E RAWA ni dua e yalodina tiko ga vua na Kalou ke sotava mada ga e levu na veivakatovolei, ke sega tale ga ni rawaka ena nona talairawarawa? E tarogi qai saumi tale ga na taro qori ena veika e sotava e dua na turaga o Jope.

O Jope e wekai Eparama. Nira se tiko mai Ijipita na Isireli, a tiko o Jope ena vanua sa kilai tu nikua me o Arapea. Era qai soqoni na agilosi mai lomalagi ena mata ni Kalou, wili kina o Setani na agilosi talaidredre. Era vakarorogo tu na agilosi ni tukuna o Jiova nona nuitaki Jope ni dau qaravi koya ena yalodina. E kaya mada ga ni sega ni dua tale na tamata e yalodina me vakataki Jope. Ia e kaya o Setani ni o Jope e yalodina tiko ga baleta ni vakalougatataki koya na Kalou, e taqomaki koya tale ga. E kaya ni na vosavakacacataka na Kalou ke kau tani kece vua na ka e taukena.

E qai vakalaiva na Kalou me kauta tani o Setani na iyau nei Jope, me vakamatei ratou na luvena qai vakavuna me tauvimate. E sega ni kila o Jope ni o Setani e vakavuna tiko qori, e lai lomatarotarotaka kina se cava e vakalaiva kina na Kalou me vakatovolei. Ia e sega ni bau vosavakacacataka na Kalou.

Eratou qai sikovi Jope yani e tolu na itokani lasu. Na ka ratou tukuna e volai tu ena dua na iwase levu ni vola i Jope. Ratou saga me vakabauta o Jope ni Kalou e totogitaki koya tiko ena so na cala e cakava lo, ia e sega ni dina qori. Eratou kaya mada ga ni Kalou e sega ni marautaki ira nona dauveiqaravi se nuitaki ira. E sega ni via rogoca o Jope na nodratou ivakamacala lasulasu. E tukuna ena nuidei ni na yalodina tiko ga yacova ni mate!

Na cala ga e cakava o Jope, ya nona kauaitaka vakasivia me kilai ni donu tiko. A rogoca tiko na veivosaki qori na cauravou o Ilaiu, e mani vakadodonutaki Jope kei ratou na itokani lasu. E vakadodonutaki Jope ni sega ni bau vakasamataka ni bibi sara na kena vakadodonutaki na ka e vakalewai kina o Jiova, mai na ka e vakalewai kina e dua na tamata. E cudruvi ratou tale ga na itokani lasu.

Sa qai vosa o Jiova vei Jope me vakadodonutaka nona rai. E tukuna vua me vakasamataka na vakatubuqoroqoro ni veika buli, me kila kina nida ka somidi sara na tamata ni vakatauvatani kei na cecere i Jiova. E yalomalumalumu o Jope me ciqoma na veivakadodonutaki. E qai vakaraitaka o Jiova “ni dau veikauaitaki qai dau yalololoma,” ena nona vakabulai Jope mai na tauvimate, e vakaruataka nona iyau, qai tini tale na luvena. (Jemesa 5:11) Nona yalodina tiko ga o Jope ni sotava e levu na veika dredre, e vakalasuya kina na vakalelewa nei Setani, ya nida na sega ni yalodina vua na Kalou ke da vakatovolei.

​—Yavutaki ena ivola na Jope.