Levu na gauna sa tu voli ga e Kalili o Jisu ni vuavuaivinaka kina nona cakacaka ni vakatauvatani kei Jutia. A vakabula tale ga e dua na tagane ni tiko voli mai Jerusalemi ena Siga ni Vakacecegu, “sa qai kaukaua ga kina nodra via vakamatei koya na Jiu.”—Joni 5:18; 7:1.

Qo sa donuya na Seviteba se Okotova ni 32 G.V., sa voleka na Soqo ni Valevakacevaceva (se Valetabanikau). Ena vitu na siga ni soqo qai dua na soqo bibi ena ikawalu ni siga. Qori e gauna ni marau kei na vakavinavinaka ni sa cava e dua na yabaki ni teitei.

Eratou tukuna vei Jisu na tacina vakacabecabe o Jemesa, Saimoni, Josefa, kei Jutasa: “Mo biubiu mo lako i Jutia.” E itikotiko ni lotu o Jerusalemi, ena osodrigi kina na korolevu qori ena tolu na siga ni solevu. Eratou kaya sara vei Jisu na tacina: “Ni sega ni dua e cakava vakavuni tiko ga na ka, ke vinakata me kilai. Ke o cakava tiko ga na veika qo, vakaraitaki iko yani me raici iko o vuravura.”—Joni 7:3, 4.

Eratou sega ni ‘vakaraitaka tiko na tacina ni ratou vakabauta’ ni o koya na Mesaia. Ia eratou vinakata mera raica na tiko ena soqo na veika veivakurabuitaki e cakava o Jisu. Sa kila tu o Jisu na leqa e rawa ni yaco, mani kaya vei ratou: “E sega ni dua na yavu me cati kemudou kina o vuravura, ia e cati au niu vakaraitaka vakadodonu na torosobu ni nodra ivalavala. Dou lako cake ina soqo, au na sega mada ni lako ena soqo qo ni se bera ni yaco mai na noqu gauna.”—Joni 7:5-8.

Eratou liu na taci Jisu kei na vo ni matailakolako, ratou qai lako lo e muri o Jisu kei na nona tisaipeli. Eratou takoso ga e Samaria, ratou sega ni lako vaka ina Uciwai na Joritani me vaka era dau muria e levu. E tala sara eso na mata me ratou liu i Samaria me lai vakarautaki nodratou icili. Ia era sega ni veiciqomi se veivakacegui na lewe ni dua na koro ni lako tiko i Jerusalemi o Jisu ena nodra soqo na Jiu. Erau cudru o Jemesa kei Joni, rau qai taroga: “Turaga, oni vinakata me keirau kaciva na bukawaqa mai lomalagi me vakarusai ira?” (Luke 9:54) E vunauci rau o Jisu, qai toso tale nodratou ilakolako.

Ni ratou lako tiko e gaunisala, e kaya vei Jisu e dua na vunivola: “Qasenivuli, au na muri kemuni ena vanua kece oni lako kina.” E sauma o Jisu: “Era vaqara na fokisi, era vakasova na manumanuvuka, ia na Luve ni tamata e sega na vanua me kotora kina na uluna.” (Maciu 8:19, 20) E tukuna tiko o Jisu ni na sotava na veika dredre na vunivola ke nona imuri. Kena irairai ni sa rui  dokadoka na vunivola, e sega ni via muri Jisu kina. E vinaka meda taroga, ‘Cava au tu vakarau ni cakava meu rawa ni muri Jisu?’

E kaya o Jisu vua e dua tale na tagane: “Mo mai noqu imuri.” E sauma na tagane ya: “Turaga, ni laivi au meu lai buluti tamaqu mada.” Ni kila vinaka na kena ituvaki o Jisu, e kaya kina: “Laivi ira na mate mera buluta nodra mate, ia mo lako mo lai kacivaka ina veivanua kece na itukutuku ni Matanitu ni Kalou.” (Luke 9:59, 60) De dua e se bera ni mate na tamana. Ke sa mate, ena sega ni veitalanoa tu kei Jisu e kea. E sega ni se tu vakarau na tagane qori me vakaliuca na Matanitu ni Kalou.

Ni toso tiko nodratou ilakolako i Jerusalemi, e kaya e dua tale na tagane vei Jisu: “Au na muri kemuni Turaga, ia moni vakadonuya mada meu lai vakamoce vei ratou mai vale.” E kaya sara o Jisu: “O koya e taura na isiviyara qai rai tale i muri e sega ni ganiti koya na Matanitu ni Kalou.”—Luke 9:61, 62.

O ira na via tisaipeli dina i Jisu mera vakaliuca na cakacaka ni Matanitu ni Kalou. Ke sega ni rai tiko ga i liu o koya e siviyara, ena rawa ni veve na wenisiviyara. Ke biuta na siviyara me rai tale i muri, ena sega ni oti na cakacaka ena were. O koya tale ga e railesu tiko ena veika ni vuravura sa vakarau takali qo, ena rawa ni vagolei tani mai na sala ina bula tawamudu.