O KILA beka se ivola cava e wilika tiko na goneyalewa lailai oqori kei rau na nona itokani? Io, na ivola sara ga o wilika tiko, na iTalanoa mai na iVolatabu. Eratou wilika sara tiko ga na italanoa o wilika tiko oqo​—“Na Rawati ni Bula Tawamudu.”

O kila na ka eratou vulica tiko? Na kena imatai, ni vinakati meda kilai Jiova kei Jisu na Luvena kevaka meda bula tawamudu. E kaya na iVolatabu: ‘Oqo na sala meda bula tawamudu kina, meda kila na Kalou dina duadua ga kei na Luvena a tala mai vuravura, o Jisu Karisito.’

Eda na kilai rau vakacava na Kalou o Jiova kei na Luvena o Jisu? Dua oya na noda wilika na ivola oqo iTalanoa mai na iVolatabu mai na kena itekivu me yacova na kena iotioti. E tukuni kina e levu sara na ka me baleti Jiova kei Jisu. E tukuni tale ga kina na veika rau sa cakava oti kei na veika erau na qai cakava. Ia e sega ni rauta ga meda wilika na ivola oqo, e gadrevi tale e so na ka.

O bau raica e dua tale na ivola ena iyaloyalo? Oqori na iVolatabu. Kerea e dua me wilika vei iko na veitikina mai na iVolatabu e yavutaki kina na italanoa ena ivola oqo. E tiko ena iVolatabu na itukutuku taucoko eda gadreva me rawa nida qaravi Jiova kina ena sala dodonu, da qai rawata tale ga kina na bula tawamudu. Meda dau vuli iVolatabu vakawasoma.

E sega wale ga ni rauta na noda vuli meda kilai Jiova na Kalou kei Jisu Karisito. Dina beka ni sa levu sara na ka eda kila me baleti rau kei na nodrau ivakavuvuli, ia e sega ni kena ibalebale oya nida sa na rawata kina na bula tawamudu. O kila na cava tale ena gadrevi?

E gadrevi meda bulataka sara ga na veika eda vulica. O se nanumi Jutasa Isikarioti tiko? O koya e dua vei ira na le 12 a digitaka o Jisu me nona yapositolo. E levu tale ga na ka e kila me baleti Jiova kei Jisu. Ia na cava ga a qai yacovi koya? Sega ni dede, sa tuburi koya na kocokoco, qai volitaki Jisu vei ira na kena meca ena 30 na tiki ni siliva. Ena sega gona ni rawata na bula tawamudu o Jutasa.

O nanumi Kiesai? Eda wilika na veika me baleti koya ena iTalanoa 69? A vinakata e so na isulu kei na ilavo e sega ni nona. Na ka oqo a vakavuna me lasu, qai totogitaki koya kina o Jiova. Ena totogitaki keda tale ga o koya ke da sega ni muria na nona lawa.

Ia e levu tu na tamata vinaka era dau qaravi Jiova ena yalodina. E vinaka meda vakatotomuri ira. E dua na ivakaraitaki vinaka e rawa nida vakamurimuria na gone o Samuela. Eda a vulica na veika me baleti koya ena iTalanoa 55, na nona sa lai veiqaravi ena valenisoro i Jiova ni se qai yabaki va ga se lima. O koya gona, se mani lailai vakacava na nomu yabaki ni bula, o se rawa tiko ga ni qaravi Jiova.

Ia, sa macala tu ga ni o koya e dodonu meda vakatotomuria kece o Jisu Karisito. Na gauna mada ga e se gone kina, a lako ina valenisoro qai veivosakitaka kei na so e kea na veika me baleta na Tamana vakalomalagi, me vaka eda wilika ena iTalanoa 87. Meda muria na nona ivakaraitaki. Meda qai tukuna yani ena kena levu eda rawata na veika me baleta na noda Kalou o Jiova kei na Luvena, o Jisu Karisito. Ke da cakava na veika oqo, eda na qai rawata kina na bula tawamudu ena parataisi vou ni Kalou e vuravura.