Dua na ka era kilai tani kina na pusi nira dau vakasilimi ira wasoma. E dau vica vata na aua na nodra cakava tiko qori. E rawa vakacava? Ni tiko e yamedra e dua na ka vakasakiti.

 Vakasamataka mada: E tiko ena yame ni pusi e 290 na ka momoto e varovaroa qai kaukaua me vaka na noda itaukuku. Na ka momoto qori e tiko e yamena e rawa ni dreta na weli mai gusuna. Na gauna e dramica kina na pusi na vutina, ena coba sara ga na ka momoto qori ena maliwa ni vutina qai lai biuta na weli e kulina.

 Ni dramica na yagona na pusi ena veisiga, e rawa ni biuta e vutina kei na kulina e rauta ni 48 na mililita na weli. E tiko ena nona weli e dua na mataqali wainimate (enzyme) e rawa ni kauta tani na duka. Kena kuri, ena gauna e mamaca kina na weli qori, ena vakabatabatataka e dua na iwase ni yagona. E yaga vakalevu qori vei ira na pusi nira sega ni dau buno vakalevu.

 Ke medre tu na vutina, ena curu vinaka sara kina na momoto ni yamena me vakamalumutaka qai seruta vinaka. Ena rawa tale ga ni vakayagataka qori me masia kina na kulina ena gauna e vakasilimi koya tiko kina. Era cakava na dauvakadidike e dua na mataqali barasi ni ulu mera vakatotomuria kina na ka momoto ena yame ni pusi. Ni vakatauvatani kei na vo ni barasi, e rawarawa sara ni barasitaki na ulu ena barasi qori, me vakasavasavataka tale ga. Ena vakamalumutaka tale ga ke medre. Era vakabauta na dauvakadidike ni rawa nira bulia e levu na ka me samaki kina na ka vutivutia nira vakatotomuria na ka momoto ena yame ni pusi. E rawa ni boroi tale ga kina na wainimate se kirimu me vakawainimatetaki kina kuli ni yago e levu kina na drauniulu.

 Na cava o nanuma? E bula vakaidewadewa na yame ni pusi se buli?