1, 2. Na cava e isolisoli talei kina na masu? Na cava meda kila kina na ka e kaya na iVolatabu me baleta na masu?

E SOMIDI sara na noda vuravura ni vakatauvatani kei na lomalagi. Ni rai sobu mai vuravura o Jiova, eda vaka ga e dua na mata ni wai mai na itakitaki na lewe ni veimatanitu. (Same 115:15; Aisea 40:15) Eda somidi dina ni laurai vata kei na vakaitamera ni lomalagi, ia e kaya na Same 145:18, 19: “E voleka o Jiova vei ira kece na kacivi koya, vei ira kece na kacivi koya ena yalodina. E vakamamautaki ira na rerevaki koya ena ka era gadreva, e rogoca o koya na nodra tagi ni kere veivuke qai vakabulai ira.” Dua dina na ka dokai na nona via volekati keda na Dauveibuli cecere, qai via rogoca na noda masu. Io, na masu e isolisoli talei ni Kalou vei keda yadua.

² Ia ena rogoci keda ga o Jiova ke da masuti koya ena sala e vakadonuya. Eda na cakava vakacava ya? Meda raica mada na ka e kaya na iVolatabu me baleta na masu.

3. Na cava mo masu kina vei Jiova?

³ E vinakata o Jiova mo masu, se vosa vua. Eda vakadeitaka vakacava qori? Wilika mada na Filipai 4:6, 7. Qori na nona veisureti vakayalololoma na Turaga Cecere ni lomalagi kei vuravura ni kauaitaki iko dina, e vinakata tale ga mo talaucaka vua na lomamu kei na nomu leqa.

4. E vaqaqacotaka vakacava na nomu veiwekani kei Jiova na nomu masu wasoma vua?

 ⁴ Eda na rawa ni veiwekani voleka kei Jiova nida masu vua. Ena dei nodrau veitokani e rua ni rau veivosaki wasoma rau qai dui talaucaka na nodrau nanuma, na ka erau kauai kina, kei na lomadrau. E va tale ga qori na masu vei Jiova. E vakatakila vei iko ena iVolatabu na nona rai, na lomana, kei na veika ena cakava ena gauna se bera mai. O rawa tale ga ni talaucaka vei Jiova na lomamu ni drau veivosaki wasoma. Qori ena vaqaqacotaka na nomudrau veitokani.—Jemesa 4:8.

5. Eda kila vakacava ni sega ni rogoca na masu kece o Jiova?

⁵ E sega ni rogoca o Jiova na masu kece. E kaya o Jiova vei ira na Isireli ena nona gauna na parofita o Aisea:  “Oni masu vakalevu, ia au sega ni rogoca, ni lomoci na ligamuni ena dra.” (Aisea 1:15) Ke da sega ni qaqarauni, eda rawa ni cakava na ka e cata o Jiova qai sega ni rogoca kina na noda masu o koya.

6. Na cava e bibi kina na vakabauta? Eda na vakaraitaka vakacava na noda vakabauta?

⁶ E bibi meda vakabauti Jiova ke da vinakata me rogoca na noda masu. (Marika 11:24) E kaya na yapositolo o Paula: “Ke sega na vakabauta eda na sega ni vakamarautaka rawa na Kalou, ni o koya e torova na Kalou e dodonu me vakabauta ni bula dina tiko o koya, ni na vakaicovitaki ira tale ga era vakasaqarai koya ena yalogu.” (Iperiu 11:6) Ia e sega ni rauta meda tukuna ga nida vakabauta. E bibi meda vakaraitaka na vakabauta qori ena noda talairawarawa vei Jiova e veisiga.—Wilika Jemesa 2:26.

7. (a) Na cava meda yalomalumalumu kina qai veidokai nida masu vei Jiova? (b) Eda na vakaraitaka vakacava ni vu mai lomada na noda masu?

⁷ Na cava meda yalomalumalumu kina qai veidokai nida masu vei Jiova? E macala ga nida na veidokai ke da lai vosa vua na tui se peresitedi. Ia e bibi sara meda veidokai qai yalomalumalumu nida vosa vei Jiova na Kalou Kaukaua Duadua. (Vakatekivu 17:1; Same 138:6) E dodonu me vu tale ga mai lomada na noda masu vei Jiova, me kua ni dua tu ga noda qaqanimasu.—Maciu 6:7, 8.

8. Na cava meda cakava nida masulaka e dua na ka?

⁸ E bibi meda cakacakataka tale ga na ka eda masulaka. Kena ivakaraitaki, ke da masuti Jiova me vakarautaka na ka meda bula kina e veisiga, sega ni kena ibalebale qori meda sa vucesa da qai namaka me solia vei keda o Jiova na ka kece. E dodonu meda sasaga, qai tu vakarau meda cakacakataka na veika eda vinakata.  (Maciu 6:11; 2 Cesalonaika 3:10) Ke da masuti Jiova me vukei keda meda muduka e dua na ivakarau ca, e dodonu meda yawaka tale ga na ituvaki eda na rawa ni temaki kina. (Kolosa 3:5) Meda veivosakitaka mada eso na vakatataro me baleta na masu.

9. Meda masu vei cei? Na cava eda vulica ena Joni 14:6 me baleta na masu?

⁹ Meda masu vei cei? E vakavulici ratou na nona imuri o Jisu me ratou masu vua na ‘Tamada mai lomalagi.’ (Maciu 6:9) E kaya tale ga: “O yau na sala, na dina, kei na bula. Ena vukuqu ga ena qai torovi Tamaqu rawa kina e dua.” (Joni 14:6) Ke da vinakata me rogoci na noda masu, e dodonu meda masu ga vei Jiova ena vuku i Jisu. E bibi tale ga meda doka na itavi dokai e lesi Jisu kina o Jiova. Eda sa raica oti ni lako mai vuravura o Jisu me sereki keda mai na ivalavala ca kei na mate. (Joni 3:16; Roma 5:12) Sa lesi Jisu tale ga o Jiova me Bete Levu, me Turaganilewa.—Joni 5:22; Iperiu 6:20.

10. E dodonu me dua sara na ivukivuki ni masu? Vakamacalataka.

¹⁰ Vakacava me muri e dua na ivukivuki, dabedabe, se iduriduri nida masu? E sega ni tukuna o Jiova meda tekiduru, dabe, se duri nida masu. E vakaraitaka na iVolatabu ni rawa ni duidui na ivukivuki ni masu, me veidokai ga. (1 Veigauna 17:16; Niemaia 8:6; Taniela 6:10; Marika 11:25) E sega ni bibi vei Jiova na ivukivuki ni masu, e bibi ga me vinaka na inaki ni lomada nida vosa vua. Eda rawa ni masu vakadomoilevu se masu lo ena siga kei na bogi, ena gauna kei na vanua cava ga eda via masu kina. Ke sega mada ga ni rogoca e dua tale noda masu, meda nuidei ni na rogoca o Jiova.—Niemaia 2:1-6.

11. Na cava eso na ka eda rawa ni masulaka vei Jiova?

 ¹¹ Na cava meda masulaka? E bibi me salavata kei na loma i Jiova na veika eda masulaka. E kaya na iVolatabu: “Se cava ga eda kerea me salavata kei na lomana, ena rogoci keda o koya.” (1 Joni 5:14) Vakacava eda rawa ni masulaka na veika e baleti keda ga? Io, na noda masu vei Jiova e vaka ga nida veivosaki kei na dua na noda itokani dredre. Kena ibalebale, e rawa nida talaucaka vei Jiova na lomada kei na veika e curuoso kina na noda vakasama. (Same 62:8) E rawa nida kerea na yalona tabu me vakaukauataki keda meda cakava na ka e dodonu. (Luke 11:13) E rawa nida kerei Jiova me vakavukui keda meda vakatulewa vakavinaka, me vakaukauataki keda meda vosota na ituvaki dredre. (Jemesa 1:5) E dodonu meda kerei Jiova me vosota na noda cala. (Efeso 1:3, 7) E dodonu meda masulaki ira eso tale, wili kina o ira na noda vuvale kei ira na tacida vakayalo.—Cakacaka 12:5; Kolosa 4:12.

12. Na cava me vakaliuci ena noda masu?

¹² Na cava me vakaliuci ena noda masu? Io, me vakaliuci o Jiova kei na lomana. E dodonu me vu mai lomada na noda vakavinavinakataka na veika sa vakayacora ena vukuda. (1 Veigauna 29:10-13) Qori sara ga na ka e vakavulica o Jisu me ratou cakava na nona tisaipeli ena gauna eratou masu kina. (Wilika Maciu 6:9-13.) A kaya me ratou masulaka e liu me vakarokorokotaki na yaca ni Kalou. Oti e tukuna o Jisu me masulaki na kena yaco mai na Matanitu ni Kalou, me vakayacori tale ga na loma i Jiova e vuravura. Nida sa masulaka oti na veika bibi qori, sa qai rawa nida masulaka na veika e baleti keda. Nida vakaliuci Jiova kei na lomana ena noda masu, eda sa vakaraitaka tiko na veika e bibi duadua vei keda.

13. Me vakacava na balavu ni noda masu?

¹³ Me vakacava na balavu ni noda masu? E sega ni tukuna qori na iVolatabu. E rawa ni lekaleka se balavu ni na vakatau ena ituvaki. Ena rairai lekaleka na masu ni kana, ia ena balavu na noda masu ni vakavinavinaka vei Jiova se nida talaucaka vua na ka eda kauai kina. (1 Samuela 1:12, 15) Me kua ni inaki ni noda masu  vakabalavu noda via vakadrukai ira eso tale, me vaka era cakava eso ena gauna i Jisu. (Luke 20:46, 47) E sega ni taleitaka o Jiova na masu va ya. E vinakata me vu mai lomada na noda masu.

14. Meda masu vakavica? Na cava eda vulica e keri me baleti Jiova?

¹⁴ Meda masu vakavica? E uqeti keda o Jiova meda vosa wasoma vua. E kaya na iVolatabu meda “masu tiko ga,” meda “gumatua ena masu,” meda “kua ni cegu ena masu.” (Maciu 26:41; Roma 12:12; 1 Cesalonaika 5:17) E tu vakarau o Jiova me rogoci keda ena gauna cava ga eda masu kina vua. Eda rawa ni vakavinavinakataka e veisiga na nona loloma kei na yalovinaka. Eda rawa ni kerea tale ga nona veidusimaki, veivakaukauataki, kei na nona veivakacegui. Ke da vaka mareqeta dina na isolisoli totoka e vakarautaka o Jiova meda vosa kina vua, eda na masu e veigauna.

15. Na cava meda cavuta kina na “emeni” ni oti na masu?

¹⁵ Na cava meda cavuta kina na “emeni” ni oti na masu? Na “emeni” e kena ibalebale na “io,” se “me yaco mada ga.” Qori e dua na sala eda vakaraitaka kina ni vu dina mai lomada na veika eda cavuta ena noda masu. (Same 41:13) E tukuna tale ga na iVolatabu ni bibi meda cavuta vakadomoilevu se cavuta lo na “emeni” ni masu oti e matanalevu e dua tale, meda vakaraitaka kina nida duavata kei na veika e tukuna.—1 Veigauna 16:36; 1 Korinica 14:16.

16. Vakacava e dau sauma dina o Jiova na noda masu? Vakamacalataka.

¹⁶ E dau sauma dina o Jiova na noda masu. E vakatokai koya na iVolatabu me “Daurogo masu.” (Same 65:2) E dau rogoca o Jiova qai sauma na nodra masu mai vu ni lomadra e vica vata na milioni, qai duidui na sala e cakava kina qori.

17. E sauma vakacava o Jiova na noda masu ni vakayagataki ira na agilosi kei ira na nona tamata?

¹⁷ E dau sauma o Jiova na noda masu ni vakayagataki ira na agilosi kei ira na nona tamata e vuravura. (Iperiu 1:13, 14) E levu era masulaka voli mera vukei mera kila vinaka na iVolatabu, ena dua ga na gauna lekaleka era veisiko sara yani na iVakadinadina i Jiova. E kaya na iVolatabu nira vakaitavi tiko na agilosi ena vunautaki ni “itukutuku vinaka” e veiyasa i vuravura. (Wilika Vakatakila 14:6.) E rawa ni sauma tale ga o Jiova na noda masu ni vakayagataki ira na tacida vakayalo mera vukei keda ena noda leqa.—Vosa Vakaibalebale 12:25; Jemesa 2:16.

18. E vakayagataka vakacava o Jiova na yalona tabu kei na iVolatabu me sauma kina na noda masu?

 ¹⁸ E vakayagataka na yalona tabu o Jiova me sauma kina na noda masu. Nida masu meda vukei ena noda leqa, ena rawa ni vakayagataka na yalona tabu me veidusimaki qai veivakaukauataki. (2 Korinica 4:7) E vakayagataka tale ga o Jiova na iVolatabu me sauma kina na noda masu, meda vakatulewa tale ga vakavuku. Na veitikinivolatabu eda wilika e rawa ni vukei keda. E rawa ni veiuqeti tale ga o Jiova ena nona ivakamacala ena soqoni e dua na tacida, se na nona veidusimaki vakaivolatabu e dua na qase ni ivavakoso.—Kalatia 6:1.

19. Na cava eda na rairai nanuma kina ni sega ni sauma o Jiova na noda masu?

¹⁹ De dua eda na veinanuyaka ena so tale na gauna, ‘Na cava e se sega ni sauma kina o Jiova na noqu masu?’ Meda nanuma tiko ni kila o Jiova na gauna kei na sala me sauma kina na noda masu. E kila tale ga na veika ena yaga vei keda. Ena rairai gadrevi meda masulaka tiko na ka eda vinakata ena loma ni dua na gauna meda vakaraitaka kina ni vu mai lomada na ka eda kerea, da qai vakabauti Jiova dina. (Luke 11:5-10) Na sala e sauma kina o Jiova na noda masu ena so na gauna, e rawa ni duatani sara mai na sala eda namaka voli. Kena ivakaraitaki, eda na rairai masulaka e dua na leqa eda sotava tiko. Ia e sega ni kauta laivi na leqa qori o Jiova, e veivakaukauataki ga meda vosota.—Wilika Filipai 4:13.

20. Na cava meda masu wasoma kina vei Jiova?

²⁰ Dua dina na ka dokai noda rawa ni masu vei Jiova! E tiko na yavu vinaka meda vakabauta kina ni na rogoci keda. (Same 145:18) Na wasoma ga ni noda talaucaka vei Jiova na lomada, na dei tale ga ni noda veitokani.