IVAKASALA INA VUVALE | VAKAWATI

Sala Mo Qarauna Kina na Vuvu

SARAVA/ROGOCA

Ena sega ni marautaki na vakawati ke dua vei rau na veiwatini e dau kasami qai sega ni nuitaki. Ena rawa gona vakacava mo drau kua ni veivuvutaki?

Ena ulutaga qo

Cava na vuvu?

Na vosa “vuvu” e rabailevu na kena ibalebale. Ena ulutaga qo e vakaibalebaletaka na ivakarau ni yalo o vakila ke o nanuma e dua e vinakati watimu tiko. Se o nanuma ni o watimu e domona tale tiko e dua. O na rairai nanuma kina ni sa leqataki nomu bula vakawati, e sega ni cala ke va qori nomu rai. Me nanumi tiko na vakawati, ya na nomudrau veivolekati kei watimu. Drau na cakava tale ga na ka drau rawata me taqomaki kina nomudrau ivau ni vakawati.

iVakavuvuli vakaivolatabu: “Erau na sega ni lewe rua tiko, erau sa na dua ga na yago. . . . Na ka sa vauca vata na Kalou me kua ni tawasea na tamata.”—Maciu 19:6.

“Na vuvu e vaka na ivakasala e dau soli ni vakarau yaco na kama. E vukei iko mo yadrava na leqa e rawa ni yaco, qai cakava kina e dua na ka.”—Benjamin.

Ia na vuvu vakasivia, e yavutaki ena nomu kasami se lomaleqataki watimu, e sega ni dua na kena yavu vinaka. Ke o lomani watimu dina o na sega ni vuvutaki koya vakasivia. (1 Korinica 13:4, 7) E vola o Dr. Robert L. Leahy: “Na itovo e vu mai ena [vuvu vakasivia,] e rawa ni o cakava kina eso na ka ena vakaleqa nomu vakawati.” a

Cava e rawa ni vakavuna?

De dua a sega ni yalodina vei iko o watimu i liu, se rau veibiu beka na nomu itubutubu ni dua vei rau e lasaituba. O qai leqataka de na yaco tale ga qori vei iko.

“Niu se gone, a lasaituba o tamaqu. E dredre sara ga meu nuitaki ira eso tale. Eso na gauna au dau vuvutaki watiqu.”—Melissa.

Dua tale na ka me nanumi, ke cala tiko na nomu rai ena totolo ga nomu nanuma nira saga tiko eso mera vakaleqa nomu vakawati. O na rairai nanuma tale ga ni na biuti iko o watimu me lai vakawati tale.

“A caka nona vakamau e dua na itokani nei watiqu. E mani kerei me duri vata kei nona itokani. Ena vinakati kina vua me cakava vata eso na ka kei na yalewa ena duri vata kei yalewa vou. Au sega sara ga ni taleitaka, au mani kaya vua me kua ni vakaitavi kina.”—Naomi.

E duidui na ivalavala ni vakamau e veivanua. Na ivakavuvuli ga vakaivolatabu e dodonu me dusimaki ira na lotu vaKarisito. Vakacava a yalodredre o Naomi ena gauna ya? Ni vakasamataka lesu, e kaya ni sega ni dodonu me vuvutaki watina. E tomana: “E cala sara ga noqu rai, au nanuma ni vakatauvatani au tiko o watiqu kei ira na vo ni yalewa. Ia e sega ni dina qori.”

Se mani cava e vakavuna, na vuvu e rawa ni o lai kasami se nanuma ni tawayalodina vei iko o watimu. Na itovo qori e rawa sara ga ni vakaleqa nomu vakawati, e rawa ni vakavuna tale ga mo tauvimate.

iVakavuvuli vakaivolatabu: “Na vuvu e vaka na kenisa.”—Vosa Vakaibalebale 14:30, Easy-to-Read Version.

O na vorata vakacava?

Saga mo nuitaki. Kua ni vakasamataka na sala e rawa ni tawayalodina kina o kemu isa. Saga mo vakasamataka ga na ka sa cakava oti mo rawa ni nuitaki koya tiko.

“Au dau vakasamataka nona itovo vinaka o watiqu. Ke kauaitaka tiko e dua, e sega ni kena ibalebale ni vinakati koya tiko. Dina ni sega ni vinaka nodrau vakawati na noqu itubutubu, ia e sega ni tukuni ni na va tale ga qori na noqu vakawati.”—Melissa.

iVakavuvuli vakaivolatabu: “Na loloma . . . e vakabauta na ka kece.”—1 Korinica 13:4, 7.

Kua ni nanuma ni donu tu ga na ka o kasamitaka. E vola o Dr. Leahy, sa cavuti oti mai: “Eso na gauna eda nanuma ni dina na ka eda kasamitaka. Ke da nanuma mada ga ni dina, ena sega ni dau dina tu ga qori.” b

“Ena rawa ni basika na leqa ena nomu bula vakawati ke o dau kasamitaki watimu.”—Nadine.

iVakavuvuli vakaivolatabu: “Me kilai na nomuni yalorawarawa vei ira na tamata kece ga.”—Filipai 4:5.

Veivosakitaka na ka o nanuma. Se mani cava e vakavuna nomu vuvu, mo veivosakitaka qori kei watimu. Me rawa ni drau duavata kina ena ka mo drau cakava kei na ka me kua.

“Ni drau veivosaki kei watimu kua ni nanuma ni via vakararawataki iko. E saga tale tiko ga o koya me walia na leqa. Me donu tiko nomu rai me baleti koya. De dua o dau cudrucudru beka ga, se namaka vakasivia na ka. Se de dua e sega ga ni kila o watimu ni sega ni kauaitaki iko tiko.”—Ciara.