E VAKAYAGATAKI VAKACAVA NA NODA CAU?
Tarataravaki ni Bera na Matedewa
1 NOVEBA, 2020
E veiyabaki era papitaiso e vica vata na udolu, qai vinakati me tara e levu na vale me sokaloutaki kina o Jiova. E tuvanaka kina na tabana ni tarataravaki se LDC (Local Design/Construction Departments) me tara se vakavinakataki e sivia e 2,700 na vanua ni sokalou ena yabaki vakacakacaka ni 2020. a
Ia e tarovi na cakacaka qori ena vuku ni matedewa na COVID-19. E tarova na Komiti ni Tabaivola ni iLawalawa Dauvakatulewa e levu na tarataravaki e veiyasa i vuravura, me rawa nira taqomaki na tacida, me muri tale ga na vakatatabu ni matedewa. Ia ni bera na matedewa e taravaki se vakavinakataki e sivia e 1, 700 na vanua ni sokalou ena yabaki vakacakacaka ni 2020. E caka tale ga e sivia e 100 na tarataravaki lelevu ena valenivolavola ni tabana. Dikeva mada na kena yaga e rua na tarataravaki vei ira mataveitacini.
Valenivolavola ni tabana e Cameroon. E vinakati me vakalevutaki na valenivolavola ni tabana makawa e Cameroon. E nanuma na Komiti ni Tabaivola me vakavinakataki na valenivolavola ni tabana makawa, ia e rui saulevu. Ratou lalawataka tale ga me tara e dua na valenivolavola ni tabana vou se voli e dua na tabavale qai vakavinakataki. Ia e sega ni caka ruarua qori.
Ratou qai kila na tacida nira na cakava tiko na vakailesilesi ni matanitu e kea e dua na gaunisala ena yasa ni dua na Vale ni Soqoni Lelevu. Qori ena vakarawarawataka sara ga na veitosoyaki kei na vakarautaki ni wai kei na livaliva ena vanua ni tarataravaki. Qori sara ga na ka e vinakati ena valenivolavola ni tabana vou. E mani vakadonuya na iLawalawa Dauvakatulewa me tara na valenivolavola ni tabana ena yasa ni Vale ni Soqoni Lelevu.
Era veivuke na mataveitacini ena tara ni valenivolavola ni tabana vou e Cameroon
E vakabula ilavo kei na gauna na nodra cakacaka vata na mataveitacini kei na kabani ni tarataravaki. Ni tara oti na valenivolavola ni tabana, e vakabulai e sivia e rua na milioni na dola na ilavo ni Merika! Ni bera na matedewa, era sa tokitaki na lewe i Peceli ina nodra itikotiko vou.
E tara na valenivolavola ni tabana vou e Cameroon ni bera na COVID-19
Era marautaka vakalevu na lewe ni vuvale e Peceli na nodra itikotiko vou kei na vanua ni cakacaka. Era okata qori me iloloma mai vei Jiova. E kaya e dua na veiwatini, “Keirau via solia neirau vinaka taucoko ena neirau veiqaravi, keirau mareqeta tale ga vakalevu na iloloma talei qo.”
Era cakacaka tiko na tacida ena nodra ofisi vou ni bera na matedewa
Ofisi ni Vakadewa tu Yawa (RTO) ena Vosa vakaTojolabal e Mexico. E vicavata na yabaki nodra veiqaravi tiko na timi ni vakadewa ena vosa vakaTojolabal ena valenivolavola ni tabana e Merika e Loma, volekata na siti o Mexico. Ia e vosataki vakalevu na vosa vakaTojolabal e Altamirano kei Las Margaritas, e rauta ni 1,000 na kilomita na kena yawa mai na valenivolavola ni tabana! E dredre kina vei ira na daunivakadewa mera kila na veiveisau ni kena vosataki na vosa qori. Kuria oya, e dredre mera kunei na tacida era rawa ni veivuke ena tabana ni vakadewa kei na katokatoni ni vosa qori.
Era veivuke na mataveitacini ena tara ni ofisi ni vakadewa tu yawa
E mani vakatulewataka na Komiti ni Volavola ni iLawalawa Dauvakatulewa me tokitaki ira na daunivakadewa ina vanua e vosataki vakalevu kina na vosa vakaTojolabal. E volia sara na valenivolavola ni tabana e dua na tabavale qai vakavinakataka. E sau lailai sara ni vakatauvatani ke tara se redetaki na ofisi.
E yaga sara ga vei ira e levu na ka e caka qo. Kena ivakaraitaki, e kaya e dua na daunivakadewa: “Au veiqaravi me tini na yabaki ena tabana ni vakadewa ena valenivolavola ni tabana. Gauna kece qori au sega ni bau sotava e dua na vuvale me vosa vakaTojolabal. Ia qo ni sa tokitaki na ofisi ina vanua e vosataki vakalevu kina na vosa qori, au sa veimaliwai kei ira na lewenivanua e veisiga. Au kila vinaka kina e levu na vosa, e vukei au tale ga ena noqu cakacaka ni vakadewa.”
Ofisi ni vakadewa ena vosa vakaTojolabal ni bera ni vakavoutaki kei na kena sa vakavoutaki oti
Tarataravaki ena Yabaki Vakacakacaka ni 2021
E tuvanaki tu me tara e 75 na ofisi ni vakadewa tu yawa, kei vanua ni vuli e vakarautaka na isoqosoqo ena yabaki vakacakacaka ni 2021. Ena tomani na tarataravaki levu ena walu na valenivolavola ni tabana wili kina na tarataravaki e Ramapo, e Niu Yoka. Ena tokitaki tale ga na valenivolavola ni tabana e Argentina kei Itali. Kuria ya, e vinakati me tara e sivia e 1,000 na Vale ni Soqoni, e sivia tale ga e 6,000 me tara vou tale, qai 4,000 me vakavinakataki.
E vakailavotaki vakacava na tarataravaki kece qori? E kaya o Brother Lázaro González, e lewe ni Komiti ni Tabana e Merika e Loma ni vakamacalataka tiko na tarataravaki ena Ofisi ni Vakadewa tu Yawa ena vosa vakaTojolabal: “Era sega ni rawaka sara na tacida era tiko ena yalava e qarava na valenivolavola ni tabana. Ia e tara rawa ga na ofisi ni vakadewa qo ena nodra veitokoni na mataveitacini e veiyasa i vuravura. Nodra cau na tacida e rawa nira tokitaki na daunivakadewa ina vanua e vosataki vakalevu kina na vosa vakaTojolabal. Keimami vakavinavinakataki ira gona na tacida ena nodra lomasavu.” Io, e vakayacori na tarataravaki kece qo ena nomuni cau. Oni vakavinavinakataki ena nomuni cau ena cakacaka e vuravura raraba, levu na cau qori e caka ena donate.jw.org.
a Na Tabana ni Tarataravaki e Qarava na Valenivolavola ni Tabana (LDC), e tuvanaka qai qarava na tara ni Vale ni Soqoni ena yalava e qarava na valenivolavola ni tabana. Na Tabana ni Tarataravaki e Veiyasa i Vuravura ena itikotiko liu (WDC), e qarava qai tuvanaka na tarataravaki e veiyasa i vuravura.
Rawa ni o Wilika Tale ga
TARO E TAROGI WASOMA
Era Vakayagataka Vakacava na Cau na iVakadinadina i Jiova?
Era vakayagataka na iVakadinadina i Jiova na cau mera vutuniyau kina?
TARO E TAROGI WASOMA
E Vakailavotaki Vakacava Nodra Cakacaka na iVakadinadina i Jiova?
Keimami sega ni dau muria nodra iwalewale ni cau e levu na lotu.
