Nira voleka ni butuka na Vanua Yalataki na Isireli ena rauta na 35 na senitiuri sa oti, e tukuna na Kalou ni na taqomaki ira ena “mate vakadomobula” era kila tu e Ijipita. (Vakarua 7:15) E vakaroti ira vakamatailalai ena ka mera cakava mera taqomaki kina, kei na idusidusi ni tiko savasava. Me kena ivakaraitaki:

•   Na lawa me baleta na sisili kei na sava ni isulu.—Vunau ni Soro 15:4-27.

•   E kaya na Kalou me baleta na valelailai: “Me vakarautaki e dua na vanua vuni me dau vakayagataki ena taudaku ni keba, mo dau lako ena vanua oya. Mo kauta vata tiko kei na nomu iyaragi e dua na isivi lailai. Mo kelia na qara ni o roso e tautuba, qai buluta na nomu valelailai.”—Vakarua 23:12, 13.

•   Ke so e tauvi ira tiko na matedewa, era na korotinitaki mera kua ni veimaliwai kei ira eso tale. Nira sa bula vinaka tale, era na savata nodra isulu, ra sili tale ga ena wai, ni bera nira lesu , me qai rawa ni tukuni nira sa “savasava.”—Vunau ni Soro 14:8, 9.

•   Ena korotinitaki o koya e tara na yagonimate.—Vunau ni Soro 5:2, 3; Tiko Voli Mai na Lekutu 19:16.

 E laurai sara ga ena lawa e Isireli na ka e vauca na veiqaravi vakavuniwai kei na tiko savasava sa kilai levu tu nikua.

 Ia ena so tale na vanua, era se vakatotomuria tu ga na ivakarau ni bula makawa me baleta na tiko savasava. Kena ivakaraitaki:

•   Benuci na tolonisala kei na wai, kakana e ca, kei na benu e vakadukadukalitaki na itikotiko. Qori e vakavuna vakalevu na tauvimate kei na nodra matedole na gonelalai.

•   Era sega tale ga ni kila na vuniwai era bula ena gauna makawa sara na manumanu somidi e vakadewa na mate, me vaka na germs kei na pathogens. Era dau vakayagataka kina na kai Ijipita eso na “iwali” nira nanuma ena vakaotia na mate, me vaka na dra ni moko, de ni pelikani, luve ni kalavo mate, suasua, kei na madrai vuca. E vakayagataki tale ga ena veiqaravi vakavuniwai na de ni tamata kei na manumanu.

•   E levu na mate e tauvi ira na lewe i Ijipita makawa ni dau benuci na Uciwai na Naile kei na isalisali e vakadrodroi kina na wai. Levu tale ga na gonedramidrami era mate e Ijipita ena vuku ni coka kei na so na mate e vakavuna na kakana e ca.

 E yaga sara ga vei ira e Isireli makawa nodra muria na Lawa ni Kalou, ra bulabula vinaka tale ga.