Ena 2020, e yaco e levu na leqa tubukoso qai veitauvi e veiyasa i vuravura na matedewa na COVID-19. Era veivuke vakacava na iVakadinadina i Jiova vei ira na vakaleqai?

 Ena yabaki vakacakacaka ni 2020, a e vakadonuya na Komiti ni Kodineita ni iLawalawa Dauvakatulewa me vakayagataki e 28 na milioni na dola b ena cakacaka ni vakacoko. Qori me vukei ira na vakaleqai ena sivia na 200 na leqa tubukoso. Me vaka na matedewa na COVID-19, na cagilaba, waluvu e Aferika, leqa ni kakana e Venezuela, kei na lauqa e Zimbabwe. E vakayagataki na ilavo e cautaki qori ena kakana, wai, vanua mera tiko kina, isulu kei na wainimate. E wili tale ga kina na iyaya ni sasamaki kei na iyaya ni cakacaka me vakavinakataki kina na nodra vale na tacida. Qo eso na kena ivakaraitaki.

 COVID-19. Na matedewa qo e vakaleqai ira vakayago na tacida veiyasa i vuravura. Eso era yalolailai, e vakaleqa tale ga na nodra bula vakailavo. E tuvanaki kina e veiyasa i vuravura e sivia e 800 na Komiti ni Vakacoko (DRC) mera veivuke. O ira na tacida tagane era veiqaravi kina era raica na veika era vinakata na tacida ra qai vakauta na ripote ina Komiti ni Kodineita me rawa ni kila na sala vinaka duadua mera vukei kina na tacida.

 Ena yabaki sa oti, era veivuke na DRC vei ira e levu na ena voli kakana, wai, na ka me baleta na tiko bulabula, kei na wainimate. Eso na vanua, era cakacaka vata kei ira na qase ni ivavakoso ena nodra vukei na tacida mera ciqoma na veivuke e vakarautaka na matanitu.

 Eso era sega ni tiko ena dina era qoroya na noda cakacaka ni vakacoko. Kena ivakaraitaki, e kaya vei ira na tacida o Field Simwinga e dua na ivakalesilesi ni matanitu ena taoni o Nakonde mai Zambia: “Keimami vakavinavinakataka vakalevu na nomuni veivuke vei ira na vakaleqai ena kena gauna donu.”

 Leqa ni Kakana e Angola. Na COVID-19 e vakaleqa na kakana e Angola, e tubu kina vakalevu na kena isau. E dredre gona vei ira e levu na tacida mera voli kakana.

 E kerei na valenivolavola ni tabana e Brazil mera veivuke ena kena vakau na kakana vei ira na tacida e Angola. Me rawa ni vakayagataki vinaka na cau, era saga mera kila na tacida na sala vinaka duadua me voli, qai vakau na kakana e Angola. Koya gona, na kena voli kei na kena vakau e dua na reseni na kakana e rauta ni 22 ga na dola qai voleka ni 20 na kilokaramu na kena levu. E tiko kina na kakana me vaka na raisi, bini kei na waiwai ni vakasaqa. Me yacova mai qo sa vakau oti e 33,544 na reseni na kakana. E biu tale ga ena reseni qori eso na kakana e Angola ra qai vakani kina e 50,000 na tamata!

 Cava nodra rai na tacida ena veivuke qori? E kaya o Alexandre e tiko ena dua na vanua yawa e Angola: “Au vakadinadinataka kina ni lomani au o Jiova, au sega tale ga ni tu taudua. E mareqeti au vakalevu na nona isoqosoqo!” E kaya o Mariza,e dua na itubutubu le dua: “E rogoca o Jiova na noqu tagi. Au vakavinavinakataki koya kei na nona isoqosoqo!”

 Veivuke ena Lauqa e Zimbabwe. Ena yabaki vakacakacaka ni 2020, e tarai Zimbabwe dua na lauqa levu era waloloi kina e vicavata na milioni. E lailai kina na kedra kakana e vicavata na udolu na tacida e Zimbabwe.

 E tuvanaki kina e lima na Komiti ni Vakacoko me vakarautaka na kedra kakana na tacida. Era veivuke e vicavata na drau na mataveitacini ena kena tawani na kakana, usani na iyaya, eso mada ga na tacida era solia na nodra motoka me vakayagataki ena vakacoko. c Ena yabaki vakacakacaka ni 2020, e vakayagataki e $691,561 mera vakani kina e sivia e le 22,700 na tamata!

 Eso na gauna ni bera ni yaco yani vei ira na tacida na ka ni veivuke sa oti koso na kedra kakana. Ia gauna ga e yaco yani kina na kakana dua na ka nodra vakavinavinakataki Jiova. Eso era lagata sara ga na noda sere ni soqoni.

 Ena dua na vanua rau tiko e rua na tacida yada ena dua na bose vakoro e veivosakitaki kina na nona veivuke e dua na isoqosoqo (NGO) me vakarautaka na kedra kakana. Toso tiko na bose e veivosakitaki ga vakalevu na veika vakapolitiki. Rau mani kaya na tacida ni rau na sega ni ciqoma na ka ni veivuke. Ni rau biubiu era vakalialiai rau na lewenikoro ra qai tukuna vei rau: “Ni drau vinakata na kakana kua ni tovolea mo drau gole vei keimami!” Oti ga e rua na macawa era yaco yani na tacida, ra qai kauta yani na kedrau kakana. Ia era se waraka tiko ga na lewenikoro na veivuke ni NGO!

 Dua tale ga na ivakadinadina levu vei ira eso tale na cakacaka ni vakacoko e Zimbabwe. Kena ivakaraitaki, o Prisca e vakaitikotiko ena dua na koro lailai. Dina ni yaco tiko na lauqa ia e sega vakadua ni calata o Prisca na cakacaka vakavunau ena siga Vukelulu kei na Vakaraubuka. Era vakalialiai koya na lewenikoro ra qai kaya: “Ratou na mate wale nomu vuvale ena viakana ni o vunau tiko.” E sauma vei ira o Prisca: “O Jiova ena sega vakadua ni biuti ira na nona tamata.” Sega ni dede sa yaco yani vua na nodra veivuke na tacida. Eso na lewenikoro era qoroi qori ra qai kaya vua: “E sega ni guilecavi iko na Kalou, keimami via kila tale ga e levu na ka me baleti koya.” Gauna qo ratou sa vakarorogo tiko e le vitu ena soqoni e dau kaburaki ena siteseni ni retio.

 Nida volekata na icavacava eda na sotava e levu na leqa tubukoso (Maciu 24:3, 7) Oni vakavinavinakataki vakalevu ena nomuni lomasavu ena cau ni oni vakayagataka na donate.jw.org. Nira vukei kina na tacida era vakaleqai ena kena gauna.