Ni vunauci ira oti na Farisi me baleta nodra ivakavuvuli vakatamata, e biubiu o Jisu kei ratou nona tisaipeli. Ratou gole sara ina yasayasa o Taia kei Saitoni mai Finaisi, e vica vata na kilomita ena vuaira.

E raica e dua na vale o Jisu me ratou tiko kina, ia e sega ni vinakata me kilai nodratou tiko e kea. Kena seva ni raici Jisu e dua na yalewa ni Kirisi e sucu ena vanua qo, e vakamasuti koya sara: “Ni lomani au, Turaga, na Luvei Tevita. E dau curumi timoni vakalevu na luvequ yalewa.”—Maciu 15:22; Marika 7:26.

Ratou tukuna sara vei Jisu na nona tisaipeli: “Ni vakatalai koya, ni tagi muri kedatou tiko ga mai.” E qai tukuna o Jisu na vuna e sega ni kauaitaki koya kina: “Au sega ni talai vua tale e dua, vei ira ga na sipi ni matanitu o Isireli era yali tu.” E sega ni soro na yalewa. E torovi Jisu, e cuva vua qai kerea: “Turaga, ni vukei au!”—Maciu 15:23-25.

E vakatovolea o Jisu na nona vakabauta ena nona kauta cake mai na rai cala e tu vei ira na Jiu me baleti ira na kai veimatanitu: “E sega ni dodonu me soli na kedra madrai na gone vei ira na luvenikoli.” (Maciu 15:26) Nona cavuta o Jisu na “luvenikoli,” e dusia ni lomani ira na sega ni Jiu, qai rairai vakilai nona yalololoma ena irairai ni matana kei na rorogo ni domona.

E sega ni rarawataka na yalewa na vosa i Jisu, e ciqoma ga na nodra rai cala na Jiu qai kaya: “E dina Turaga, ia na luvenikoli mada ga era dau kania na tikitiki ni kakana e lutu mai na teveli ni nodra turaga.” E raica o Jisu ni vinaka na lomana qai kaya: “Sa dua na ka na nomu vakabauta, me yaco mada ga na nomu kerekere.” (Maciu 15:27, 28) E vakabulai o luvena ena gauna vata ga ya. Ni lesu i vale, e raici luvena ni davo toka ena imocemoce, sa bula vinaka tale ni “sa lako tani vua na timoni”!—Marika 7:30.

Eratou biubiu mai na yasayasa o Finaisi o Jisu kei ratou na tisaipeli me ratou vakamuria cake na Uciwai na Joritani. De dua ratou lai takosova na Joritani ena vualiku ni Wasa o Kalili, ratou gole sara ina yasayasa o Tikapoli. Eratou cabeta e dua na ulunivanua, ia era raici ratou na ilala levu. Era lai vakotora e yava i Jisu na lokiloki, mavoa, mataboko kei ira na galu, qai vakabulai ira. Dua na ka nodra kurabui na lewenivanua, era vakalagilagia kina na Kalou ni Isireli.

E kauaitaka sara o Jisu e dua na turaga e kaka qai didivara. De dua ena madua se taqaya na turaga qori ni maliwai ira na ilala levu. E rairai liaca tale ga qori o Jisu mani kauti koya vakatikitiki. Ni rau sa tiko taurua ga, e tukuna sara vua o Jisu na ka ena cakava. E daramaka nona iqaqalo e daligana, ni kasivi oti, sa qai tara na yamena. E tacake i lomalagi qai cavuta na matavosa e kena ibalebale “Mo tadola mai.” E rogo sara na daligana, e matata tale ga nona vosa. A sega ni vinakata o Jisu me veitukuniyaki na ka e cakava ni vinakata mera vakabauti koya na lewenivanua ena ka era raica se rogoca.—Marika 7:32-36.

“Dua na ka nodra kurabui” na ilala levu nira raica na kaukaua i Jisu me veivakabulai. Era kaya: “E totoka na ka kece e cakava. E bau vakavuna me rogo na didivara, e vosa tale ga na galu.”—Marika 7:37.