O Emily e dua na goneyalewa yabaki 12 mai Ositerelia. A vakamacalataka vei ira na lewe ni kalasi o nona qasenivuli ena dua na siga ni bibi mera digia vinaka nodra itokani. E nanuma sara o Emily me vakaraitaka vei qasenivuli na vidio O Cei na iTokani Dina? E coba dei toka na matadra na gone ena vidio ni vakaraitaka vei ira o qasenivuli. Oti era sa qai veitalanoataka me dua na aua. E lai vakaraitaka ena  so tale na kalasi o qasenivuli na vidio. E vakaraitaka tale ga o Emily vei qasenivuli kei ira na lewenikalasi na noda website na jw.org. E kaya o Emily: “E vakadoudoutaki au o Jiova meu vakaraitaka na website vei ira e vica vata na drau na gonevuli. Au vakila sara ga na nona veivakalougatataki.”

E ciwa na aua nodratou muria e lima na dautukutuku na gaunisala sukusukura ratou cabeta tale ga na veidelana. Qori me ratou lai vunau e matanalevu ena dua na vanua ni veivoli e Suai, Timor-Leste. Era kurabui na lewenivanua nira raica na ivola vakaivolatabu ena 12 na vosa ni vanua ya, ni vica ga se sega sara ga ni dua na ivola e bau tabaki tu ena vosa qori. Ni raica e dua na marama na ulutaga ni brochure, e kaya: “Noqu vosa sara ga ya!” E se qai raica vakadua e dua na ivola e tabaki ena nona vosanisucu na Bunak. Eratou veisoliyaka ena loma ni va ga na siga na dautukutuku e 4,571 na ivola, era kerea tale ga e levu mera sikovi yani ena nodra vale. E levu na tataleitaki era se sega ni bau sotavi keda vakadua na iVakadinadina i Jiova. Era sarava na gone na vidio Mo iTokani i Jiova ena vosa na Tetun Dili. Na levu ni nodra taleitaka na sere ni vidio qori eso na gone, era wiligusutaka na qaqana ra qai lagata.

Erau lai kerekere na veiwatini daukaulotu o Brian kei Roxanne me biu e dua na qiqi ni ivola vakaivolatabu ena dua na koronivuli torocake ena yanuyanu o Palau. Ni ratou sota kei na peresitedi ni koronivuli, erau vakaraitaka sara vua na vidio ena jw.org me baleta na noda vunau e matanalevu. Erau solia tale ga vua eso na sabolo ni ivola erau na biuta ena qiqi. E tukuna na peresitedi vei rau o  Brian kei Roxanne me rau lai raica e dua tale na vakailesilesi ni koronivuli. Oti nodratou bose kei na vakailesilesi qori, e tukuni me rau lai raica e dua tale na vakailesilesi liu ni koronivuli.

E kaya o Brian: “Keitou veitalanoa vinaka sara kei na vakailesilesi liu. Ia e talai keirau tale ina ofisi ni peresitedi, qai tukuni me keirau vola e dua na ivola ni kerekere me vakaduri e koronivuli na qiqi ni ivola. Keirau via yalolailai ni ratou talai keirau wavoki tiko ga mai vua e dua na vakailesilesi ina dua tale, ia keirau vola ga na ivola.”

Erau lesuvi koya na vakailesilesi liu o Brian kei Roxanne  ni rau via kila na macala ni nodrau ivola, rau a namaka tiko me na sega ni vakadonuya nodrau kerekere. E kaya o Brian: “Keirau kurabui ni tukuna na vakailesilesi liu ni sa wilika na ivola keirau solia vua, e taleitaka tale ga vakalevu. E tukuna ni na yaga sara ga vei ira na gonevuli.” A qai vakadonui nodrau kerekere na veiwatini!

E tomana o Brian: “E vakaraitaka vei keirau e dua na vakailesilesi nira rawa ni digia na gonevuli era curu i bure na vanua mera lai lotu kina ena Sigatabu. E kaya, ‘Ke ra via lako yani eso ina nomudou lotu, keitou rawa ni kauti ira yani.’ Keirau sega sara ga ni vakabauta kei Roxanne na itukutuku ya. Sa vakadonuya mada na koronivuli na neirau kerekere, qo sa na kauti ira tale ga yani na gonevuli ina Vale ni Soqoni!”

Ena imatai ni siga e duri kina e koronivuli na qiqi ni ivola, erau solia rawa o Brian kei Roxanne e 65 na ivola, 8 na mekesini, kei na 11 na brochure. Erau veitalanoa vinaka kei ira e levu na gonevuli rau qai kerekere na vakailesilesi me rau lesu tale yani na veiwatini.

Ni lesu tiko mai na cakacaka vakavunau ena dua na siga o Lipson, e lewe ni vuvale e Peceli ena Yatu Solomoni, e rogoca ni vakatagitaki tiko ena loma ni dua na sitoa na noda sere. Ni curu yani ena sitoa, e kurabui nira sarava tiko na gone kei na qase na vidio ni sere naba 55, “Sa Yaco Dina na Bula Tawamudu!” Qori e dua na sere e tiko ena vidio Mo iTokani i Jiova. Ni oti na sere ya, e kaya na itaukeinisitoa: “Qo e dua tale na vidio au vinakata moni raica.” E vakaraitaka sara na vidio e kena ulutaga Kua ni Butako. Ni oti na vidio, e tukuna vei ira kece na sarasara tiko mera kua ni butako ena nona sitoa.

E levu tale era curu yani ena sitoa ni caka tiko na vidio,  mani tukuna vei ira o itaukeinisitoa: “Ni rogoca mada noqu sere taleitaki.” E vakatagitaka tale na sere naba 55. Oti sa qai vakaraitaka na vidio Vuna mo Vulica Kina na iVolatabu kei Na Cava e Dau Caka ena Vuli iVolatabu? ena vosa na Solomon Pidgin.

E vica ga na lewenivanua e Solomoni era rawa ni vakayagataka na Internet ni saulevu, qai so ga na vanua e rawa ni vakayagataki kina. Na itaukeinisitoa sa cavuti oti mai e sega ni iVakadinadina i Jiova, ia sa kaburaka tiko na sore ni ka dina vei ira na lai volivoli yani ena nona vakaraitaka vei ira na noda vidio.

Erau dau marautaka e dua na veiwatini na vunau ena siga Moniti e veimacawa, ni vakayagataki na qiqi ni ivola ena dua na yasayasa e Nouméa, na koroturaga kei New  Caledonia. Dua na siga e gole galugalu yani e dua na marama, lai taura sara na ivola Na Cava Mada e Kaya na iVolatabu? Oti e veimama ni aua, e lesu tale yani na marama qori kei na nona ivola. E tukuna sara vei rau na veiwatini: “Drau sa raica qo?” E dolava na ivola qai dusia na yaca i Jiova. E kaya: “Qo na yaca ni Kalou! Sa vakamacawa noqu vakadidike tiko ena laibri meu kila na ka dina me baleta na Kalou. Ia niu kauta na nomuni ivola qo au lai dolava ena noqu motoka, na imatai sara ga ni ka au raica na yaca ni Kalou, o Jiova. Au lesu mai meu vakavinavinaka vei kemudrau.” Erau veitalanoa vinaka sara kei na marama qo na veiwatini, rau vakaraitaka tale ga vua na ulutaga “Na Yaca ni Kalou—Kena Vakayagataki kei na Kena iBalebale” ena ikuri ni ivola Kaya na iVolatabu. E tukuna na marama ya ni na lai tomana nona vakadidike ena laibri, ia sa kila na vanua e dau biu kina na qiqi ena Moniti!