O Crystal e dua na daukaulotu e veivuke tiko ena vunautaki ni itukutuku vinaka vei ira na galu e Sierra Leone. Ni bera ni lai vunau ena dua na siga, a masulaka me sotavi ira na galu ena yalava. A muria e dua tale na gaunisala ena mataka ya ni lai raica e dua na nona veisikovi lesu. A tarogi ira eso ke ra kila e dua na galu ena yasayasa oya, era dusia  sara vua e dua na vale. Erau mani sota kei na dua na goneyalewa e taleitaka na itukutuku vinaka, e via gole tale ga ina soqoni vagalu. Era tarogi Crystal o ira na vakaitikotiko e kea ke via lai raica e dua tale na galu. O koya tale ga qori e via kila na ka dina. Sa cakacaka vakavica ena yalava ya o Crystal, ia se qai sotavi rau vakadua na galu a vunau kina ena mataka ya. E kaya o Crystal ni kunei rau ga na tataleitaki ya ena veivuke i Jiova.

A gole tiko ina soqoni ena dua na siga o Emmanuel mai Liberia, a raica sara ni duri tu e gaunisala e dua na cauravou e vakaisulu vinaka. E kauai o Emmanuel ni matararawa tu o cauravou, mani vakelea nona motoka me taroga ke vinakata na veivuke. E vakamacala sara o cauravou ni yacana o Moses, a butakoci kece nona ilavo, e vakasamataka tale tiko ga me vakamatei koya. A vakarogoci Moses o Emmanuel ni talaucaka na lomana, oti sa qai kaya vua: “Kerekere daru gole vata mada ina Vale ni Soqoni.” Erau gole vata sara na le rua. E tagi o Moses ni tarai koya na ka e rogoca ena soqoni. Oti na ivunau, e kaya o Moses: “E ganiti au sara ga na ivunau! Sa ra duatani ga na iVakadinadina i Jiova.” A vakadonuya o Moses me vulica na iVolatabu, sa tiko wasoma tale ga ena soqoni.

O Aminata e dua na goneyalewa yabaki 15 mai Guinea-Bissau. Gauna se yabaki 13 kina, a tukuna na nona qasenivuli vei ira na lewe ni kalasi mera droinitaka na matavulo kei na so tale na ka e dau vakayagataki ena soqo ni marau. Ia e droinitaka o Aminata na manumanu kei na kau qai vola na “Parataisi” me iulutaga ni nona droini. Ni raica o qasenivuli na droini i Aminata, e tukuna ni na sega ni soli vua e dua na maka baleta e veicalati nona droini. A lai raici qasenivuli o Aminata ni oti na kalasi qai taroga: “O cei a tauyavutaka na soqo ni marau?”

“O ira na lotu butobuto,” e kaya o qasenivuli.

E kaya o Aminata: “Au sega ni lotu butobuto, au sega ni vakaitavi kina ena kena soqo. Au droinitaka ga na ka au vakabauta, oya ni sa voleka ni vukica na vuravura na Kalou me parataisi.” A kaya o qasenivuli ni na vakarautaka eso tale na taro, mera qai vola na kena isau na lewe ni kalasi. Ena 20 na taro e vakarautaki, e sauma donu o Aminata e 18.

E vitu na dautukutuku eratou tiko ena iwasewase lailai ena dua na koro e Malawi. E rawarawa ga na itaratara ni nodratou vanua ni soqoni. Ni uqeti ratou na dautukutuku nona veisiko na ivakatawa ni tabacakacaka, eratou gumatua kina ni veisureti ina iVakananumi ni mate i Karisito. A vakayagataki ga na cina tabucagi ena  iVakananumi, qai dredre na veitosoyaki ena levu ni tataleitaki era tiko ena soqo. Ia dua na ka nodratou marau na le 7 na dautukutuku nira tiko ena soqo e le 120!

Levu na vanua e dau qai laurai na vuavuaivinaka ni vunau e matanalevu ena siti ni sa oti toka e dua na gauna. Kena ivakaraitaki, a gole e dua na marama ina qiqi ni vunau a duri tu e Lomé na koroturaga kei Togo. A lomalomarua mada e liu, ia a mani taura na brochure E Rawa ni Mamarau Nomu Vuvale. A veivosakitaki vakalailai na Efeso 5:3, oti a solia na marama ya nona naba ni talevoni vei rau na tacida, rau solia tale ga nodrau naba na tacida. A qiri na marama ya ni oti e rua na macawa qai kaya: “Au sega ni dau taleitaki ira na iVakadinadina i Jiova. Ia au sa wilika na brochure, sa totoka dina. Au walia rawa kina eso na leqa ena noqu vakawati, au vukei rau tale ga e rua na veiwatini. A cala noqu rai me baleti kemuni na iVakadinadina i Jiova. Kerekere au via vulica na iVolatabu.” A vulica na iVolatabu na marama ya, erau vuli tale ga e dua na veiwatini a vakamacalataka vei rau na brochure.

E bau yawa vinaka na vanua e toka kina na tauni lailai o Ankasie e Ghana. E vica ga era volivolitaki tu e gaunisala ena tauni, ia e dau duri na qiqi ni vunau e matanalevu ena Moniti kece. Dua na siga ni duri tu e yasa ni qiqi e dua na tacida o Samuel, a vunau sara vua e dua tale na turaga o Enoch. A taura na brochure Vakarorogo Vua na Kalou o Enoch, qai tarogi Samuel ke tiko eso na ivola vaKusaal.

E kaya o Samuel: “Vosota, e sega. Ia e tiko na ivola vakaFrafra,”  e via tautauvata kei na vosa vaKusaal. A kerea o Enoch eso na ivola me lai veisoliyaka vei ira na wekana e nakoro.

Ni lesu i Ankasie o Enoch, a solia vei Samuel eso na tikinipepa. Sa vakadewataka tu o Enoch na brochure Vakarorogo Vua na Kalou! ena vosa vaKusaal. E sega ni cegu nona lako ina soqoni o Enoch, kei na nona vulica na iVolatabu.