vakaturi na vica vata na milioni era sa mate me rawa nira bula tawamudu ena Parataisi.​—Joni 5:​28, 29.

E bibi meda kila qai doka kece na itavi i Jisu ena vakayacori ni inaki ni Kalou. Mo marautaka mada ga nomu vulica e levu tale na ka me baleti Jisu​—“na sala na dina kei na bula.”