Era maue na kai Nasareci. Ni bera ni lako vei Joni o Jisu me papitaisotaki ena dua na yabaki vakacaca sa oti, a dau cakacaka tu vakamatai e Nasareci. Ia sa kilai ena gauna qo ni dau cakava na ka veivakurabuitaki. Era via raica sara ga na lewenivanua me cakava vei ira eso na ka qori.

Era sa qai nanamaki ga vakalevu ni gole o Jisu ina valenilotu me vaka na nona ivakarau. E vakayacori e kea na masu, wiliki tale ga na ivola i Mosese me vaka na kena ivakarau “ena valenilotu ena siga ni vakacecegu kece.” (Cakacaka 15:21) E dau wiliki tale ga eso na nodra ivola na parofita. Ni tucake o Jisu me wilivola, de dua ena kilai ira eso sa dau raici ira voli ena veiyabaki sa sivi ena valenilotu qo. E soli vua na ivolavivigi nei Aisea, qai kunea na vanua e cavuti kina o koya e lumuti ena yalo i Jiova. Na tikinivolatabu qori e sa kilai nikua me Aisea 61:1, 2.

E wilika sara o Jisu ni o koya e parofisaitaki qo ena kacivaka na veisereki vei ira na vesu tu, nodra rai na mataboko, kei na yabaki vinaka i Jiova. E vakasuka o Jisu na ivolavivigi vua na dauveiqaravi, lai dabe tale. Era wanonovi koya kece na tiko ena valenilotu. Oti sa qai dua nona ivakamacala balavu, qai okata kina na itukutuku bibi qo: “Sa vakayacori nikua na tikinivolatabu oni se qai rogoca.”​—Luke 4:21.

Era qoroya na lewenivanua “na totoka ni vosa e lako mai gusuna” ra qai veitarogitaka: “E sega ni o koya ga qo na luvei Josefa?” Ni kila nira via raica na veika veivakurabuitaki era sa dau rogoca voli ni cakava, e tukuna tale o Jisu: “Oni na tukuna sara ga vei au na ivosavosa qo, ‘Vuniwai, vakabulai iko mada. Ni cakava tale ga e ke, ena nomuni vanua na ka keimami rogoca ni caka mai Kapenaumi.’” (Luke 4:22, 23) Era na rairai nanuma o ira era dau yasayasa vata kei Jisu e liu, ni dodonu me tekivu na veivakabulai ena nona vanua, me yaga taumada vei ira na kainona. De dua era nanuma kina ni beci ira o Jisu.

Ni kila na nodra vakanananu o Jisu, e vakamacalataka sara eso na ka e yaco e Isireli. E kaya ni levu na yada e Isireli ena gauna i Ilaija, ia e sega ni talai o Ilaija vei ira qori. E talai ga vua e dua na yada e sega ni Isireli, e vakaitikotiko mai Sarifaci, na tauni volekati Saitoni. A vakayacora e keri o Ilaija na cakamana e vakabula kina e dua. (1 Tui 17:8-16) Era tu tale ga e Isireli e levu na vukavuka ena gauna i Ilaisa, e qai vakasavasavataki Neamani ga na kai Siria na parofita.​—2 Tui 5:1, 8-14.

Era nanumi ira ga na kai Nasareci qai lailai nodra vakabauta, nira nanuma e veivakaduiduitaki o Jisu. Cava era qai cakava? Era cudru sara vakalevu o ira na tiko e valenilotu, era tucake ra qai dretaki koya ina taudaku ni koro. Era kauti koya sara ina bati ni ulunivanua e tara toka kina o Nasareci mera cokataki koya sobu. Ia e dro bula rawa o Jisu. E gole sobu sara i Kapenaumi, ena vuaira ni baravi ni Wasa o Kalili.