RAU sa mai leqa tu na tagane oqo. Ke rau sega ni lako erau na mate. Erau yamata ni Isireli. Ia na yalewa e vukei rau tiko oqori o Reapi. E tiko o koya ena dua na vale ena bai ni koro o Jeriko. Meda raica mada na vu ni nodrau leqa na tagane.

Era sa vakarau takosova tu na Uciwai na Joritani na Isireli mera lako yani i Kenani. Ia ni se bera oya a talai rau mada e liu e rua na yamata o Josua: ‘Drau lai raica mai na vanua kei na koro o Jeriko.’

Ni rau yaco yani i Jeriko, rau lako sara ina vale i Reapi. Ia e dua a qai tukuna vua na tui Jeriko: ‘E rua na Isireli rau a lako mai ena bogi nikua me rau vakaraica na vanua.’ Ni rogoca na itukutuku oqo na tui a qai tala e so na tamata mera lai tukuna vei Reapi: ‘Kauti rau mai na tamata erau tiko oqori ena nomu vale!’ Ia a vunitaki rau o Reapi ena dela ni nona vale. Sa qai kaya: ‘Erau a lako dina mai e ke, ia au sega ga ni kilai rau. Erau lesu tale ni se qai buto mai na vanua, ni bera ni sogo na matamata ni koro. Ia, ke dou totolo dou na rawa ni toboki rau!’ Era sa qai cicimuri rau.

Nira sa vakanadaku ga, a lako totolo yani o Reapi vei rau na yamata qai kaya: ‘Au kila ni na solia vei kemuni o Jiova na vanua oqo. Keimami rogoca ni a wasea rua na Wasa Damudamu o koya ni oti nomuni biuti Ijipita mai, oni vakamatei rau tale ga o Tui Sioni kei Tui Oki. Au sa caka vinaka vei kemudrau, ia au kerekere mo drau caka vinaka tale ga vei au. Vakabulai iratou mada na tamaqu, tinaqu, ganequ, kei na taciqu.’

Rau vakadonuya na yamata, ia e vinakati vei Reapi me na cakava mada e liu e dua na ka. Erau kaya vua: ‘Taura na dali damudamu qo. Vesuka tiko ena nomu katubaleka. Kauti iratou tale ga mai na nomu vuvale. Ni keimami mai vakarusai Jeriko ena sega ni mate e dua e tiko ena nomu vale ni keimami raica na dali oqo ena nomu katubaleka.’ Ni rau sa lesu yani vei Josua na yamata, erau tukuna vua na ka kece a yaco.