Cava nodra rai e levu me baleta na ivakatagedegede savasava ni veiyacovi, kei na vakawati e volai ena iVolatabu? E levu era nanuma ni sa sega ni yaga ena gauna qo, wili mada ga kina eso era kaya nira lotu vaKarisito. Eso na lotu era veisautaka na ka era vakavulica me baleta na ka e donu, kei na ka e cala me ganita na veisau ni gauna. E se bibi tiko ga nikua na ivakatagedegede ena iVolatabu me baleta na ka e donu kei na cala? Io, ena vakamacalataki ena ulutaga qo na vuna.

 Eda buli meda nuitaka nona veidusimaki na Dauveibuli. E kaya na iVolatabu: “E sega ni vu vua na tamata e lako tu me lewa na nona ilakolako.” (Jeremaia 10:23) Dina ga ni buli keda na Kalou o Jiova a meda vakatulewa, ia e sega ni solia vei keda na dodonu meda cakava qori, se meda kila ga vakataki keda na ka e donu kei na ka e cala. E vinakata ga meda vakararavi vua me dusimaki keda.—Vosa Vakaibalebale 3:5.

 E tu ena iVolatabu na ivakatagedegede savasava ni Kalou me dusimaki keda. Dikeva mada e rua na vuna bibi meda muria kina qori.

•   E buli keda na Kalou. (Same 100:3) Ni buli keda o Jiova e kila vinaka na sala meda marau qai bulabula kina, me vinaka noda vakasama kei na ivakarau ni lomada. E kila tale ga na ka eda na sotava ke da sega ni muria nona veidusimaki. (Kalatia 6:7) E vinakata o Jiova meda marautaka na bula vinaka duadua. Sa rauta me kaya na iVolatabu ni Kalou e “vakavulici tiko mo vinaka kina, o koya e tuberi iko ena sala mo lakova.”—Aisea 48:17.

•   E rawa ni vakacalai keda na gagadre ni lomada. E levu era nuitaka na lomadra mera kila kina na ka e donu kei na ka e cala. Na lomada e okati kina na noda gagadre, kei na ka eda dau taleitaka. Ia e kaya na iVolatabu ni “dau veivakaisini duadua ga na loma ni tamata qai rerevaki.” (Jeremaia 17:9) Ke sega ni dusimaka na lomada na vuku vakalou, ena rawa nida lai cakava kina na ka eda na qai veivutunitaka e muri.—Vosa Vakaibalebale 28:26; Dauvunau 10:2.

 Sega! E tu ena iVolatabu na ka dina me baleta na Kalou, kei na ka e vinakata o koya meda muria. (1 Korinica 6:9-11; Kalatia 5:19-23) E vinakata meda kila na veika dina qori. (1 Timoci 2:3, 4) E dodonu gona vei ira na iliuliu ni lotu vaKarisito mera vakavulica na ka e kaya na Vosa ni Kalou.—Taito 1:7-9.

 Levu na tamata era sega ni via muria na ivakatagedegede ena iVolatabu, ra qarai ira na iliuliu ni lotu me tukuna vei ira “na ka ga e via rogoca na daligadra.” (2 Timoci 4:3) Ia e volai ena iVolatabu e dua na ivakasala bibi qo: “Era rarawa o ira na kaya ni vinaka na ca, e ca na vinaka.” (Aisea 5:20) Koya gona, na Kalou ena totogitaki ira na iliuliu ni lotu era sega ni vakavuvulitaka vakadodonu na ka e tukuna o koya ni donu kei na ka e cala.

 Sega. O ira era via vakamarautaka na Kalou era na muria na ivakaraitaki, kei na ka e vakavulica o Jisu Karisito. E vakavulici ira nona imuri mera kua ni dau vakalelewa, ia mera lomani ira qai dokai ira na tamata kece ga.—Maciu 5:43, 44; 7:1.

 O ira na nona imuri era na muria vakavoleka na ivakatagedegede ni Kalou ena nodra bula. Ia, e vakavulici ira tale ga mera ciqoma ni so ena duatani na ka era vakabauta. (Maciu 10:14) O Jisu e sega ni solia vei ira na lewa mera vakayagataka ina ka vakapolitiki, se dua tale na ka mera vakasaurarataki ira kina eso tale mera muria na ivakatagedegede ni Kalou.—Joni 17:14, 16; 18:36.

 O ira na muria na ivakatagedegede ni Kalou me baleta na ka e donu kei na ka e cala, era na vakila na kena yaga ena gauna qo, kei na gauna se bera mai. (Same 19:8, 11) Qo eso na ka era na vakila:

•   Rawati Vakacava na Bula Marau.—Vosa Vakaibalebale 29:6.

•   Veiwekani voleka kei na Kalou.—Vosa Vakaibalebale 3:32.

•   Na Kalou ena vukei ira ena gauna dredre.—Vosa Vakaibalebale 11:8.

•   Era na rawata na bula tawamudu e vuravura.—Same 37:29.